MINKANA 16 - Kalate Zambe Nnomo a Mfefe Mfefé Nkôñelan

¹ Môt émien nye a ta'a mam e *nlem, ve ntyi'an ôyem wo tyik wo so be Zambe;

² mezene me môt mese me ne *mfuban e mise mé, ve Zambe nye a ve'e minsisime kop.

³ Ke'e Zambe mimboone miôé, éyoñe te mam wo kômbô bo ma ye tôéban.

⁴ Zambe a nga bo jôm ese a sôñe ngume jam, ja'ane mbo *abé a nga bo nye asu môse ya njuk.

⁵ Zambe a yene *nlem ôse ô ne ziñ mbia jôm; a e ne bebela na *melep ma ye tôñ avale nleme te.

⁶ Mvam a bebela bia jamé ékop, a môt a sa'ale abé éyoñ a ko Zambe woñ.

⁷ Eyoñe Zambe a yene mezene me môt éziñe mvaé, a bo ja'ane besiñe bé na be tabe *mvo'é a nye.

⁸ Tyôtyoé biôm é ne mvaé e *zôsôô été, a dañ abui akum ékotekot été.

⁹ Nleme môt wo fase mame ya zene jé, ve Zambe nye a yemete medaa mebo mé.

¹⁰ Minkulane mejô mi bete biyaé bi njô bôt, e ntyi'ane mejô été, anyu dé e nji yiane bo ékotekot.

¹¹ E kop a avek bi ne zôsôô bi ne biôme bi Zambe, metyi me kop mese fe me ne nkuta été me ne ésaé jé.

¹² Bejô bôt ba wô'ô mimboon mia liti ésas angôndô, amu na éto njôan ja yem ve nya ntyi'ane mejôô.

¹³ Bejô bôt ba yene biyaé bezôsôô be bôte mvaé, a ba nye'e môt ase a kobô *zôsôô.

¹⁴ Ayaa njô bôt e ne nkatefoé awu, ve mfefe'e môt ô ne je'e de.

¹⁵ Eyoñ asu njô bôt e ne ne njema, ényiñ e nje le, a mvame jé ja funane nkute mveñ y'amané mbu.

¹⁶ Ngo'o abim ane mbiane fek ô ne mvaé a dañe or! Mbiane nyeman a dañe argent!

¹⁷ Zene bezôsôô be bôt é ne nsa'alan abé; nyô a bômbô évévé ya fombô e zene jé, a ba'ale ényiñe jé.

¹⁸ Mebun ma dutu ntyamane mam, a nsisime mbia anyu wo dutu na mam me ku.

¹⁹ A ne mvaé ya suu womiene si mia be minzôzoé, a lôte na ô kaban akum mia be bôt be ne mebun.

²⁰ Tuka'a fase jôm wo ye'ele, éyoñe te wo ye ke ôsu, a môt a too ndi *nlem be Zambe a ne mevak.

²¹ Môte *nlem ô ne fek a lobane na ñyeme mam, a évôvoé ya biyaé ja kô'ôlane ñyeman.

²² Mbamba mfasan a ne anjeñe y'ényiñ e be ba be bili wô, ve melebe mekut me ne mboon akute wop.

²³ Nleme mfefek wo ve anyu dé na e kobô a nya mfasane, a meyaé ya ñyemane wé ma yene'e biyaé bié yôp.

²⁴ Mbamba *minkobô mi ne ésia wôé! Ma ve *nlem évôvoé a ma saé nyô.

²⁵ Zen éziñ é ne yené mvaé e mise me môt, v'asu'ulan, *zen éte é ne nyô y'awu.

²⁶ Nkômbane mbo ésaé wo saé asu dé, amu anyu dé da tindi nye mfa'a ôte.

²⁷ Môt a ne momo jôm a kômesane nju'u wé, a ôyeme vié wo yôñ a mboone *nkpwala.

²⁸ Ekotekote môt ja soé mintañete, a nyô a ne mfuk a kandé bemvôé.

²⁹ Môt a n'évô a won e môte mbok, a wulu nye e *zen é nji bo mvaé.

³⁰ Nyô a dibe mis a bo nalé, amu a bôndé mefe'e me n'ékotekot, nyô a bem, émien mesôñe biyaé a maneya bo *abé.

³¹ Nyub é ne mbamba ékate duma, ba koone je e *zen é ne *zôsôô.

³² Nyô a ne ôte'ete'e ya yaa, a ne *mvo'é a dañe mben, a nyô a yeme jôô émien a dañe nyô a nyoñe ngume tison.

³³ Asimba da wuaban e mfe'ézingi été, ve ntyi'an ôse wo so be Zambe.