MINKANA 15 - Kalate Zambe Nnomo a Mfefe Mfefé Nkôñelan

¹ Evôvoé éyalan ja je'e ayaa, v'éfia ja balé ja dutu ayaa.

² Ôyem mimfefek wo ve ñyemane mam étua mvaé, v'anyu mekut da sôé mboon akut.

³ Mise me Zambe me ne vôm ase, me fombô'ô mbia a mba be bôt.

⁴ Evôvoé ôyem é n'élé ja v'ényiñ, ve ng'ékotekot é n'été ja ve ate'e nyô.

⁵ Akut da vini meleb m'ésaa, ve nyô a semé *melep a bo mam a atyeñ.

⁶ Nda zôsôa môt é bili abui akum, v'akume mbia môt da soo njuk.

⁷ Biyaé mimfefek bia mialane ñyeman ve nleme mekute me bôt ô nji bo nalé.

⁸ Metuna'a bebo *abé me ne mbia jôme be Zambe ve a kañese meye'elane bezôsôô be bôt.

⁹ Zene mbo *abé é ne mbia jôme be Zambe, ve *a nye'e nyô a tôñe zôsôô;

¹⁰ mbia *melep me ne asu nyô a kôlô *zen ja yian; Nyô a vini *melep a ye wu.

¹¹ Vôme miñwuan mi né a mbi'ili ya njañan bi ne Zambe ôsu, nguma'ane ke minleme mi bôt!

¹² Nkpwe'ele bôt a nji nye'e na be jôô nye, ajô te a ne te ke e mfa'a mimfefe'e mi né.

¹³ Nlem ô ne mevak wo ve asu ne njema; v'éyoñe *nlem wo wô'ô njuk nsisime fe wo tek.

¹⁴ Nlem ô ne fek wo jeñe ñyeman, v'anyu mekut da di mboon akut.

¹⁵ Melu m'éngôngole môt me n'abé mese, ve *nlem ô bili mevak ô n'abô'ô bidi y'éyoñ ése.

¹⁶ Tyôtyoé biôm ô laté nkoone Zambe woñ bi ne mvaé a dañ abui akum e nzameta'an été.

¹⁷ Esua bijebejeba'a é ne mvaé e vôme nye'an ô né, a dañ avoñe nyak e vôme ziñ é né.

¹⁸ Môt a yaa a dutu mintañete, ve nyô a n'ôtete'e ya yaa a je'e mewôman.

¹⁹ Zene nleles ja funane nka'alé biyo, ve zene bezôsôô be bôt é ne nje'ese.

²⁰ mfefe'e mon wo v'ésaa wé mevak, akute môt de ki da biasé nyia;

²¹ nyô a ne *te fek a vak a mboon akut, ve mfefe'e môt wo wulu ne tiññ e dulu dé été.

²² E mam môt a kak ma bo te tôéban amu mbôndane fe'e momo, ve ma boban e vôm abui bevee *melep be né.

²³ Eyoñe môt a v'éyalan y'anyu dé, jame te e ne di ya mevak, a ngo'o aka'a mvaé éfia ja toteban éyoñ éyoñ ja yian.

²⁴ Zen ényiñ ja bete môt a yeme fase yôp, nalé ate a ye sa'ale étaba'a bewu e ne mfa'a ya si.

²⁵ Zambe a kpwé e ndaa bôt be ne mebune si, v'a yemete jôme nkuse minga wo yiane bi.

²⁶ Zambe a yen asimesan e n'abé mbia jôm; ve mbamba *minkobô mi ne *mfuban.

²⁷ Nyô a n'ôzañe ya bi ma'an me ne te yian, a ndeñele *nda jé émien, ve nyô a vini biboteze a ye nyiñ.

²⁸ Nleme zôsôa môt wo fas mfa'a ya yalan, v'anyu bebo *abé da sôé mbia bifia.

²⁹ Zambe a ne bebo *abé ôyap, ve a wô'ô meye'elane bezôsôô be bôt.

³⁰ Asu e ne memuñ da ve mevak, a mbamba foé a ve ngule nyô.

³¹ Môt ase melo mé ma vô'ôlô *melep ma kee môt ényiñ, a ye tab'ézezañe mimfefek.

³² Nyô ase a sase melep a biasé ényiñe jé, ve nyô a vô'ôlô *melep a bi fek.

³³ Nkoone Zambe woñ wo ye'ele fek, a duma da tôñe nsuubane si mvus.