MINKANA 14 - Kalate Zambe Nnomo a Mfefe Mfefé Nkôñelan

¹ E minga a dañe fek a lôñe *nda bôte jé, v'akute minga da bu'u je a mo mé mebien.

² Nyô a wulu e *zôsôô été a ko Zambe woñ, ve nyô a wulu mezen me n'ékotekot a biasé Zambe.

³ Anyu nsusu'u môt e bili ôlé asu mebune mé, ve biyaé mimfefe'e mi bôt bia ye kamane mie.

⁴ Eyoñe beyôm benyak be ntoo momo, éwolo ba di été é n'ékôkoé, abime ngule nya'a é bili, nde da ve abui akum.

⁵ Ngaa a ne *zôsôô a ne teke laa minsos. V'ékotekote ngaa ja kobô medu'an.

⁶ Nkpwe'ele bôt a jeñe fek, ve teke yene je, ve ñyemane mam ô ne tyi'ibi e be nyô a n'atyeñ.

⁷ Tebe'e nsusu'u ôyap, amu ô nji yene ñyemane mam e biyaé bié.

⁸ Fe'e ya môt a ne ntyee é ne na a wôk ane zene jé é né. Ve mvô é ne jôme mekut a bôt be ne *te fek.

⁹ Mekuk ma bisaé metuna'a ya mmeman *abé, ve bôt be ne *zôsôô ba yene *mvam.

¹⁰ Nlem môt étam ñwô wo yem ôlun ô bili, a môte mfe a se nguleya kabane meva'a mé.

¹¹ Nda bebo *abé ja ye tyamban, ve *nda bôt be ne *zôsôô ja ye ke k'ôsu.

¹² Môt a ne yene *zen éziñe mvaé atata'a, v'asu'ulan y'été é n'awu.

¹³ Nlem ô ne tat e vioé été, wôna amané mevak me ne su'ulan ôlun.

¹⁴ Môt a kobeya *zen a ye jaé a mbia mimboon mié émien, ve mbamba môte ki a mbamba mimboone mié.

¹⁵ Môt a ne te yeme fas a buni jam ese ba jô, ve ntyele môt wo yemelane mendaa mebo mé.

¹⁶ Mfefe'e môt wo ko *abé woñ ve sa'ale de, v'akute môt da dumban njalan a ndi nleme éziñ.

¹⁷ Nyô a ji'a yaa a bo mbia be mam, nyô a bili mefe'e me mvô a bo émien mbia jôm.

¹⁸ Bôt be ne te yeme fas be bili mboon akut ane ma'an, ve ba ba yeme yen ôyap ñyemane mam ô ne ma'ane map.

¹⁹ Mbia be bôt ba ye silibane si e mise me mbamba be bôt, avale te fe bebo *abé ba ye bo e mimbé bezôsôô be bôt.

²⁰ Ja'ane môt a too *nzôzoé bebé a vini wô, Ve nkukum ô bili bemvôé abui!

²¹ Nyô a biasé môte mbok a bo *abé, ve nyô a ko bingôngole bi bôt éngôngo a bili ébotan.

²² Ye ba ba bôndé mefe'e ya bo *abé be nji kop' Ve ba ba bôndé fe'e ya bo mvaé, bebela a nye'an bi ne be be.

²³ Esaé ése é bili mfi, ve zezé nkobô ja su'ulane soo zaé;

²⁴ ma'ane mimfefek me ne akume dap, v'akute mboone mekut e ne akute dap.

²⁵ Ngaa a kobô bebela a nyii minsisim, ve nyô a vebe minsos, ékotekot é bili nye.

²⁶ Môt a ko Zambe woñ a bili ngule ndi *nlem, a e bone bé be bili vôme ya sobô e fefele jé.

²⁷ Nkoone Zambe woñ ô n'anjeñ y'ényiñ mfa'a ya sa'ale melam y'awu.

²⁸ Eyoñ bôt be n'abui nalé a ve njô bôte duma; v'éyoñe tañe bôt ja sise si njô bôt a ye kui azoé.

²⁹ Nyô a n'ôte'ete'e ya yaa a bili abui atyeñ, ve nyô a n'avôle ya yaa a kulan asu'u dé.

³⁰ Nlem ô ne nje'ebane si ô n'ényiñe ya nyôle môt, v'éviele é ne ôkon wo di bives;

³¹ nyô a fite *nzôzoé a biasé nté wé; ve nyô a mvaman éngôngole môt a semene je.

³² Mbia mefe'e mé mebien ma ye kpwé'e mbo *abé si, ve zôsôa môt a yene vôme ya sobô ja'ane awu dé été.

³³ Fek é bôô e nleme ntyetyeñe môt été, Ve ézezañe mekut ye ba ye fo'o yeme je'

³⁴ Zôsôô a lôñ ayoñe bôt, v'abé da ve *meyoñ me bôt ôson.

³⁵ Mbo ésaé a ne fek a yene *mvam be njô bôt, v'ayaa njô bôt da ye bo asu ba ba bo mam me n'ôson.