MINKANA 13 - Kalate Zambe Nnomo a Mfefe Mfefé Nkôñelan

¹ Mfefe'e mon wo wô'ô ñye'elan ésaa, ve môt ane mbia anyu a ne te kañese *melep.

² Mbamba be bôt ba ye nyoñe ma'ane ya nkobô wop, ve jam bekoñe bôt ba yene mvaé e ne mboon évô.

³ Nyô a kale anyu dé a nyii ényiñ jé, ve nyô a kui biyaé bié ne ngeññ, a mate mbile ya jañele émien.

⁴ Nleme nleles ô bili minkômban émien a se nguleya jalé; ve nleme ya bôt ba saé abui wo ye bu'uban.

⁵ Zôsôa môt a vini minsos, ve mbia môt a ve émien ôson a ôsame.

⁶ Zôsôô a kale nyô zene jé é ne *mvo'é, ve *abé ki da dume mbo mam e si.

⁷ Bôt abui ba du'u bebiene na be ne kum, ve te bi jôm. Befe ba simesane na be n'azoé, ve ba bi akum abui.

⁸ Nkukum wo yiane belane moné wé na a kaman ényiñe jé, ve teke môt a ko *nzôzoé woñ.

⁹ Bezôsôô be bôt be ne an'éfufup ja faé abui, ve bebo *abé be ne ane lambe a dim.

¹⁰ Bôt ba ben e môt ase a ne mebun, ve ba ba kañese *melep ba liti na be ne fek.

¹¹ Akume môt a bi mbia mbian da nyolan, ve di môt a kôan ôte'etek da tabe a bo abui.

¹² Ndi *nlem ba buk ja bo nleme na ô kon, ve nkômban wo tôéban ô ne élé ja ve ényiñ.

¹³ Nyô a biasé meleb a ne njañan, ve nyô a ba'ale abendé a ye nyoñe ma'an.

¹⁴ Nye'elane mfefe'e môt ô n'anjeñe y'ényiñ, mfa'a ya sa'ale melam m'awu.

¹⁵ Atyeñ ya wô'ô mam da soo ésemen, ve ba be nji be bo ya buni ba wulu e zene ja dutu njañan.

¹⁶ Môt ase a ne fek a taté fas te na a bo jam éziñ, v'akut da liti asu'u dé éngengeñ.

¹⁷ Nkatefoé a ne mbo *abé a ku nju'u été, ve nkatefoé a ne *zôsôô a soo *mvo'é.

¹⁸ Nyô ase a bene nye'elan, azoé a ébiasé bia ye tôbane nye, ve ba ye se'e nyô a semé *melep.

¹⁹ Nkômban wo tôéban wo soo *mvo'é e *nlem, ve mekut ma yene nsa'alan *abé mbia jôm.

²⁰ Nyô a wulu a mimfefek a ye bo fek, ve nyô a wulu a mekut a ye tôban *abé.

²¹ Njuk wo tôñe bebo *abé, v'ébotan é ne ma'ane bezôsôô be bôt.

²² Mbamba môt a kalane bendaé élik, v'akume mbo *abé e ne ma'an asu zôsôa môt.

²³ Afub e ne nlian asu bingôngole bi bôt, da kuli abui bidi, ve môt éziñ a jañ amu ékotekote ntyi'ane mejô.

²⁴ Nyô a nji kômbô belane nkasa, a vini mone wé, ve nyô a belane wô, a kômbô telé nye e mbamba *zen.

²⁵ Zôsôa môt a di akekui zaé jé ja man, v'abume bebo *abé da wô'ô zaé éyoñ ése.