MINKANA 12 - Kalate Zambe Nnomo a Mfefe Mfefé Nkôñelan

¹ Nyô *a nye'e melep *a nye'e ñyemane mam. Ve nyô a vini *melep a ne tit.

² Mbamba môt a yene mvaé be Zambe ve Zambe a ve môt a bili mbia b'asimesane mekua,

³ mboon *abé ô ne te bo môte na a bo môt, ve vôme bezôsôô be bôt be beme a ye bo te fô'ôsan.

⁴ Mbamba minga a ne ava'a nnôme wé, ve nyô a ve nnôm ôsone nyô a ne ane ôkon wo di nye bives.

⁵ Asimesane mbamba be bôt e ne ve *zôsôô, mboone mbia be bôte ki njalan a mvô.

⁶ Mejô ma kui bebo *abé menyu me ne melam ma kuli metyi, v'anyu bezôsôô be bôt da nyii be.

⁷ Bebo *abé ba kpwébane si a jañ, ve ndaa bezôsôô be bôt ja li'i é tele.

⁸ Ba se'e môt a bili mbamba ñwô'ane mam, ve ba biasé nyô *nlem ô n'ékotekot.

⁹ A ne mvaé ya biaséban ô bili mbo ésaé, a dañe na ô nyoñe duma jôme ya di momo *nda.

¹⁰ Mbamba môt a mvaman ja'ana biyeme bié, ve mebume bebo *abé me ne njet.

¹¹ Môt a bé bidi e si jé a ye bi bidi abui, ve nyô a tôñesane mam me ne te e mfi a ne te ke fek.

¹² Mbia môt a nyamete mvaé bikotekot bi bôt, ve tine bezôsôô be bôt ja wume bibuma.

¹³ Abé ya biyaé e bili mbia ôlam, ve *zôsôô môt a ne nguleya kôlô nju'u été.

¹⁴ Bibuma y'anyu bia jalé môt ase a mefok, a môt ase a nyoñ avale mboone ya mo mé ô né!

¹⁵ Zen akute môt é ne *mvo'é e mise mé, ve nyô a nyoñe *melep a ne fek.

¹⁶ Akute môt da ji'a kulan ayaa dé, ve nyô a solé *abé ba te bo nye a ne ntyee.

¹⁷ Eyoñ wo kobô bebela, *zôsôô le wo liti, ve minsos mia kee môt ékotekot été.

¹⁸ Bifia biziñ bi ne yené éveves, ve bi bala'an ane nkpwaté mekôn, v'ôyeme mimfefe'e mi bôt wo soo *mvo'é.

¹⁹ Ôyem ô ne bebela wo kobô bebela éyoñ ése, ve wu ô n'ékotekot wo tyendé ane nkabeke dis.

²⁰ Mvô é too e nleme ya ba ba bôndé *abé, ve mevak me n'asu ba ba ve meleb ma soo *mvo'é.

²¹ Te k'ébubua éziñ ja kui be zôsôa môt, ve bebo *abé be ne njalan a minjuk.

²² Biyaé bia kobô minsos bi ne mbia jôme be Zambe, v'a liti mvame jé e be ba ba bo ane a yene mvaé.

²³ Ntyele môt wo solé ñyemane wé, ve nleme mekut wo yôtane mboon akut,

²⁴ wo ya bôt ba fô'ôsan wo ye dañ, ve wo ô n'éles wo ye ke saé étibela'a.

²⁵ Biyebe ya nleme môt bia tya'a nye, ve mbamba éfia a ve nye mevak.

²⁶ Zôsôa môt a ne nliti zene ya nyô baa nye ba wulu, ve zene bebo *abé ja kee be mfa'a mfe.

²⁷ Môt a ne nleles a ne te bele tite jé, v'édima jam mfa'a môt é ne na a fô'ôsan.

²⁸ Enyiñ é ne e zôsôa *zen été, a *zen éte é ne nyô é nji kee môt awu.