MINKANA 11 - Kalate Zambe Nnomo a Mfefe Mfefé Nkôñelan

¹ Ekotekote kop é ne mbia jôme be Zambe, v'atyi kop e ne *zôsôô a yene de mvaé.

² Ebiasé ja so éyoñe mebune me né, ve bôte ba suu bebiene si baa be fek be ne nsamba wua.

³ Mvo'é ya bezôsôô be bôt ja liti be *zen, v'ékotekote ya bejoñôlô bôt ja ye jiane be.

⁴ Abui akum e ne te volô jôm e *môs ayaa, ve zôsôa mboon a nyii môt awu.

⁵ Zôsôô ya môt a ne nya mvo'é a bo zene jé *zôsôô, v'abé mbia môt da kpwéé nye.

⁶ Zôsôô ya mbamba be bôt a nyii be, ve bekoñe bôt ba bili ôlam amu ôzañe wobe ya kômbô bo *abé.

⁷ Eyoñe mbia môt a wu, baa ndi nleme jé ba wu éyoñe jia a ngul a too a buni'i ja jañ;

⁸ zôsôa môt a ye nyiiban ôlune wé été ve mbia môt a ye nyoñ éto ôlune jé;

⁹ mbia môt a kômbô jiane môte mbo ke a mejô y'anyu dé, ve fe'e ya bezôsôô be bôt ja nyii be.

¹⁰ Eyoñe mbamba be bôt be bili mvom, tison ése ja fôn, éyoñe mbia be bôt ba wu, bôt ba bete metyiñe mevak.

¹¹ Ebotane bezôsôô be bôt ja bete tisone yôp; ve nkobô wo so anyu bebo abé wo kpwé tison.

¹² Nyô a biasé môte mbok a nji bi fek, ve môt a yeme wô'ô mam a tab'évô.

¹³ Nyô a miase mfuk a kulane minsolan mi mam, ve nyô a bili nsisime nye'an a solé mie.

¹⁴ Eyoñe mbamba miñye'elan mi ne momo ayoñ da ku; ve nyian wo so éyoñ abui beve *melep be né.

¹⁵ Nyô a kañese ya'ane mvôla nneñ a ye jô bane jame te ve nyô a sa'ale ka'a émiene mimbe'e a ye tabe te jam da tyelé nye nleme yôp.

¹⁶ Minga a n'abeñ a bili abui duma, a e bôt be n'évô ba nyoñ abui akum.

¹⁷ Môt a ne akap a bo nsisime wé mvaé; ve njenjet wo ndeñele minsône mié émien;

¹⁸ mbo *abé a bi ma'an ma du'u nye ve môt a bé *zôsôô a bili benya ma'an.

¹⁹ Ajô te *zôsôô a soo ényiñ, ve nyô a tôñ *abé a ye su'ulan awu.

²⁰ Bôt be bili minlem mi n'ékotekot be ne mbia jôme be Zambe. Ve mvame jé é ne asu ba mezene map me ne *mfuban.

²¹ Bebela a ne na mbia môt a se nguleya bo te tôbane melep; ve mvoñe bezôsôô be bôt ja ye nyiiban.

²² Eyoñe ntui ngôé ô be'e élondo jame te da funane minga a n'abeñ ve fe'e momo be nye.

²³ Jame bezôsôô be bôt ba kômbô e ne na mvo'é; ve jame bebo *abé be ne tabe de ndi e ne na ayaa,

²⁴ môt a kab akume dé a ye dañe bo kum; ve nyô a dañe bo ôkôlôt a bo ve wulan.

²⁵ Nyô a miase bibotan a ye bi biôm ne zuk; a nyô a volô bôt ba ye fe volô nye.

²⁶ Nyô a bene kuane nlisi, bôt ba yo'é nye, ve bibotan bi ne e nlô ya môt a kuane nye.

²⁷ Nge minsôñane miôé mi ne *mvo'é ba ye semé wo ve môt a jeñ *abé, *abé da ye kui be nye.

²⁸ Nyô a tabe akume dé ndi a ye ku, ve bezôsôô be bôt ba ye yaé ane akaé.

²⁹ Nyô a ndeñe mfuk e *nda bôte jé été a ye nyoñ évuñulu ane ngap, a akute môt da ye bo ôlo ya môt a bili *nlem ô ne fek.

³⁰ Ebuma ya môt a ne zôsôô é ne élé ja ve ényiñ a mfefe'e môt wo dutu minlem mi bôt.

³¹ Nge mbamba môt a nyoñe ma'ane mé e *si nyô, kô fé mbia môt a mbo *abé!