MINKANA 10 - Kalate Zambe Nnomo a Mfefe Mfefé Nkôñelan

Minkana mia ye'ele ntaban y'ényiñ

¹ Minkana mi Solômon. Mfefe'e mon wo ve ésaa wé mevak ve mon a ne *te fek a ve nyia wé ôlune *nlem.

² Akum da so mbia mezen e ne teke mfi ve zôsôa mboone mam a nyii mfa'a y'awu.

³ Zambe a ne teke jô'é mbamba môte na a wu zaé, ve a vini mbia ndiane bebo *abé.

⁴ Nyô a n'éles mboon ésaé azoé da ye kui be nye, ve bôt ba saé abui ba ye bo minkukum.

⁵ Môt a kôane bidi a ésep a ne mfefe'e mon, ve nyô *a ke ôyo éyoñe ya nkôane bidi a ne mon a ve bebiaé ôsone nyô.

⁶ Mbamba môt a nyoñe bibotan, ve mejô ma so anyu mbo abé me ne njalan a nsisime y'évô.

⁷ Nsimesane ba simesane mbamba môt ô n'ébotan, ve ba ji'a vuane mbo *abé.

⁸ Môt a bili *nlem ô ne nte'an a kañese melep ve nyô biyaé bié bia kobô nkobô akut a ke mbile ya jañele émien.

⁹ Môt a sa'ale mvô a ye wulu teke tyelé nleme yôp, ve nyô a wulu mezen me n'ékotekot ba ye bôôé nye kayale.

¹⁰ Nyô a solé bôte bevo'o bebela a bo be na be tôbane njuk; ve nyô a komekane be *mfuban été a ve be *mvo'é.

¹¹ Mejô ma so anyu zôsôa môt me ne anjeñ ya ényiñ ve mejô ma so anyu mbo *abé, ma solé *nsisim évô.

¹² Ziñ ja dutu mintañete ve nye'an wo buti minkobane mise;

¹³ fek é ne biyaé bi ñyeme mame yôp, ve mvuse môt a ne fe'e momo ja yange ve nkasa.

¹⁴ Mimfefe'e mi bôt mia jeñe ñyemane mam abim ese be ne nguleya bi, v'éyoñ akut da kobô, nzametan a nji ke bo ôyap.

¹⁵ Mvo'é ya minsôn ja ba'ale nkukum v'azoé da wôé éngôngole môt.

¹⁶ Ma'ane ya mbamba mboon me n'ényiñ v'abé da tindi ve na môt a bulu bulu bo abé;

¹⁷ môt ase a bo mewôk éyoñ ba lebe nye a ye nyiñ, ve nyô a ne te kañese mekua, njuk wo yange nye.

¹⁸ Nyô a solé ziñ a be'e biyaé bi n'ékotekot, a nyô a miase njoñ a ne *te fek.

¹⁹ Abui nkobô da dutu mboon *abé, ve nyô a bi biyaé bié ngbwak a ne nyô a yeme simesan.

²⁰ Ôyeme mbamba môt ô ne argent a ne ntoban, a nleme bebo *abé ô nji dañe bi kop.

²¹ Biyaé bi mbamba môt bia liti abui bôte *zen, ve mekute me bôt ma wu amu fe'e momo.

²² Ebotane Zambe nje ja ve môte kum, a a nji beté ôlun éziñ été yôp.

²³ Akute môt da yene mbia mboon ane bivôé avale môt a yeme fas a yene fek.

²⁴ Jame mbia môt *a ko woñ nde da kui be nye, a e jame mbamba be bôt ba kômbô Zambe a ve be de.

²⁵ Eyoñ ôlendé a lôt a wundi mbo *abé, ve *zôsôô môt a too jôm teke nye bo.

²⁶ Avale woon a ne sañ a bo mesôñ a ôtita wo bo mis, avale te nleles ô né e be ba ba lôme wô.

²⁷ Nkoone Zambe woñ wo limiti môt melu m'ényiñ, ve mimbu bebo *abé mia tyi'i étun.

²⁸ Ndi nleme mbamba be bôt ja su'ulane mevak, ve nyô bebo *abé ja ye su'ulane momo.

²⁹ Zambe a kamane bôt be ne *zôsôô, ve a jiane bebo *abé.

³⁰ Zôsôa môt a ye bo te fô'ôsane *môs éziñ, ve bebo *abé ba ye bo te tabe *si nyô.

³¹ Anyu zôsôa môt da kuli nkobô fek, v'ékotekot ôyem ja ye tyi'iban.

³² Biyaé bi zôsôa môt bia yem avale jam bi ne ngule ya jô, v'anyu mbia be bôt da kobô ve mam ma balan.