MINKANA 1 - Kalate Zambe Nnomo a Mfefe Mfefé Nkôñelan

Kalate minkana amu jé'

¹ Minkana mi Solômon, e mone David, njô bôte ya Israél,

² mfa'a ya ve fek a mbamba ñye'elan mfa'a ya volô ñwô'ane ya *zôsôô ntyi'ane mejô a bili ôsimesan ô n'édok a mvaé

³ mfa'a ya ye'ele ane môt a ne nyiñ atyeñ, ane a ne bo *zôsôô mfa'a ya ntaban, ntyi'ane mejô a mba'alane metiñ.

⁴ Mfa'a ya ve bôt be ngenane te yem ényiñ ntye a ve ésoé ndôman ñyeman a nsisime ya yeme fas.

⁵ mfefe'e môt wo ye vô'ôlô a kô'ôlane ñyemane wé a ntyetyeñ wo ye bi ntabane ntye.

⁶ A mfa'a ya yeme *nkana a atinane y'été, mejô mimfefe'e beyeme mam a mesoé me ba.

⁷ Nkoone Zambe woñ ñwô ô ne tin ya ñyemane mam. Ve mekute me bôt ma biasé fek a ñye'elan.

Melep asu bisoé bendôman

⁸ A mone wom, vô'ôlô'ô meleb m'ésoo a te wua ñye'elane nyua fé.

⁹ Amu bia ye bo nyanga ébôbot e nlô wôé, a minsanga asu tyiñe jôé.

¹⁰ A mone wom, nge bebo *abé ba kômbô wone wo, te kañese.

¹¹ Nge ba jô na: Za'a bi ke, bi mombô asoé a kulu metyi za'ane bi lame môt a ne te bijô melam te k'étom,

¹² za'a bi mine be bevevee avale ane vôme ya miñwuan a bo, bi mine be mingum ane bôt ba sis ébé si.

¹³ Bia ye koone biôm bi n'édima mevale mese, bia ye jalé menda mangan a biôme ya nsa.

¹⁴ Wo ye bi ngabe jôé bia be mia amu bia bese bia ye bi mfe'e moné wua,

¹⁵ a mone wom, te ke e nsamba wop, sa'ale'e telé mebo môé e mezene ba wulu.

¹⁶ Amu mebo mab ma mate mfa'a ya bo *abé, be n'avôle ya kulu metyi.

¹⁷ E ne zezé ya yaa avot anon ese e lôô!

¹⁸ Ve be ba mombô ve metyi mabe mebien a ba kômbô jian ve binyiñe biabe bibien.

¹⁹ Nalé ate ényiñe ya bôt ba wôlé bôte biôm ja su'ulan wo nyoñ ényiñe ya bôt be bili wô.

Fek ja bete tyiñ

²⁰ Fek ja ke ja yôtan e minjoñ minjoñ, ja bete *tyiñ e mevôm me ne ndam.

²¹ Ja loon e vôme minjoñ mi ne zô'é abui, ja kobô e mame mé anyiine ya mimbé a e tison été!

²² A mia mekut mia ye nye'e mboon akut a kui éyoñ évé' A bekpwe'ele bôt ba ye yene mvaé ya kpwe'ele bôt a kui éyoñ évé' Nalé fe bôte ya te fek ba ye vini ñyemane mam a kui éyoñ évé'

²³ Nge mia kôñelan a wô'ô melebe mam, éyoñe te ma ye sôé mia nsisime wom, ma ye bo mia na mi yeme mejô mam.

²⁴ V'amu na me nga loon, mi ve bo ntip, me nga same wo wom, teke môt a kee dis,

²⁵ amu mi nga bene melebe mam mese a mi nji ke kañese bijô biam,

²⁶ ma fe ma ye woé éyoñ mia ye tebe nju'u été, ma ye bo teke bisi éyoñe beta woñ a ye kui be mia,

²⁷ éyoñe beta woñ a ye zu be mia ane nkulu, éyoñe bidim bia ye zu be mia ane ôlende, éyoñe biyebe a ôlun bia ye zu be mia

²⁸ ba ye loone ma ve ma ye bo te yalan, ba ye jeñe ma ve ba ye bo te yene ma.

²⁹ Amu be nga vini ñyemane mam a bo teke tobe e nkoone Nti woñ.

³⁰ Amu be nji ke kômbô melebe mam a vini mveane bijô wom;

³¹ ajô te ba ye di ébuma ya mboone wop a mebum ma ye kui be *nlem a mefe'e mabe mebien,

³² amu ñyalane fé ya mekut ô wôéya be a ntabane njeme ya bôt be ne fe'e momo wo ye jiane be.

³³ Ve nyô ase a vô'ôlô ma a ye tabe *nda jé jôme teke bo nye.