MIKÉ 7 - Kalate Zambe Nnomo a Mfefe Mfefé Nkôñelan

Nkulu mejô Miké a Yôn

¹ Ngo'o ma! Me ntoo ane bekôane bidi ya ésep, ane mekolo'o bibuma bi ndik, éyoñe nya nkolane bibuma a maneya. Ve tek'ésañe ya di, teke ébuma jia ya bi bia ji'a tôlôbô bite, mbie ma dañe nye'e!

² Môt *a nye'e Zambe a ne momo e *si nyô éyoñe ji, zôsôa môt a jemban e bôt été. Bese be n'asoé asu ya kuli metyi; môt ase a titane monyañ a avot.

³ Ba belane mo map asu ya bo *abé, mvaé njô bôt a bo é ne éyoñ a yemete minkômbane mié, *ntyi'i mejô a sili tañe fe abet, beta môt a kobô asu ya volô ôzañ moné wé.

⁴ Nyô a dañe mbamba môt e be be a ne aval'ane nsinik, zôsôa môt a dañ *abé ki ane nka'alé biyo. E *môs wo zu nyoñe melep ô kpwaneya! Bemombô bôé, bekulu mejô be nga kate foé ajô *môs ôte, éyoñe ji bese be ne fe'e ne vema.

⁵ Te bunane wua ya bôt be too mia bebé, nge tabe ndi a mvôé éziñ. Ôsu ya minga a bôô wo mebo, tabe'e ntyel a mejô ma so wo anyu.

⁶ Amu monafam a taa ésaa wé, monaminga a sengane nyia wé mbom ki wo sengane ntyi. Besiñ be môt be ne bôte ya *nda jé émien.

⁷ Ve ma ma kôñelan mfa'a Nti a né, me too ndi e be Zambe a nyii ma; e Zambe wom a ye wô'ô ma.

Ndi * nlem a meye'elan

⁸ A nsiñe wom, te vak amu ajô dam! Amu nge ma ku, me beta fe tebe tetele. Nge me too e dibi été, Nti a n'éfufube jam.

⁹ Ma ye jibi ayaa Nti amu me nga bo nye *abé, akekui a ye suñ ajô dam a tyi'i ma ajô *zôsôô. A ye zuu ma vôm éfufub é né, a ma ye nye'e me yenek *zôsôô wé.

¹⁰ Nsiñe minga wom a ye yene jame te, ôson wo ye jaé nye nyô. A mbe a sili'i na: Nti, e Zambe wôé, a ne vé' Mise mam ma ye fombô ve nye; éyoñe ji ba tibi nye mebo si ane mboto'o ya zene yôp.

¹¹ E *môs ba ye beta lôñe mimfine miôé, *môs ôte ba ye sulu minné miôé.

¹² Môs ôte bôt ba ye zu be wo be so'o Asiri a bitisone y'Ejipte, ataté Ejipte a kui ôsôé, ataté mañ ma a kui ma mevok, ataté nkôle wu a kui wu ôvok

¹³ si ja ye bo bilik amu bôt be too été, amu ébuma ya mimboone miap.

¹⁴ Va'a bôte bôé bidi a ntume wôé, mbame biyem ô ne ngabe jôé ñwô ô too étam afan été ézezañe Karmel! Be ja'ak e Basañ a e Galad aval'ane melu mvus.

¹⁵ Aval'ane melu ô nga kôlô si y'Ejipte, ma ye liti nye bitua bi mam.

¹⁶ Meyoñ me bôt ma ye yene de a bo fe'e ne vema, akôsa bo ngule jap ése; ma ye buti wo anyu, melo map ma ye bo ndok.

¹⁷ Ba ye nyiane mbuluk ane nyo, ane betite ya si ba nyi'itan; ba ye vame mesoé map a woñ ôse, a zu be Nti, e Zambe wongan; ba ye ko woñ, ba ye ko wo woñ;

¹⁸ Za a ne Zambe ane wo, nyô *a jamé ékop a lôte mbia mboon amu a kamane *mebuka'a ya ngabe jôé' A ne te ba'ale ayaa nnôm éto, amu *a nye'e mvam.

¹⁹ A ye fe ko bia éngôngo, a ye futi bikobe biangan e mebo mangane si; wo ye wua *abé dap édo'o mañ été,

²⁰ wo ye liti Yakob nye'ane wôé ô ne te tyendé, a wo ye liti Abraham mvam aval ô nga kane b'ésaa bangan ngana melu mvus.