MIKÉ 4 - Kalate Zambe Nnomo a Mfefe Mfefé Nkôñelan

¹ A ye bo amané ya biyoñe na: Nkôle ya Nda Nti, wo ye tebe abôbône minkô, a wo ye betebane yôp a dañe minkôle mivok a *meyoñ me bôt ma ye tinekane ke wé.

² Meyoñ ya si nyô ma ye ke wé abui abui a jô na: Za'ane bi bet nkôle Nti, Nda Zambe Yakob, nalé ate a ye ye'ele bia mezene mé, a éyoñe te bia ye wulu mezen a liti bia. Amu nne metiñ ma so Sioñ, a nne ajô Nti da so Yérusalém.

³ A ye bo ntyi'i mejô e zañ ézu'u *meyoñ me bôt, a Ntyi'i mejô ya biwôlô *meyoñ me n'ôyap; a ye lui beta bibak a minkpwaté mekône miap, a lui fe atyeñ ya sebe bilé a mekoñe map; ayoñ da ye bo te bete nkpwaté mekôn a wosan ayoñ avok, a bôt ba ye bo te beta yé'é mewosan.

⁴ Môt ase a ye tabe afube mindi'i dé si, a e figié wé si, a teke môt a ye ndeñele be; amu anyu Nti ya minsamba mewosan e kobeya.

⁵ Eyoñe *meyoñ me bôt ma wulu, ayoñ ese a jôé e *zambe wé, bia bia wulu a jôé Nti, e Zambe wongan, nnôm éto a nnôm éto.

Nti, njô bôte ya Yérusalém

⁶ Môs wo zu, nalé Nti a jô, ma ye nyoñe nyô a feñke, ma ye bulane soo nyô be nga titan, nyô me nga bo *abé.

⁷ Ma ye bo *mebuka'a me so'ok e be nyô a feñke. Ma ye bo ayoñe bôt e ne ngu e so'ok e be nyô me nga telé fefe; a Nti a ye bo njô bôte wop e nkôle sioñe yôp, ataté éyoñe te a kui nnôm éto.

⁸ A wo, nkôle Yérusalém, wo wo fombô bôt ane ôzomezome *nda bemombô, ana'ana, wo ye beta bi ngul éjôé jôé, aval'ane melu mvus. Yérusalém a ye beta bo nlô tisone ya Yuda.

Meve'ele a nkôtane Yérusalém

⁹ Amu jé wo yône tyiñe yôp éyoñe ji' Ye njô bôt a nji bo be wo' Mintaé mia bi wo aya ane minga a kô'ôlô mie' Y'amu mbôndé mefe'e wôé a wuya'

¹⁰ A ngone Sioñ wô'ô mintaé a tat ane minga a kô'ôlô mie: Amu wo ye kui e tison atan éyoñe ji, a wo ye bo étaba'a jôé e mefup, wo ye ke a kui Babilôn, nne ñhe wo ye kôtébane wé, e mo be besiñe bôé.

¹¹ Eyoñe ji jama *meyoñ me bôt a sulaneya a wosane wo; a jô na: A ne e mvin été, mise mangan me lôô Sioñ!

¹² Ve jama *meyoñ ate a ne teke yem asimesane Nti, a ne teke yeme mintyi'ane mié, a ne teke yeme na a maneya sulane nye ane mimbom mi ne nka'an afup été.

¹³ Kôlô'ô si, a ngone Sioñ ô tibi mefese me mvoñ! Ma ye kôme wo nla'a étyé, a ma ye kôme wo bibo'os bi mvot, wo ye ko'o jama *meyoñ me bôt, mefo'o map, wo ye ve me Nti, akume dap, wo ye ve de Nti ya si ése.

¹⁴ A ngone minsamba mewosan éyoñe ji sula'ane minsamba miôé! Be diliya bia a bita; ba bibi *ntyi'i mejô y'Israél amañ a nkasa.