MIKÉ 3 - Kalate Zambe Nnomo a Mfefe Mfefé Nkôñelan

Bivet bia yiane tabe ntye

¹ Ma kobô mia a bete b'ôsu ya mvoñ bôte Yakob, bivete y'ayoñ Israél: ye ésaé jenan é nji bo na mi yeme nya ntyi'ane mejôô'

² Ve mia vini jam e ne mvaé a mia nye'e di e ne *abé, mia wôlé bôte biôm a kui ékôp a minsôn bia solé be bives.

³ Ya! Ba di minsôn mi bôte ya ayoñe dam, ba soé be ékôp a bu'u be bives, ba ba be mefus ane nge be ne tit ba futi viek.

⁴ Ajô te éyoñ ba ye ye'elane Nti na a volô be, Nti a ye bo te yalane be, a ye vaa be mise nyô amu *abé be nga bo.

Bekulu mejô ba du'u bôt

⁵ Avale di nde Nti a jô bekulu mejô ba du'u bôte bam: mbe ba kate foé *mvo'é éyoñe mesôñe map me bili jôme ya di, a wosan e môt ase a nji ve be jôm éziñ.

⁶ Amu mboone te, ñyemane mam ô maneya! Alu da ye vine be mia, mia bekulu mejô! Minkulane mejô mi maneya! Dibi da ye bômane mia ane éyoñe jôp é dimeya, mia ye bo te beta yene jôm!

⁷ Beyene mam ba ye bili ôsame, e bôt ba bi'i mame fe ba ye ve a ôson, bese ba ye buti mimvean amu *zambe a ye bo te yalane be.

⁸ Ve ma me ne njalan a ngu, amu Nsisime Zambe; me bili nya ntyi'ane mejô, a me ne ayo'o ya liti Yakob mbia mboone wé, a liti fe Israél *abé dé.

Yérusalém a ye bo bilik

⁹ Vô'ôla'an ñhe jame di, a minlô mi bôte ya *nda Yakob, mia bejôô ya Nda Israél; mia mia ve nya ntyi'ane mejô a bo mbia jôm, a bulekane *zôsôô ase,

¹⁰ mia mia lôñe Siôn a nkulane metyi, a lôñe fe Yérusalém a mboone *nkpwala.

¹¹ Bivete bié bia tyi'i mejô amu éboteze, betuni bé ba ye'ele bôt amu tañ, bekulu mejô bé ba kulu mame ya akiti amu moné; a ba ye'ebe be Nti be jô'ô na: Ye Nti a nji bo e zañe jangan' Bidim bia ye bo te kui be bia.

¹² Ajô te nde ba ye tyee Sioñ, ane afube bidi a nde Yérusalém a ye bo avise *mekok, a nde nkôle ya Nda Zambe wo ye bo nkôl ô yianeya a afan.