MIKÉ 2 - Kalate Zambe Nnomo a Mfefe Mfefé Nkôñelan

E bôt ba belane ngule jap a dañe nné

¹ Bidim a bôt ba fase mam me n'ékotekot, a kômesane mboon abé éyoñe be bôô binoñe biap a alu! Eyoñe *môs ô kuiya, ba bo e jam ba te kômesan, nge be bili mezene ya bo de.

² Ba nyamete mefup, a nyoñe me a ngu, avale te fe menda, ba wôlé me; ba tibili bialébialé a *nda bôte jé, môt a ngab éli'i jé.

³ Ajô te Nti a jô avale di na: Tame yen, ma simesane bidim asu ayoñe bôte di; mia ye bo te kamane tyiñe jenan, a mia ye bo te wulu nlô ô tele, amu éyoñ é ne ji bidim.

⁴ Eyoñe te ba ye tote bifia ya éfuse jia ji, ba ye yia jia ñyône ji amu wo: Ba ye jô na: Bi maneya kui azoé, ayoñe dangan e maneya dimili mesi mé, e bôt ba titane bia e mefube mangan ba kabane me e zañe jap. Amu jé ba sôté bia mintui'

⁵ Ajô te teke môte ya be mia a ye bi ngabe ya mesi ayoñe bôte Nti da ye kap.

Bôt be nji kañese foé nkulu mejô

⁶ Bôt b'éziñ ba jô me na: Jôké'é kobô avale mame te, e ne asu'u ya yemete na: Ôson ô ne teke asa'ale!

⁷ Ye wo kañese nkobô te a Nda bôte Yakob' Ye Nti a wô'ô ji'a yaa avale te' Ye nne a zu a bo mam nalé? Ve yemane na mejô mam me ne mbamba mejô ve be bôt ba wulu ane da yian.

⁸ Ve Nti a jô mia na: Mi tebeya ane besiñe be bôte bam. Mia wôlé ngômesane ya yôp e be bôt ba so bita be kelek ôsu a ndi ése.

⁹ Mia titane binga y'ayoñe dam e menda map ba nye'e, mia vaa bone bap duma me nga ve be na: Be ne émbam nnôm éto.

¹⁰ Kôla'ane si mi ke! Amu si mi too nyô é nji bo sii awo'on; amu si éte é maneya bili mvin, ja ye soo mia mintaé, mintaé mia dañ anen.

¹¹ Jé é ne nalé na: Môt ve tebe, a nga kobô zesé mejô a laane minsose na: Ma kate mia na: Mia ye bi woon a bilam bi bili Alkol! Nkulu mejô minsos a yiane bôte bete nye le!

Mengaka'a me ne minsos

¹² E ne bebela na, ma ye kôane mia bese a mvoñe bôte Yakob! E ne bebela na: Ma ye sulane mia a *mebuka'a ya Israél! Ma ye sulane mia ane mintômba ya abemba, ane mbam biyem e vôme wo di; éduñ ja dañ môta binam ja ye bo.

¹³ E môt a yooé *zen a tele mia ôsu; mi kôtébaneya, mia dii *zen a ngu a mia kui atan. Nti, njô bôte wônan, nye a wulu mia.