METIAS 8 - Kalate Zambe Nnomo a Mfefe Mfefé Nkôñelan

Yésus a saé nzezam

¹ A siliki'i nkô, nde bizu'u bi bôt bi nga zu bia tôñe nye.

² E teme na, nzezam éziñ ve subu nye bebé, nkutane meboñe si asu dé nde a jô nye na: A Nti, nge wo kômbô, ô ne nguleya tune ma.

³ Ane Yésus a nga same wo, ve nambe nye a jô nye na: Ma kômbô nalé, bo'o ntunan! Eté été a nga tuneban mfa'a ya zame jé.

⁴ A Yésus a nga jô nye na: Te kate de môt éziñ, ve kele liti womien e be *ntuni a liti mveane Môze a nga bendé: jame te da ye bo be ngaa.

Mbunan évete bezimbi ntete wua

⁵ Yésus a nyi'in e Kapernawum, nde évete bezimbi ntete wua ja subu nye bebé a ye'elane nye na:

⁶ A Nti mbo ésaé wom a bôô si e *nda, nyôle ñyemelan a a wô'ô mintaé étua abui.

⁷ Yésus a nga sili nye na: Ma ma ye ke saé nye nga'

⁸ Ve évete bezimbi ntete wua é nga beta nyoñe nkobô na: A Nti, me nji bo nyô a yiane na ô nyiin andile dame si: jô'ô v'ajô a mbo ésaé wom a ye bo *mvo'é.

⁹ Avale ma fe me n'éjôé si a me bili bezimbi ba wô'ô ma; ma jô wua na: Kelek, nye ve ke, a mfe na: Za'ak, nye ve zu, a *ôlo wome na: Bo'o jame di, nye ve bo de.

¹⁰ Eyoñe Yésus a nga wô'ô ane a kobô nalé, a nga semé abui a jô bôte be nga tôñe nye na: Ma jô mia bebela na me nji yen avale mbunane di e be môt éziñe ya Israél.

¹¹ Ajô te ma jô mia na: Abui bôt da ye so jôbe da tôô a jôbe da dim, a nyoñe bito abô'ô bidi ba be Abraham, Izak a Yakob éjôé ya yôp,

¹² bemie éli'i y'éjôé ki ba ye wuaban e dibi e n'atan: e wé nye a ye bo miñyôn a nlatane mesôñ.

¹³ Wôna Yésus a nga jô évete bezimbi ntete wua na: Bula'ane *nda jôé! Avale wo te buni e bo'o be wo. A mbo ésaé a nga bo *mvo'é awolo te ebien.

Ntyi minga Pierre a bo mvo'é

¹⁴ Yésus a nyi'in e *nda Pierre, nde a yene ntyi minga wé a bôô si nyôl ayôñ.

¹⁵ Ane a nga nambe nye wo, ayôñ ve man; nde a nga kôlô si a taté na a belane nye.

Nsaane minkôkon a mvaane mimbia minsisim

¹⁶ Eyoñe ngô'é é nga kui, be nga zuu nye abui bôt é be'e mimbia minsisim; ane Yésus a nga titane mimbia minsisim a mejô ya anyu dé a saé fe minkôkone mise.

¹⁷ Nalé ate mejô Nkulu mejô Ezayi a nga jô ma ye tôébane na: A nga nyoñ biyeme biangan a be'e fe akone dangan.

¹⁸ Eyoñ a nga yene beta minkunda mi bôt mi bôma'ane nye, Yésus a nga bendé na be dañ ôsôé a ke e kindi'i fok.

¹⁹ Ane ñyeme bekalate éziñ a nga subu nye bebé a jô nye na: A nye'ele, ma ye tôñe wo e vôm ase wo ye ke.

²⁰ Yésus a nga yalane nye na: Minkemvak mi bili mefumba, anone ya yôbe ke e bili mumba'a, ve mona môte ke a nji bi vôme ya bôôé nlô.

²¹ Mfe ya beyé'é nye'e ki ve jô nye na: A Nti va'a me nkañesane ya taté ke jam ésaa wom.

²² Yésus nye nye na: Tôñe ma a li'ik mimbim mi jame mimbime miap.

Yésus a je'e nkulu

²³ Ane a nga dañ éfunga été a beyé'é bé be nga tôñe nye.

²⁴ Beta nkulu a nga vuñ e mañe yôp, éfunga é ye'e nyoñ a mintyôa. Ve nye a too ôyo.

²⁵ Nde beyé'é be nga subu nye bebé a vele nye be jô'ô na: A Nti, volô'ô bia! Bi nga jañ.

²⁶ Nde a jô be na: Amu jé mia ko woñ, a bôte be bili tyôtyoé mbunan? Ane a nga tebe tetele a bamé évuñulu a mañ, a beta évôvoé a nga yené.

²⁷ Bôt be nga kam a jô na: Nyôna a ne za ane ja'ana évuñulu a mañ bia wô'ô nye!

Bebe'e mimbia minsisim bebaé ya Gadara

²⁸ Eyoñ a kuiya mfa'a kindi'i fok, e sii bôte ya Gadar, nde bebe'e mimbia minsisim bebaé ba zu tôbane nye be so'o mesoñ, be too étua ayok avale ya na teke môt a mbe ngule ya lôte *zen éte.

²⁹ Nde ba taté na ba bete metyiñ be jô'ô na: Bia be wo bi ne za ajôô, a mona Zambe? Ye ô zuya va na ô ndeñele bia te na éyoñ é kpwaan'

³⁰ Ezu'u mbame bengôé é mbe be ôyap é ja'ak.

³¹ Nde mimbia minsisim mia ye'elane nye na: Nge wo wua bia atan, lôme bia e mbame bengôé.

³² Nye mie na: Kelan. Eyoñe mi kôlôya be bôte ba ane mi nga ke e be bengôé, a mbame bengôé ôse ô nga ke mbil ayo nkô a ke ku mañ vôm ate be nga wu e mendim.

³³ Ane bôt be mbe be ba'ale bengôé be nga tup a ke mfa'a ya tison; be nga kañete mam mese ajô bebe'e mimbia minsisim.

³⁴ Ane tison ése é nga me'é a ke tôbane Yésus, éyoñ be yeneya nye, be nga ye'elane nye na a kôlô mefôla map.