METIAS 7 - Kalate Zambe Nnomo a Mfefe Mfefé Nkôñelan

Taté'é vaa e mone jôm a ne wo dis

¹ Te tyi'ane bôte mejô, ndembene mia fe mia ye bo te tyi'ibane mejô;

² amu avale mia tyi'i bôte mejô nde ba ye tyi'i mia, a aval ôvek mia belane de nde ba ye belane de asu denan.

³ Amu jé wo fombô mone jôm a ne e dise monyoñ? Ve beta jôm a ne e dise dôé, wo te yene nye'

⁴ Nge na amu jé wo ke jô monyoñe na: Yange'e! Me vaa e mone jôme ya e dise dôé? Ve da ô lôô: beta jôm a ne wo dis!

⁵ A môta bebadu'u, taté'é vaa beta jôme ya dise dôé, mvus éte wo ye yeme vaa e mone jôm a ne e dise monyoñ.

Te veane bemvu a bengôé meko'o menan me ne édima

⁶ Te veane bemvu jôm é n'étyi; te wuane bengôé metabe menan, be za tibi me a mebo a na éyoñe be kôñelaneya éfase mi né be za nyabe mia.

Mi bo'o mi ye'ela'ane ésoo wônan a ne yôp

⁷ Sila'an, ba ye ve mia; jeñan, mia ye yen; kutane *mbé ba ye dii mia wô.

⁸ Amu môt ase a sili a nyoñ, nyô a jeñ a yen, a ba dii nyô ase a kute *mbé mbé.

⁹ Nge na, za ya be mia a ne bo na nge ndômane jé ja sili nye belet, a viane ve nye akok'

¹⁰ Nge na nge a sili kos, a viane ve nye nyo'

¹¹ Ajô te nge mia mi ne mbia be bôt, mia yeme ve bone benane mbamba be biôm, abim avé ésoo wônan ya yôp a ye ve bôte ba sili nye mbamba be mam.

Môte mbok ane womien

¹² Ajô te, mam mese mia yi na bôte be bo mia, miabebien bo'one me asu dap: Metiñ me Zambe a bekulu mejô mbie le.

Mezene mebaé

¹³ Nyi'ane *mbé ô ne ôfanefan, *mbé ô ne anen a e zene ja ke njañ é ne ndam, a ba ba tyii été be ne ézuk;

¹⁴ v'aval ôfanefane *mbé ô né a avale tyôtyoé zene ja kui ényiñ é né a ba ba yene je teke mfañ abui.

Aval élé, avale bibuma

¹⁵ Mi tabe'e bekulu mejô be ne minsos ntyee, mbe ba zu be mia be be'e mengômesan ane mintômba, ve minlem été be ne beze ba bi bôt.

¹⁶ Mia ye yemelane be a bibuma biap. Ye ba kolé bibuma bi woon ésaé biyo, nge bibuma bi figié akoñ ngbwele'

¹⁷ Nalé a ne na mbamba élé ase a wume mbamba bibuma, ve mbia élé ase ki a wume mbia bibuma.

¹⁸ Mbamba élé a se nguleya be'e mbia bibuma nge mbia élé ki be'e mbamba bibuma.

¹⁹ Elé ése é nji wume mbamba bibuma, ba ye ba'é je a wua je e nduan.

²⁰ Ajô te ñhe mia ye yemelane be a bibuma biap.

Sake ve na: A Nti, a Nti!

²¹ Sake môt ase a jô me na: A Nti, a Nti, a ye nyiin éjôé ya yôp, ve nyô a bo nkômban ésaa wom a ne yôp.

²² Ezu'u bôt ja ye jô ma *môs ôte na: A Nti, a Nti! Ngaa bi nga kulu mejô a jôé dôé? Ngaa bi nga titane mbia minsisim a jôé dôé? Ngaa bi nga bo bitua bi mam a jôé dôé'

²³ Wôna ma ye jô be na: Me nji tame yeme mia; kôla'an ma mis, mia mia bo mbia be mam!

Nda ya akôme yôp

²⁴ Ajô te môt ase a wô'ô mejô me ndôme mane jô a bo me, be ne funane nye mfefe'e môt ñwô ô nga lôñe *nda jé akôme yôp.

²⁵ Mveñ é nga noñ, ndulu mendim a nga so, bivuñulu bi nga vuñ; bi nga jimbi *nda éte ve é nji ke ku amu mbôka'a wé ô mbe akôme yôp.

²⁶ A môt ase a wô'ô mejô me ndôme jô ve te bo me, be ne funane nye akute môt nde é nga lôñe *nda jé e nsele'e yôp.

²⁷ Mveñ é nga noñ ndulu mendim a nga so, bivuñulu bi nga vuñ; bi nga zu jimbi *nda éte, nde é nga ku si, a ntyambane wé ô mbe anen.

Yésus a ne njôô

²⁸ Nde da zu kui na éyoñe Yésus a maneya ve miñye'elane mite, bizu'u bi bôt bi nga kame ñye'elane wé;

²⁹ amu a mbe a ye'ele'e be ane môt a bili ngule njôan saa ke ane *beyeme bekalate bap.