METIAS 5 - Kalate Zambe Nnomo a Mfefe Mfefé Nkôñelan

Mvom a be

¹ Ayene a nga yene bizu'u bi bôt, nde a nga bete nkôle yôp, a tabe si; beyé'é bé be mane nye subu bebé.

² Ane a nga kui anyu dé a jô be na:

³ Mvom a bôt be ne azoé e minsisime biab été, amu éjôé ya yôp é ne énjap.

⁴ Mvom a bôte ba wô'ô ôlun, amu ba ye volebane minlem.

⁵ Mvom a bôt be ne bivôvoé minlem amu ba ye nyoñe *si nyô ane *ngab élik.

⁶ Mvom a ba ba wô'ô *zôsôô zaé a évé amu ba ye jaé.

⁷ Mvom a ba ba wô'ô bôte befe éngôngo amu be fe ba ye kooban éngôngo.

⁸ Mvom a ba be nee mfubane minlem amu ba ye yene Zambe.

⁹ Mvom, a bôte ba miase *mvo'é amu ba ye lobane jôé na bone be Zambe.

¹⁰ Mvom a ba ba wu étibela'a amu *zôsôô amu éjôé ya yôp é ne énjap.

¹¹ Mvom a mia éyoñ ése ba taa mia a tibili a kobô mia kane nkobô ébiasé ése amu ma.

¹² Va'an a fôn amu na ma'an me ne mia abui yôp. Avale te fe nde be nga tibili bekulu mejô be nga zu mia ôsu.

Mi ne nku; mi ne lambe

¹³ Mia mi ne nku ya *si nyô. Nge nku wo bo éyôs, jé é ne bo na ô beta bo nku? Ô ntoo teke fe jôm, wo yiane wuabane fé na bôt be tibi wô a mebo.

¹⁴ Mi ne éfufube ya émo ji, e tison é se ngule ya sobô é too nlôñan e nkôle yôp.

¹⁵ Nde fe na be nji bo'é lambe a telé nye éwolo si, ve telé nye e tawôlô yôp a nga faé asu bôte bese be ne *nda été.

¹⁶ Avale te nde éfufube jenan ja yiane faé e mise me bôt, nalé ba ye yene mbamba mimboone mienan a ve ésoo wônan a ne yôbe duma.

Me nji zu tyame metiñ, ve bo me

¹⁷ Te simesane na me nga zu tyame metiñ nge bekulu mejô; me nji zu tyam, ve bo.

¹⁸ Bebela émien, ma kate mia na, akekui yôp a si bia ye lôt, ôyôm ékanga wua nge ntene wua ya kalate metiñ wo ye bo te kôlô, ve akekui mam mese me maneya boban.

¹⁹ Ajô te, nge môt éziñ, e metiñe ma, a ye tyame ve di da dañe tyôtyoé, a ye'ele fe bôte befe nalé, a ye lobane jôé na: nyô a dañe tyôtyoé éjôé ya yôp; ve nyô a ye bo me a ye'ele fe me nalé, nye a ye lobane jôé na: beta môt éjôé ya yôp.

²⁰ Amu ma kate mia na, nge *zôsôô wônan teke dañe nyô *beyeme bekalate a befarizieñ, mi se ngule ya nyiin éjôé ya yôp.

Mewôé me bôt. Fulu élat

²¹ Mi nga wôk ane be nga jô bôbetôle na: Wo ye bo te wôé môt, amu nyô a wôé môt a yiane mekua e *nda mejô.

²² Ve me ke ma jô mia na: nyô ase a wô'ô monyañ ôlun, nye fe a yiane mekua ya *nda mejô; nge môt éziñ ke a jô monyañe na: Raka nalé a ne na ôkukut, a yiane ke e beta aba mejô; a nge môt éziñ a jô na akut, a yiane ke ébé nduan.

²³ Ajô te nge wo be'e mveane wôé na wo ke beté wô ata'a metuna'a yôp, ô ke simesane valé na monyoñ a bili wo jam e *nlem,

²⁴ li'i mveane wôé ata'a si valé, ô bulane mvus, ô taté ke mane lat a monyoñ, éyoñe te ñhe ô zu ke ve mveane metuna'a wôé.

²⁵ Jika'a mane kui *tyiñ a môte mia nye mi bili ajô nté mia nye mi ngenan e zene zañ, e môte mia nye mi bili ajô a za kee wo e be *ntyi'i mejô, nye ke a kele wo e be mone bezimbi na a wua wo e *nda mimbôk.

²⁶ Ma kate wo bebela na ô se nguleya kôlô vôm ate nge ô nji taté ya'an étune kabe ja su'ulan.

Ajô * mejian a jôm ja tindi môt a bo abé

²⁷ Mi nga mane wôk ane e nga jôban na: Te bo *mejian.

²⁸ Ve ma ma kate mia na: e môt ase a fombô minga a nkômban éziñ e *nlem, a boya *mejian a minga ate e nleme wé été.

²⁹ Nge dise dôé ya mbo nnôm da tindi wo na ô bo *abé, fôndé'é de ô wua de ôyap; amu asu dôé, e ne mfi na ébu'a nyôle jôé jia é jañ a lôte na ngume nyôle wôé ô ke étôtôlan.

³⁰ Nge wo wôé ya mbo nnôm wo kolé wo ôbak: tyi'i wô a wua wô ôyap, amu e ne mfi wôé na ébu'a jia ya bibu'a biôé é jañ a lôte na ngume nyôle wôé ôse ô ke étôtôlan.

Ajô nsuane minga

³¹ E nga jôbane na: Môt a suu minga wé a va'a minga ate kalate ntyaman aluk.

³² Ve ma ma jô mia na: nyô ase a suu minga wé, vengevenge ve amu *mejian, a bo nye a be'e mekua *mejian, a nyô ase a lu'u minga a ne nsuan, a ntoo mbo *mejian.

Te kalane minka

³³ Nalé fe na e nga jôban e be bôbetôle na: Wo ye bo te tyame ngana jôé, ve wo ye tôé mengana môé asu masa wôé.

³⁴ Ve ma ma jô mia na: môt a bo'o bo'o te ve'ele kalane minkaa; te kalane yôp, amu e ne éto njôane Zambe,

³⁵ te kalane si, amu é ne ételé ya mebo mé; te kalane Yérusalém, amu a ne tisone beta njô bôt,

³⁶ te kalane nlô wôé, amu ô se nguleya veñesane kongo ésile jia ya nlô wôé éfumulu nge évindi.

³⁷ Nkobô wônan ô bo'o ve yaa, yaa; momo, momo! Mam ma bebe yôbe valé ma so be mbia Môt.

Dis da tañe dis

³⁸ Mi nga wôk ane e nga jôbane na: Dis da tañe dis, asôñ da tañ asôñ.

³⁹ Ve ma ma jô mia na: Te litane ngule jenan asu be mbia môt éziñ; ve nyô a bibi wo abaé amañe ya mbo nnôm, veñesa'ane fe nye di avok;

⁴⁰ a nyô a kômbô kee wo aba mejô na a wôlé wo éwomane jôé, jôké'é fe nye kôt;

⁴¹ a e môt a ye bi wo a ngu na ô telé nye *zen tañe kiliméta jia a étun kele telé nye kiliméta élaa.

⁴² Nge môt a sili wo jôm, va'a nye je; môte ki a sili wo ékôla te lume nye mvus.

Ô nyeke'e môt a siñe wo

⁴³ Mi nga wôk ane e nga jôbane na: Wo ye nye'e môt a ne éngôé a vini nsiñe wôé.

⁴⁴ Ve ma ma jô mia na: mi nyeke'e besiñe benan a ye'elan ajô bôte ba tibili mia.

⁴⁵ Nalé mia ye bo fo'o bone b'ésoo wônan a ne yôp, amu nye a bo na jôp e tôô asu mbia be bôt a asu mbamba be bôt, a noo fe mveñ asu bezôsôô a bikotekote bi bôt.

⁴⁶ Amu nge mia nye'e ve bôte ba nye'e mia, ma'ane mevé mia ye nyoñ été? Ye benyoñe *toya bebien be nji bo nalé avale da'

⁴⁷ A nge mia batane ve bobenyoñ étam, za étua jame mia bo? Ye bikule bi nji bo avale da nalé'

⁴⁸ Ajô te nde mia mia ye bo ntute *zôsôô ane ésoo wônan a ne yôp a ne ntute *zôsôô.