METIAS 4 - Kalate Zambe Nnomo a Mfefe Mfefé Nkôñelan

Satan a bôbôlô Yésus

¹ Eyoñe te Nsisim ô nga be'e Yésus a kee nye fé été na Satan a bôbôlô nye.

² Eyoñ a tabeya mimôse mewôm menyin a melu fe mewôm menyin teke di, a nga su'ulane wô'ô zaé.

³ Nde mbôbôlô bôt a nga subu nye bebé a jô na: Nge ô ne mone Zambe, jô'ô meko'o mana me veñesane belet.

⁴ Nye ke a nga yalan a jô na: E ne ntilane na: Môt a nji nyiñ a belet étam, ve nalé fe a ajô ese da so anyu Zambe.

⁵ Eyoñe te *satan a nga nyoñe nye a kee nye e mfufube tison, a telé nye ôzolom nkume ya *nda Zambe

⁶ a jô nye na: Nge ô ne mone Zambe womien yô'ô a tebe si amu e nga tilibane fo'o na: A ye bendé be éngele asu dôé na be be'e wo abo dôé e za kômôtô akok.

⁷ Ane Yésus ke a nga jô nye na: E ne fe ntilane na: Te bôbôlô Nti e Zambe wôé.

⁸ Nde *satan a nga beta kee nye étun beta nkôle yôp, a nga mane kee a liti nye bijôé bise ya si ése a duma ese y'été,

⁹ a jô nye na: E biôme bisese'e bi, ma ye ve wo bie, nge ô kumbu si a kañe ma.

¹⁰ Eyoñe te Yésus a zu jô nye na: Kelek a Satan! Amu e nga tilibane fo'o na: Wo ye kañe Nti e Zambe wôé a nye étam wo ye saane nye.

¹¹ Eyoñe te ñhe nje *satan a nga li'i nye, ateme na beéngele be nga zu a saane nye.

Yésus a ke tabe Galilé

¹² Awô'ô a nga wô'ô na Yôanes a biliya, a nga ke ôyap e Galilé.

¹³ Eyoñ a kôlôya Nazarét, nde a nga ke tabe Kapernawum, e sii Zabuloñ a Néftali;

¹⁴ Ndemben nkobô *nkulu mejô Ezayi a nga kobô ô jalébane na:

¹⁵ E sii Zabuloñ a sii Néftali, e zene mañ, e Yordane yat, Galilé *meyoñ!

¹⁶ E mvoñe bôt é nga too dibi été, é yeneya beta éfufup. E bôte be nga too sii dibi awu éfufup é faéya asu dap.

¹⁷ Ataté éyoñe te, Yésus a nga ke a yôtane foé a jô na: Kôñela'ane minlem, amu ayoñe ya yôp e ntoo bebé.

Yésus a taté tobe beyé'é

¹⁸ A wulu'u mfôme mañ ya Galilé, nde a yene bobenyañ bebaé: Simon Pierre baa monyañ wé André be wu'a avot e mañ amu be mbe beyobe kos;

¹⁹ ane a nga jô be na: Tôñane ma a ma ye bo mia beyobe bôt.

²⁰ Ane be nga li'i memvot été te ébien a tôñe nye.

²¹ Eyoñ a kôlôya valé a subu ôsu, nde a nga yene bobenyañ befe bebaé: Yakob Zébédé a Yôanes monyañ wé, ane a nga loone fe be.

²² Be fe be nga li'i éfunga été te ébien a ke ba tôñe nye.

Yésus baa bizu'u bi bôt

²³ Ane a nga wulu e Galilé ase a va'a ñye'elan e meba me Zambe map; a yôta'ane Mbamba Foé y'Ejôé; a yete'e aval ôkon ese a aval éyem ése e be bôt.

²⁴ Duma dé e nga yiane Siri ase; be nga zuu nye minkôkone mise mi bili akone mevale meva nge na be nga bili éndeñela'a amu mintaé mevale meva: bebe'e mimbia minsisim, ba menyôl me ne ñyemelan, ba be ne mimbôbôk, a a nga saé be.

²⁵ Bizu'u bi bôt bi nga ke bia tôñe nye bi so'o Galilé, Dékapôl, Yérusalém, Yudé a Yordan yat.