METIAS 3 - Kalate Zambe Nnomo a Mfefe Mfefé Nkôñelan

Yôanes Babtist

¹ Melu mete, Yôanes Babtist a nga lôt, a kele a yôtan afan-afan, e si ya Yudé

² a jô'ô na: Kôñela'ane minlem amu éjôé ya yôp é ntoo bebé.

³ Nye a ne môte Nkulu Mejô Ezayi a nga jôô nye na: Tyiñe ñyôtan afan-afan ja jô na: Kômane zene Nti, sô'ane mezene mé *zôsôô ne tiññ.

⁴ Yôanes émien a mbe a be'e éyé é too ntiñan a mimvot mi kamel, kandé ékôp é tii nye angeteñ; bidi bié bi mbe bitandak a wôé ya mefan.

⁵ Eyoñe te Yérusalém a mbe a kele be nye a Yudé ase a afôla si ese ya Yordan,

⁶ be memek minsem miap a duban e mo mé e mendim m'ôsôé Yordan.

Kôñela'ane minlem!

⁷ Ayene a nga yene befarizieñ a besadusieñ abui be za'ak e nduane bôte wé, a nga jô be na: A Mvoñe mekpwele nyô! Za a nga ye'ele mia na mi tub ayaa da zu'

⁸ Wumane ñhe ébuma ja yiane *nkôñelane nlem,

⁹ a te mia bo zezé énguñ e be mia bebiene na: Abraham a ne ésaa wongan! Amu ma kate mia bebela na, Zambe a ne soo Abraham *bon e meko'o ma.

¹⁰ Amu ôvôn ô mbôô tine bilé a élé ése ja ye bo te wume bibuma bi ne mvaé, ba ye ba'é je a wua je e nduan.

Mbaptizô mendim a wu nduan

¹¹ Ma ma du mia e mendim asu nkôñelane minlem, ve nyô a zu ma mvus a ne ngul a dañe ma: me nji bo nyô a yiane vaa nye besilefas; nye a ye du mia e Mfufube Nsisim été a e nduan été.

¹² Esobelé ja se'ese biôm é ne nye wo, a ye bale afôla si dé a kôane nlisi angun; ve a ye di'i bikumba e nduan é ne te dim été.

¹³ Ane Yésus a nga so Galilé na a ke Yordan e be Yôanes na a du nye.

¹⁴ Nde Yôanes a nga tyi'i nye ôsu a jô nye na: Ke ma ma yiane duban e be wo, ye wo wo viane zu be ma'

¹⁵ Ane Yésus a nga yalan a jô nye na: Tame jô'é éyoñe ji, amu avale di nde da yian asu dangan na *zôsôô ase a jaléban. Eyoñe te a nga jô'é nye.

¹⁶ Nné ane Yésus a nga mane duban, a nga kôlô mendim été été a dañ e kindik, ateme na yôp e nga yombô asu dé a Nsisime Zambe ô nga sise be nye ane zum;

¹⁷ ateme fe na *tyiñ é nga so yôp é jô'ô na: Nyôna a ne mone wom ma dañe nye'e me bili mevak e be nye.