METIAS 28 - Kalate Zambe Nnomo a Mfefe Mfefé Nkôñelan

Yésus a wômô soñ

¹ Mvuse *sabat, ndibe tyé, *môs ôsu ya sondô, Marie ya Magdala a nga ke fombô soñ baa Marie mbok.

² Ateme na beta mfô'ôsane si a nga boban, e ne na: Engele Nti a nga sis a so'o yôp; éyoñ a subuya bebé soñ, a nga bi'iti ako'o fefe a tabe de yôp.

³ A nga yené ane feleves, a ngômesane jé é mbe éfumulu ane sut.

⁴ Ane beba'ale be nga tyibelan amu woñ be nga ko nye a be nga bo ane mimbim.

⁵ Nde éngel a nga nyoñe nkobô a jô binga na: Te koone woñ, ma yeme fo'o na mia jeñe Yésus nyô be nga tyelé *krôa yôp.

⁶ A nji bo va, a wômôya fo'o ane a nga jô, Zakan a yenane vôm a nga bôô.

⁷ Kelan avô a katane beyé'é bé na a wômôya miñwuan a mi lôô a keya mia ôsu e Galilé; mia ye yene nye wé. Mi lôô me kateya mia foé.

⁸ Be nga ke avô a li'i soñ, njalan a woñ, mbunda'an a abui mevak, be mate'e asu ya kate beyé'é bé foé.

⁹ Ateme na Yésus a nga tôbane be a jô be na: Mbôlane wé. Be nga subu nye bebé, ve bi nye mebo a kute meboñe si asu dé.

¹⁰ Ane Yésus a nga jô be na: Te koone woñ; kela katane bobenyañe bam na be ke Galilé, nne ba ye yene ma wé.

Foé bemombô soñ

¹¹ Be ngenan be kelek, ateme na, bôte b'éziñ ya beba'ale soñ be nga nyiin e tison a kate betuni benen e mam mese me nga kui.

¹² Ba be bemvendé be nga sulan ésok, éyoñe be maneya bi abime moné da yian, be nga ve nye bezimbi

¹³ be jô'ô na: Jô'ane na beyé'é béé be nga zu wube nye alu bi too ôyo.

¹⁴ Nge ngovina a wô'ô jame te, bia ye bo nye na a yebe njôane te a mia mia ye bo te tyelé minleme yôp.

¹⁵ Eyoñe bezimbi be nyoñeya moné, be nga bo ane be nga ye'ele be. Njôane wu ô nga mialan e be beyude a kui e môse wu.

Beta abendé

¹⁶ Beyé'é awôm a wua be nga ke e Galilé, e nkôle Yésus a nga bendé be,

¹⁷ éyoñ be yeneya nye, be nga kute meboñe si ve be sô'ane fe.

¹⁸ Eyoñ a subuya be bebé, Yésus a nga kobô a jô be na: Ngul ése é maneya vebane be ma e yôb été a e *si nyô.

¹⁹ Kelane ñhe a bo'one *meyoñ mese beyé'é mi duu be e jôé Esaa a Mon a Mbamba Nsisim,

²⁰ mi ye'ele be ane ba yiane ba'ale mam mese me nga bendé mia; mi lôô me ne a mia môse mise akekui amané ya *si nyô.