METIAS 27 - Kalate Zambe Nnomo a Mfefe Mfefé Nkôñelan

Yésus asu be Pilat

¹ Eyoñe tyé é nga lendé, betuni benen a bemvendé ya ayoñ be nga bo éso'o ya tebe Yésus e ngame yat asu ya wôé nye.

² Ane be nga ka'a nye, be kele nye a kalane nye Pilat, ngovina.

Awu Yudas

³ Eyoñe Yudas, nyô a nga koñe nye, a nga yene na be veya nye mekua, nde a nga kôñelane *nlem a bulane bifase bi moné mewôm melaa e be betuni benen a bemvendé

⁴ a jô'ô na: Me nga bo *abé éyoñ me nga koñe metyi me ne te bijô. Nde ba jô na: Wo zuu bia ajô nyôl aya? Womien wo ye yen.

⁵ Eyoñ a wuaya bifase bi moné e *nda Zambe nde a nga kôlô a éyoñ a keya ôyap, a nga timbane nko.

⁶ Eyoñe betuni benen be nyoñeya minsañ mi moné be nga jô na: E nji yiane na bi futi mie *akume ya nda Zambe, amu mi ne tañe metyi.

⁷ Eyoñ be tabeya ésok, be nga kuse afube mmé meviek a moné ate asu ya jame bikuu.

⁸ Ajô te ba loon afube te na afube metyi a kui e môse wu.

⁹ Nalé ate mejô Yérémi *nkulu mejô ma ye tôébane na: Ane be nga nyoñe minsañ mi moné mewôm melaa: Tañ éte é ne tañe ya nyô be nga tube tañ, nyô ya bone be Israél be nga tube tañ.

¹⁰ A be nga ve mie asu afube mmé meviek, avale Nti a nga jô ma de.

Pilat a sili Yésus minsili

¹¹ Ane be nga kee Yésus asu be ngovina; nde ngovina a nga sili nye minsili na: Ye ô ne njôô beyude nga? Yésus na: Wo wo jô.

¹² Nté betuni benen a bemvendé be nga bo'olô nye, a nji yalane jam éziñ.

¹³ Pilat a nga jô nye na: Ye ô nji wôk ane ba bo'olô wo'

¹⁴ A nji yalane nye to'o ve ajô da, a ngovina a nga kame jame te étua abui.

Ye Yésus, ye Barabas'

¹⁵ E abô'ô ése, ngovina a nga bili fulu ya suu mbô'ô wua e be ékôane bôt, e wu bebien be nga sili.

¹⁶ Be nga bili étua mbô'ô éziñ jôé na: Yésus Barabas.

¹⁷ Eyoñ be sulaneya, Pilat a nga sili be na mia yi na me suu mia za: Ye Barabas, ye Yésus ba loone na Krist'

¹⁸ A mbe a yeme na be nga kuane nye amu éviele.

¹⁹ A too éto ya aba mejô, nde minga wé a lôme nye tyiñe na: Te ke jam éziñ é ne e zañe jôé a zôsôa môt ate; me tôbaneya nju'u abui den e biyeyem amu nye.

²⁰ Betuni benen a bemvendé be nga tindi minsamba mi bôt mi sili Barabas ve mi dimili Yésus.

²¹ Eyalane jé été ngovina a nga jô be na: Mia yi na me suu mia za? Be na: Barabas.

²² Pilat a nga jô be na: Nde ma ye bo Yésus ba loone Krist aya? Be nga jô bese na: A tyeléba'ane *krôa yôp!

²³ Pilat na: Za mbia jam a nga bo? Be nga yalan a ayo'o ese na: A tyeléba'ane *krôa yôp!

²⁴ Eyoñ Pilat a yeneya teke mvolan éziñ a na zô'é é ne ve betebet, a nga nyoñe mendim a sôbe mo asu nsamba bôt a jô'ô na: Me ne *mfuban ajô metyi me môte nyô; ve mia mia ye tôban.

²⁵ Ane bôte bese be nga yalan a jô na: Metyi mé me tabe'e be bia a e be bone bangan.

²⁶ Nde a nga suu be Barabas, ve a nga kee be Yésus be ke tyelé nye *krôa yôp valé a maneya bibi nye nkasa.

Bezimbi ba kpwe'ele Yésus

²⁷ Ane bezimbi be ngovina be nga zuu Yésus e vôme ba kobô mejô a sulane nsamba bôt ôse ô tebe nye ngame yat.

²⁸ Be nga vaa nye ngômesane jé a jalé nye nyô é ne évele;

²⁹ be nga lôñ ékate biyo a jalé nye je nlô be kee ke nye *ntum e mbo nnôm, ve kute meboñe si asu dé a kpwe'ele nye be jô'ô na: Mbôlô, a njôô beyude;

³⁰ be nga tui nye mendene nyô, be nyoñe ke *ntum a bibi nye wô nlô.

³¹ Eyoñe be maneya kpwe'ele nye, be nga beta vaa évele ngômesan be nga jalé nye, a bulane jalé nye ngômesane jé a kee nye na be ke tyelé nye *krôa yôp.

Ba tyelé Yésus e * krôa yôp

³² Eyoñe be nga kui atan, be nga koone môte ya Sirén jôé na Simon, be nga sili nye na a be'e *krôa Yésus

³³ be kelek e vôm ba loone na Gôlgôta, nge na ékôkoé nlô;

³⁴ be nga nyuu nye woon a ne sañ; éyoñ a tye'eya je a nji je kômbô nyu.

³⁵ Eyoñ be tyeléya nye *krôa yôp, be nga kabane mengômesane mé a mboon *asimba.

³⁶ Be nga tabe si a ba'ale nye valé.

³⁷ Be nga tyelé, e nlô wé yôp, étome jé é too ntilane na: Nyôna a ne Yésus njôô beyude.

³⁸ Baa be beze mimfaka bebaé be nga tyelébane *krôa yôp: jia mbo nnôm, nyô fok mbo nga.

³⁹ Belôtan be nga taa nye, be me'ete be minlô

⁴⁰ be jô'ô na: A ntyame *nda Zambe a beta lôñe je môse milaa, nyi'i womien; nge ô ne mona Zambe, sisik si *krôa.

⁴¹ Avale te fe betuni benen baa be beyeme kalate a bemvendé be nga kpwe'ele nye be jô'ô na:

⁴² A nga nyii bôte befe, ve a se nguleya nyii émien; a ne njô bôte Israél, a sisik si *krôa éyoñe ji a bia ye buni nye.

⁴³ A nga ve émiene be Zambe a jô fe na: Me ne mona Zambe: Nge Zambe *a nye'e nye, a tame ñhe kôté nye éyoñe ji.

⁴⁴ Avale te fe beze mimfaka ba be be be nga tyele *krôa be mbe be taa nye.

Awu Yésus

⁴⁵ Ataté zañe *môs, dibi e nga yiane si ése a kui *mewolo melale ya mamengô'é.

⁴⁶ Bebé *mewolo melaa ya mamengô'é, Yésus a nga yône tyiñe yôp: Eli, Eli, lama sabaktani, nalé a tinane na: Zambe wom, Zambe wom, amu jé ô li'iya ma'

⁴⁷ Bevo'o ya bôt be mbe valé be mbe be jô'ô, éyoñ be nga wô'ô nye na: A loon Elie!

⁴⁸ Eté été, wua ya be be a nga mate a nyoñe kusa, ve dube je e woon a ne sañ été, a some je ôlé a ve nye je na a nyu.

⁴⁹ Ba bevo'o be nga jô na: Yange'e! Ñyenan nge Elie a ye zu nyii nye.

⁵⁰ Ve Yésus a nga beta yôn tyiñe yôbe ngu, a nga suu nsisime wé.

⁵¹ Ô lôô, éndelé ya *nda Zambe é nga salé bifas bibaé, ataté yôp a kui si; si é nga fô'ôsan; mekôm me nga salé;

⁵² mesoñ me nga kuiban, menyôle ya abui mimfufup e wuya me nga wômô:

⁵³ mi nga vame mesoñ a nyiin e tison é ne étyi e mvuse ñwômane soñ Yésus, a yené e be abui bôt.

⁵⁴ E ñyenane mfô'ôsane si a mam mese me nga boban, nde évete bezimbi ntete wua a ba ba be be be mbe be ba'ale'e Yésus, be nga dañe ko woñ a jô na: Bebela na nyôna a be mona Zambe.

⁵⁵ Binga abui ya ba be nga wulu nsamba Yésus, ataté Galilé, be saane nye, be mbe wé be tele ôyap a yen.

⁵⁶ Be mbe été na: Marie ya Magdala a Marie nyia Yakob a Yôsep a nyia bone be Zébédé.

Yésus a jambane soñ

⁵⁷ Eyoñe ngô'é é nga kui, nkukume môte ya Arimaté ô nga suan jôé na Yôsep, nye fe a nga su'ulane bo ñye'é Yésus,

⁵⁸ a nga zu be Pilat a sili mbime Yésus. Ane Pilat a nga kañese.

⁵⁹ Eyoñ a nyoñe mbim, Yôsep a nga vule wô e *mfuban éndelé.

⁶⁰ A nga futi mbim e mfefé soñe wé, nyô a nga fak akôm été, a éyoñ a maneya dibe beta akok e *mbé soñ nde a nga ke.

⁶¹ Be mbe valé na: Marie ya Magdala a Marie mbok be nga too ôsu soñ.

Bezimbi ba ba'ale soñ

⁶² Tyé kpwaa ya mvuse nkômesan, betuni benen a befarizieñ be nga sulan e be Pilat

⁶³ be jô'ô na: A Masa, bi nga simesane njôane môt ate, nyô a nga yale bôte fé a nga jô a ngenan a vee na: Ma ye wômô e mvuse môse milaa.

⁶⁴ Ajô te va'a abendé na be tu'a ba'ale soñ a kui môse lale, beyé'é bé be za zu wube nye a jô bôte na: A wômôya miñwuan, njañelane bôte fé wo su'ulan ô za dañe *abé a dañe wu ya ôsu.

⁶⁵ Pilat a nga jô be na: Mi bili beba'ale; a kelan mi tu'a ba'ale avale mia yem.

⁶⁶ Eyoñ be keya, be nga tu'a fo'o ba'ale soñ, be nga yemete ako'o e nga dibe soñ a telé beba'ale!