METIAS 26 - Kalate Zambe Nnomo a Mfefe Mfefé Nkôñelan

Emo'o ya wôé Yésus

¹ A nga bo na, éyoñe Yésus a maneya kobô mam mete mese, a nga jô beyé'é bé na:

² Mia yeme na éyoñe môse mibaé mi lôteya, Pak a ye boban, a mona môt a ye koñeban asu ya na a tyeléban e *krôa.

³ Ane bivete betuni bi nga sulan a bemvendé ya ayoñ e ndaa *ntuni nnen ba loone na Kaif,

⁴ a bo ésok ane be ne bi Yésus e mvôle yôp a wôé nye;

⁵ be mbe be jô'ô na: Saa ke éyoñ abôk é né, éngôngôm é za boban e be bôt.

Minga a wo'o Yésus Olobinda e nyô

⁶ Yésus a mbe Bétani, e ndaa Simon nkone *zam,

⁷ nde minga éziñ a subu nye bebé a bili nde'e albata é bili ôlobinda a ne beta tañ, nye ve sôé nye nye nlô a too tawôlô.

⁸ Eyoñe beyé'é be nga yene jame te, be nga yene de *abé a jô na: Amu jé aval éndamane di'

⁹ Ôlobinda nyô a be kuabane beta tañ asu bingôngole bi bôt.

¹⁰ Eyoñe Yésus a yemeya ôsimesane viap, a nga jô be na: Amu jé mia dutu éndeñela'a e be minga nyô? Ke a te bo ma mbamba jam;

¹¹ mia be bingôngole bi bôt mi too éyoñ ése; ve bia be mia mi nji tabe éyoñ ése;

¹² a te sôé ôlobinda e nyôle jam asu njambane soñe wom.

¹³ Ma jô mia bebela na e vôm ase Mbamba Foé nyô a ye kateban e si nyôna ése, ba ye fe kobô ajô ya jam a te bo a simesane nye.

Yudas a koñe Yésus

¹⁴ Ane wua ya beyé'é awôm a bebaé, jôé na Yudas Iskariôt a nga ke e be bivete betuni

¹⁵ a jô na: Mia ye ve ma jé ane-me ne koñe mia nye? Nde be nga ve'e nye bifase bi moné mewôm melaa.

¹⁶ Ataté éyoñe te a mbe a jeñek mbamba éyoñ ya koñe nye.

Nkômesane ndiane Pak

¹⁷ E *môs ôsu ya ba di belet é ne te mvusan, beyé'é be Yésus be nga sili nye na: Wo kômbô na bi ke kôme wo vôme ya di Pak e vé'

¹⁸ Nye be na: Kelan e tison, be môt éziñ, a jô'ane nye na: Masa a jô na: Eyoñe jam é ntoo bebé, nne ma lôte Pak e be wo bia beyé'é bam.

¹⁹ Ane beyé'é be nga bo ane Yésus a nga bendé be: be nga kôme Pak.

²⁰ Eyoñe ngô'é é nga kui, a nga too tawôlô ba be beyé'é awôm a bebaé.

²¹ Be ja'ak, nde a jô be na: Ma bele ane ma jô mia na: Wua ya be mia a ye koñe ma.

²² Njalan a abui ôlun, nde ba taté nye nsilan, môt ase mfa'a wé na: Ye ma a Nti'

²³ A nga yalan a jô na: E môt bia nye bia kee wo e be'e été, nye ate a ye koñe ma.

²⁴ Mona môt a ke ane e nga tiliban ajô dé ve bidim e be môt a be'e ayeme ya nkoñane mona môt: e nga ye dañe mvaé e be môt ate na a bo te bialé.

²⁵ Yudas, nyô a nga koñe nye a nga yalan a jô nye na: Ye ma a Rabi? Yésus na: Wo wo jô nalé.

Bidi bi Zambe

²⁶ Be ja'ak, nde Yésus a nyoñe fembé a éyoñ a maneya botane je, a nga be'e je a ve je beyé'é nye na: Nyoñan, ja'an, jôme jina é ne nyôle jam.

²⁷ Eyoñ a nyoñeya *élaé a ve akéva, a nga kalane be je a jô'ô na: Nya'an *élaé ji bese,

²⁸ jôme ji é ne metyi mam y'élat asu jama bôt, mme me nga sôéban asu njamane mam *abé.

²⁹ Ma jô mia bebela na: Ataté éyoñe ji, ma ye bo te beta nyu jôme ya ébuma ndi'i ji, akekui e môse bia be mia bia ye nyu je mfefé éjôé Esaa wom.

Alu ebiene di wo ye kate ma

³⁰ Eyoñ be maneya yia bia, be nga ke e nkole beôlivié.

³¹ Ane Yésus a nga jô be na: Mia bese mia ye koleban ôbak alu di amu ma: Amu e nga tilibane fo'o na: Ma ye bibi mba'ale a mintômba ya mbam mia ye tyamelan.

³² Eyoñe me wômeya, ma ye ke mia ôsu e Galilé.

³³ Pierre a nga yalan a jô nye na: Nge bese ba ye kolôban ôbak amu wo, ve ma ma ye bo te koleban ôbak.

³⁴ Yésus a nga kate nye na: Ma jô wo bebela na alu di, te na nnôme kup a loñé, wo ye kate ma biyoñe bilaa.

³⁵ Pierre a nga jô nye na: To'o na me nga yiane wu bia wo, teke fo'o na me nga ye kate wo. Bebé avale te fe beyé'é bese be nga jô.

Yésus a ye'elan e Gétsémané

³⁶ Ane ba be Yésus be nga kui e vôm ba loone na Gétsémané, nye beyé'é na: Taba'ane si valé, nté ma ke ôbe nté na me ye'elan.

³⁷ A nga nyoñe Pierre baa bone be Zébédé bebaé; a nga taté na a wô'ô ôlun a biyebe.

³⁸ Nye be na: Nsisime wom wo wô'ô ôlun étua abui a kui awu; lika'ane va a momba'an fufulu a ma.

³⁹ Nde a subu ôsu mone nté, ve ku asu dé é butu si, a nga ye'elan a jô'ô na: A Esaa wom, nge é ne ngule ya bo nalé na *élaé ji é ke ma ôyap; ve da saa ane ma kômbô ve ane wo kômbô.

⁴⁰ Ve zu mfa'a beyé'é be mbe a koone be ôyo, nye na: A Pierre nalé a ne na mi nji bi ngule ya mombô fufulu a na to'o ve awolo da'

⁴¹ Momba'an a ye'ela'an, nalé mia ye bo te nyiin e *mebôbela'a été; mfa'a wu *nsisim ô ne ngu, mfa'a mbok minsôn mi ne atek.

⁴² A nga beta ke éyoñe baa asu ya ye'elan a jô'ô na: A Esaa wom nge *élaé ji é se nguleya lôt te na me nya'a je, nkômbane wôé ô boba'an!

⁴³ Mvus éte a nga beta zu a koone be be too ôyo, amu mise map me mbe adit.

⁴⁴ Ve li'i be a beta ke ôyap asu ya ye'elan éyoñe lale, a ba'ala'ane ke avale bifia da.

⁴⁵ Ane a nga zu e be beyé'é a jô be na: Kelan ôsu *a ke ôyo a woka'an! Mi lôô éyoñ é ntoo bebé nje mona môt a yiane keeban e mo bebo *abé.

⁴⁶ Kôla'ane si! Nkean! Mi lôô môt a koñe ma a soya.

Nkoñan a mbiane Yésus

⁴⁷ A ngenan a kobô'ô, éyoñe te Yudas, wua ya beyé'é awôm a bebaé a nga suan a ngume nsamba bôt be be'e minkpwaté mekôn a mimbeñ. Bivete betuni a bemvendé ya ayoñe beyude mbe be nga lôme be.

⁴⁸ E môt a nga koñe nye, a nga ve be ndem a jô'ô na: Môt ma ye latane nye anyu, nye le, biane nye.

⁴⁹ Eté été a nga subu Yésus bebé a jô na: Mbôlô a Rabbi, ve latane nye anyu.

⁵⁰ Yésus a nga jô nye na: A Mvôé jam, ô ne va amu nalé. Ane be nga zu bebé a wua Yésus mo nyô a bi nye.

⁵¹ Ane wua ya ba ba be Yésus be mbe a nga same wo a té nkpwaté mekône wé abam a ba'é mbo ésaé njôô betuni a tyi'i nye alo.

⁵² Nde Yésus a nga jô nye na: Some nkpwaté mekône wôé e vôme wé; amu ba bese ba nyoñe nkpwaté mekôn, ba ye fe wu ve a nkpwaté mekôn.

⁵³ Nge na ye wo simesane na me se nguleya ye'elan Esaa wom éyoñ ébiene ji, nye ke a telé fefele jam éto ji beéngele mewosan a dañe bizu'u awôm a bibaé'

⁵⁴ Nne mintilan mi ne nguleya tôéban aya te na avale di da boban'

⁵⁵ Awolo te nde Yésus a nga jô minsamba mi bôte na: Mia te kui mi bili minkpwaté mekôn a mimbeñ asu ya bi ma ane zee mimfaka. Môs ôse, e *nda Zambe été, me mbe me tabe'e si a ye'ele, mi nji bi ma.

⁵⁶ Jame dina ese é kuiya asu ya na mintilane bekulu mejô mi tôéban. Ane beyé'é bese be nga li'i nye a tup.

Yésus a tele asu betyi'i mejô

⁵⁷ Eyoñe be biya Yésus, be nga kee nye e be Kayif, *ntuni nnen, e vôme beyeme bekalate a bemvendé be nga too nsulan.

⁵⁸ Pierre, nye a mbe a za'a ôyap a kui e nseñe *ntuni nnen, a éyoñ a nyineya mfa'a ya été, a mbe a too ba be ayôme bôt asu ya yen asu'ulan ya mam.

⁵⁹ Betuni benen a ékôan ja kobô mejô ése be mbe be jeñek ékotekote jame ya bo'olô Yésus ane be ne wôé nye.

⁶⁰ Ve be nji yen, akôsa bo na bikotekote bengaa bi mbe valé. Ayap é lôteya, nde bebaé ya été ba subu bebé a jô

⁶¹ na: Môte nyô a mbe a jô'ô na: Me ne tyame *nda Zambe, a beta lôñe je môse milaa.

⁶² Ntuni nnen a nga tebe tetele a jô nye na: Ye wo te yalan to'o jame da ya mam ba bo'olô wo nga'

⁶³ Yésus a nga too évô. Ntuni nnen a nga jô nye na: Ma vuu wo soñ ane Zambe a vee na ô kate bia nge ô ne Krist e mona Zambe.

⁶⁴ Yésus a nga jô nye na: Wo wo jô. Ve da ma jô mia na: ataté éyoñe ji, mia ye yene mona môt a too e mbo nnôme ya éto njôan a a za'a minkute ya yôp.

⁶⁵ Eyoñe te *ntuni nnen a nga nyap mengômesane mé a jô na: A kobôya ébiasé nkobô, amu jé bia beta yi bengaa? Mi lôô éyoñe ji, mi maneya wô'ô nkobô ébiasé.

⁶⁶ Mia yen aya? Be nye na: A yiane wu.

⁶⁷ Nde be nga tui nye menden asu a bibi nye mebaé. Bevok be nga bibi nye minkasa

⁶⁸ be jô'ô na: Kuli'i bia mejô a Krist, za a te bibi wo'

Pierre a kate Yésus

⁶⁹ Pierre a nga too si atan, e nseñ été; nde mbo ésaé minga éziñ, a zu nye bebé a jô na: Wo fe ô mbe nsamba Yésus môte ya Galilé.

⁷⁰ Nde a nga kat asu bese a jô'ô na: Me nji yeme jam wo jô.

⁷¹ Eyoñ a kui atan a kele mfa'a *mbé akak ô mbe, nde minga mfe a yene nye a jô na: Môte nyô a mbe nsamba Yésus môte ya Nazarét.

⁷² A nga beta kat a kane'e ngana na: Me nji yeme môt ate;

⁷³ Ôbe nté ô lôteya, bôte be nga tele valé be nga subu Pierre bebé a jô nye na: Bebela na wo fe ô ne wua ya be be, nkobô wôé ôbien wo liti vôme wo so.

⁷⁴ Nde a taté na a fôtan a kane mengana na: Me nji yeme môt ate. Eté été ane nnôme kup a nga loñ.

⁷⁵ Ane Pierre a nga simesane nkobô Yésus a nga kobô na: Te na nnôme kup a loñ, wo ye kate ma biyoñe bilaa; nde a nga kui atan a dañe yi.