METIAS 23 - Kalate Zambe Nnomo a Mfefe Mfefé Nkôñelan

Ngo'o mia Befarizieñ a beyeme bekalate

¹ Ane Yésus a nga kobô jama bôt a beyé'é bé

² na: Beyeme bekalate a Befarizieñ be too éto Môze yôp,

³ jam ese ba jô mia ba'ala'an a bo'one de, ve te boone avale ba bo. Amu be nji bo ane ba jô.

⁴ Ba ka'a adite mimbe'e e ne ayaé ya be'e e bitule bi bôte befe, ve bebien te kômbô fô'é mie a ônyu viap.

⁵ Mam mese ba bo, ba bo me ve amu na bôt be yene be. Ba bo bikpwaé bekalate be Zambe biabe ndam a bo miñwôndé ya mengômesane map ayap.

⁶ E mebô'ô bidi, ba nye'e bito mintômba, nalé fe bi ya ôsu e meba me Zambe,

⁷ mebatan e mevôme bôt ba sulan; ba nye'e bôt be lo'one be na Rabi.

⁸ Ve mia, te mia kañese lobane na Rabi; môte wua nye a ne ñye'ele wônan, mia bese mi ne bobenyañ.

⁹ E *si nyô, te mia loone môt éziñ ésoo wônan, amu mi bili wua ve Esoo wônan a ne yôp.

¹⁰ Te mia lobane na beliti bôte *zen, amu nliti zene wônan a ne wua ve Krist.

¹¹ Nyô a dañe beta môt e be mia a ye bo mbo ésaé wônan.

¹² Nyô a bete émiene yôp a ye silibane si a nyô a suu émiene si a ye betebane yôp.

¹³ Bidim a mia, *beyeme bekalate a Befarizieñ bôte bebadu'u, amu mia dip éjôé ya yôp ôsu be bôt; miabebien teke nyiin été a teke jô'é ba ba kômbô nyiine na be nyiin.

¹⁴ Bidim a mia *beyeme bekalate a Befarizieñ bôte bebadu'u! Amu mia nyoñe minkus e biôme bise be bili, éyoñe te fe mia bo ayabe meye'elane na bôt be yene mia.

¹⁵ Bidim a mia, *beyeme bekalate a Befarizieñ bôte bebadu'u, amu mia bômane mañ a si asu ya dutu môte wua a éyoñe mi dutuya nye, mia veñesane nye mone ya ébé nduan a dañe mia tañe biyoñe bibaé.

¹⁶ Bidim a mia, mindindime belitizen, mia mia jô na: Môt a kalane *nda Zambe teke jam é ne bo nye, ve nyô a kalane or a ne été nye a ntii mvôla.

¹⁷ A mia mekut a mindindim jé ja dañe dañ anen ye or ye *nda Zambe ja telé or étyi'

¹⁸ Mia jô fe na: Nyô a kalan ata'a metuna'a teke jam é ne été ve nyô a kalan mvean ô bete été yôp nye a mbili mvôla.

¹⁹ A mia mindindim, jé ja dañ anen, ye mvean ye ata'a metuna'a da telé mvean étyi'

²⁰ Nyô a kalane ñhe ata'a metuna'a a kalane de a biôme bise bi bete été yôp;

²¹ a nyô a kalan *nda Zambe a kalane je a nyô a too été.

²² Nyô a kalane yôp a kalan éto njôane Zambe a nyô a too je yôp.

²³ Bidim a mia, *beyeme bekalate a Befarizieñ, bôte bebadu'u, amu mia ve *ngab awômô ya mesep, ôsim a ndôñ, ve mi vuane jam da dañ anen e metiñ: nya ntyi'ane mejôô, nkoon éngôngo a mbunan; mam mana mme mi nga yiane bo, ve teke jô'é ma mevok.

²⁴ A mia mindindime belitizen, mia viane léé afi a mine kamel.

²⁵ Bidim a mia, *beyeme bekalate a Befarizieñ, bôte bebadu'u! Amu mia fubu *élaé a be'e mfa'a ya atan, ve mfa'a ya été bi too njalan a wup nalé fe ôzañ akum.

²⁶ A ndindime Farizieñ, taté'é fubu *élaé mfa'a ya été, nalé atane dé da ye fe bo *mfuban.

²⁷ Bidim a mia, *beyeme bekalate a Befarizieñ, bôte bebadu'u! Amu mia funane mesoñ me ne ndubane fem, mme ma yené abeñ atan, ve été me ne njalan a bivese mimbim a mvin mevale mese.

²⁸ Nalé ate fe mia, mia yené bezôsôô be bôt atan, ve été mi ne njalan a nsisime bebadu'u a wu mbia be mam.

²⁹ Bidim a mia, *beyeme bekalate a Befarizieñ, bôte bebadu'u! Amu mia lôñe mesoñ bekulu mejô a kôme mesoñ bezôsôô be bôt,

³⁰ a mia jô na: Nge bi nga too melu b'ésaa bangan, bi nji ye bo beébe bebe'e ayem bap ya metyi bekulu mejô.

³¹ Avale ya na mi ne bengaa ba wosane bebien, amu mi ne bone be bôt be nga wôé bekulu mejô!

³² Jé éfe! Ke miabebien mia tu'a jalé mimboon b'ésaa benan.

³³ A benyo, mvoñe mekpwe! Aval avé mia ye tup a mate ntyi'ane mejô ya étôtôlan'

³⁴ Ajô te, mi lôô, ma lôme bekulu mejô, mimfefek a *beyeme bekalate e be mia; mia ye wôé bevo'o ya be be a tyelé bevo'o *krôa, a bibi bevo'o minkasa e meba me Zambe, a mia ye tibili bevok e tisone nyô a nyô fok;

³⁵ ndembene zôsôa metyi ase a nga sôébane si a ye zu be mia, ataté metyi Abél, zôsôa môt, a kui metyi me Zakari, mona Barasi; nye mi nga wôé e zañe *nda Zambe a ata'a metuna'a.

³⁶ Ma jô mia bebela na: Jame te ese da ye boban e miaé bôte wuna.

³⁷ A Yérusalém! A Yérusalém! Wo wo wôé bekulu mejô a lume ba ba lômbane be wo *mekok! Ngo'o abime biyoñ me nga kômbô kôane bone bôé ane ngale kup a kôane bone béé e mefabe mé si! Ve mi nji ke kômbô nalé!

³⁸ Tame yenan! Nda jenan ja ye li'i bilik asu denan.

³⁹ A ma jô ñhe mia na: Te ke selan a ataté éyoñe ji mia ye bo te beta yene ma akekui mi jôya na: Ebotan a nyô a zu a jôé Nti!