METIAS 22 - Kalate Zambe Nnomo a Mfefe Mfefé Nkôñelan

Abô'ô aluk

¹ A yala'ane be, nde Yésus a beta kobô a minkana a jô'ô na: Avale di nde me ne beta funane dee éjôé ya yôp:

² ja funane jame njô bôt éziñ a nga bo éyoñe ya a nga bo ésulan alu'u mone wé;

³ a nga lôme bebo bisaé bé be loone bôt a nga bañete ésulan aluk: ve be nga bene zu.

⁴ Ane a nga beta lôme bebo bisaé befe nye na: Katane bôt me nga bañete na: Yenan ane me maneya kôme dina wom: beyôme benya'a bam, a mevoñ biyem biam bi nga tyi'iban, a mam mese me ntoo nkôman, za'an abô'ô aluk.

⁵ Be nji kee kee melo wé, ve viane tube tup: nyina a ke afube dé li, nyô mbok e makite mé;

⁶ ba be nga li'i ve bi bebo bisaé bé a taa be, a wôé be.

⁷ Nde njô bôt a nga yaa a lôme minsamba bezimbi mié na mi wôé bewôé bôt bete a di'i tisone jap.

⁸ Nye bebo bisaé bé na: Jam ôsu é ne na abô'ô aluk é ntoo nkôman, di baa ke na bôt me nga bañete be litiya na be nji yian,

⁹ ajô te ñhe kelan e ma'ane mezen a loone bôte bese mia ye yene na be zu abô'ô aluk.

¹⁰ Ane bebo bisaé be nga ke mezen a kôane ba bese be nga koone be: mbia a mbamba be bôt; abô'ô aluk ve jaé ne lut a bôt.

¹¹ Eyoñe njô bôt a nyiine na a yene bôt be nga looban, ve yene mbo'o éziñ a too tee ngômesan ya abô'ô aluk,

¹² a nga sili nye na: A mvôé jam, wo te nyiine vana aya tee ngômesan ya abô'ô aluk? Nye ke ve ane ba te loé nye anyu.

¹³ Ajô te njô bôt a nga jô bebo bisaé na: Ka'ane nye mebo a mo, a wu'ane nye e dibi é ne atan, e wé a ye bo ve ñyôn a nlatane mesôñ.

¹⁴ Amu abui bôt e ne nlooban, ve ba be ne ntoban be ne tyôtyoé.

Va'ane kéza biôme bié a Zambe émbié

¹⁵ Eyoñe Befarizieñ be keya, be nga tebe éso'o ya bi Yésus ôlam ya bifia bié.

¹⁶ Nde ba lôme beyé'é bap a bôte ya ngame Hérôde e be nye be jô'ô na: A Nye'ele, bia yeme na ô ne bebela a é ne fe bebela na wo ye'ele bôt zene Zambe teke ko môt éziñe woñ, amu ô nji semé ngume môt:

¹⁷ Kate ñhe bia, wo yen aya, ye da yiane na be ya'ane kéza *toya ye momo'

¹⁸ Amu Yésus a mbe a yemek nsisime *nkpwala ô ne be be, nye be na: Amu jé mia bôbôlô ma a bebadu'u be bôt'

¹⁹ Lita'ane ma moné *toya, nde ba liti nye denié wua.

²⁰ A nga jô be na: Fôtô za nyô a za a nee ntilane wu'

²¹ Be nga yalane nye na: Sézar. Nde a jô be na: Bula'ane ñhe Sézar biôme bi Sézar a Zambe biôme bi Zambe.

²² Eyoñe be nga wô'ô nalé, be nga semé ve li'i nye a ke ôyap.

Nsili ajô ñwômane miñwuan

²³ Môs ôte, Besadusieñ be nga zu be nye, mbe ba jô na ñwômane miñwuan ô nji bo, nde ba sili nye na:

²⁴ A Nye'ele, Môze a nga jô na: Nge môt éziñ a wu tee *bon, monyañe wé a ye lu'u minga wé a biaé monyañe wé ate mvoñe bôt.

²⁵ Bobenyañe zamgbwale b'éziñ be nga too be bia, ntôl ve luk a wu te li'i mvoñe bôt, ane a nga li'i monyañe wé e minga wé;

²⁶ avale te fe e nga kui e be monyañe baa, nyô lale a kui nyô zamgbwale.

²⁷ Mvus éte minga fe a nga wu.

²⁸ Nde ñhe éyoñe ya ñwômane miñwuan, minga nyô a ye bo nga za ya bobenyañe zamgbwale ba? Amu bese be nga lu'u nye.

²⁹ Yésus a nga yalan a jô be na: Mia fu'u fé amu te yeme mintilan a ngule Zambe;

³⁰ éyoñe ya ñwômane miñwuan, befam ba ye bo te luk a binga ba ye bo te lu'uban, ve ba ye bo ane beéngele ya yôp.

³¹ Mfa'a ya ajô ñwômane miñwuan ye mi nji lañ ane Zambe a jô mia na:

³² Ma me ne e Zambe Abraham, e Zambe Izak a e Zambe Yakob? A nji bo e Zambe miñwuan ve nyôa bevevee.

³³ Eyoñe jama bôt a nga wô'ô nalé be nga bi ébu'a anyu a mo amu ñye'elane wé.

Atiñe da dañe metiñe mese

³⁴ Eyoñe Befarizieñ be wô'ôya na a feteya Besadusieñ menyu, be nga sulan e vôme wua ate.

³⁵ Wua ya été, a too ñyeme metiñ, a nga sili nye nsili asu ya bôbôlô nye:

³⁶ A nye'ele, abendé avé da dañ anen e metiñ été'

³⁷ Yésus a nga yalane na: Wo ye nye'e Nti e Zambe wôé a nleme wôé ôse, a nsisime wôé ôse a ôsimesane viôé ôse;

³⁸ abendé e ne anen a e tele ôsu nde le.

³⁹ Di baa da funane fe di ôsu nde di: Wo ye nye'e môt a ne wo bebé ane womien.

⁴⁰ Metiñ mese me tyele e mebendé mana mebaé nalé fe bekulu mejô.

Nsili ajô mone David

⁴¹ Eyoñe Befarizieñ be sulaneya, Yésus a nga sili be

⁴² na: Mia simesane aya ajô Krist? A ne e mona za? Be nye na: Mona David.

⁴³ A nga jô be na: Amu jé ñhe David, e Nsisim été, a loone nye Nti a jô'ô na:

⁴⁴ Nti a nga jô Nti wome na: Tabe'e si e mbo nnôme wom akekui me futiya besiñe bôé e mebo môé si'

⁴⁵ Nge David a loone nye Nti, nne a ne bo mone wé aya'

⁴⁶ Teke môt a mbe nguleya yalane nye to'o ve ajô da, a ataté éyoñe te, teke môt a nga beta bi ayo'o nleme ya sili nye nsili.