METIAS 21 - Kalate Zambe Nnomo a Mfefe Mfefé Nkôñelan

Yésus a nyiin e Yérusalém a duma ese

¹ Eyoñe be nga kui bebé Yérusalém, a kui Bétfajé mfa'a ya nkôle beôlivié, Yésus a nga lôme beyé'é bebaé

² a jô be na: Kelan e nlam ô ne mia ôsu le, été été, mia ye koone ngal éjakas ntiñetan ba mon; ti'ane nye a zuu nye be ma.

³ A nge môt éziñ a ye jô mia jam éziñ, mia ye jô nye na: Nti a kômbô be; été été, a nga lôme be.

⁴ Nalé a nga boban asu ya na jame *nkulu mejô a nga jô é tôébane na:

⁵ Jô'ane ngone Siôn na: Tame yen, njô bôte wôé a zu be wo, a too évôvoé, a too e ngal éjakase yôp, a étoñ éjakas yôp, mbialane ya tit ja be'e mimbe'e.

⁶ Nde beyé'é be nga ke a bo ane Yésus a nga jô be,

⁷ be nga zuu ngal éjakas a mon a be nga beté be mengômesan a Yésus ke a nga tabe be yôp.

⁸ Etua beta nsamba bôt a nga taa mengômesane mé e zene yôp; bevok be nga tyi'i mebua bilé a bôé me e zene yôp.

⁹ Bôt be mbe Yésus ôsu a ba be mbe nye mvus be mbe be yôta'ane na: Hôzana e be mona David, ébotan a nyô a zu a jôé Nti! Hôzana e mevôm me ne mbetane yôp!

¹⁰ Eyoñ a nga nyiin e Yérusalém, tison ése é nga ti'itan, nsili ô too na: Nyôna a ne za'

¹¹ Jama bôt a mbe a jô'ô na: Nyôna a ne *nkulu mejô, Yésus, a so Nazarét ya Galilé.

Yésus a fubu * nda Zambe

¹² Ane Yésus a nga nyiin e *nda Zambe; a nga kuli bekuan a bekuse biôm e *nda Zambe été atan; a nga sô'ôlô betawôlô befolane moné si, nalé fe bito bekuane bezum,

¹³ a nga jô be na: E nga tilibane na: Nda jam ja ye lobane na *nda meye'elan, ve mia mi veñesaneya je kam beze mimfaka.

Yésus a ye'ele e * nda Zambe été

¹⁴ Ane mindindim a miñyeyem mi nga zu be nye e *nda Zambe été, nde a nga saé mie.

¹⁵ Eyoñe bivete betuni a beyem bekalate be nga yene bitua bi mam a nga bo a ane bongô be nga yôtan e *nda Zambe be jô'ô na: Hôzana e be mona David, be nga wô'ô abé

¹⁶ a jô nye na: Ye wo wô'ô mame bana ba jô? Yésus a nga jô be na: Yaa! Ye mi nji lañe na: Ô boya na ékaña'a é so wo ja'ane anyu ayôme *bon a benyañebéé'

¹⁷ Eyoñ a li'iya be, a nga ke e tison atan, mfa'a ya Bétani a lôt alu wé.

Yésus a yo'é élé figié

¹⁸ Tyé kpwaa, éyoñ a bulan e tison, a nga wô'ô zaé,

¹⁹ mbôl a nga yene élé figié jia e *zen, nde a ke mfa'a é mbe a nji koone é bili jôm vengevenge ve mekaé étam, ane a nga jô je na: Wo ye bo te beta wume bibuma! Ane é nga kôt atemetem.

²⁰ Eyoñe beyé'é be yeneya jame di, be nga semé be jô'ô na: Elé figié ja te kôt atemetem aya'

²¹ Yésus a nga yalan a jô be na: Ma jô mia bebela na: Nge mi bili mbunan ô ne te bisô, mia ye bo saa ve jam da fombô figié, ve mia ye jô ja'ane nkôle na: Kôlô'ô va a kele ku e mañ été, nalé ve boban;

²² a jam ese mia ye sili meye'elan été a mbunan mia ye nyoñe de.

Ngule njôane Yésus a mbaptizô Yôanes

²³ Eyoñ a nyiineya e *nda Zambe été, bivete betuni a bemvendé ya ayoñ be nga subu nye bebé, valé a ye'ele bôt, a jô nye na: A ngulenjôane fé wo bo je mame ma'

²⁴ Yésus a nga yalan a jô be na: Ma fe ma ye sili mia nsili wua nge mi yalane ma wô, ma fe ma ye kate mia vôme ngulenjôan ma bo je mam ja so.

²⁵ Nduane bôte Yôanes wo so vé ye yôp ye be bôt? Be nga fase ñhe e be bebiene na: Nge bia jô na wo so yôp, a ye sili bia na: Amu jé mi nga bo te buni nye'

²⁶ Ve nge bia jô na e be bôt, bia ko jama bôte woñ, amu bese ba nyoñe fo'o Yôanes ane *nkulu mejô.

²⁷ Nde ba yalan a jô Yésus na: Bi nji yem. Nye ke a nga jô fe be na: Ma fe ma ye bo te kate mia môt a nee ngulenjôan ma bo je mam.

Bone bebaé

²⁸ Mia yen aya? Môt a nga bili bone bebaé, ane a nga zu be nyô ya ôsu a jô nye na: Kele den a bo ésaé afube mindi'i mi woon.

²⁹ Nde mone nyô a nga yalane na me nji kômbô ke, v'asu'ulan, éyoñ a kôñelaneya *nlem, a nga ke.

³⁰ A nga ke fe be mone mbok a jô nye avale da, nye ve yalan a jô ésaa na: Yaa a ésaa wom, ve a nji ke.

³¹ Mbé ya be bebaé a nga bo nkômban ésaa? Be na: Mon ôsu. Yésus a nga jô be na: Ma jô mia bebela na. Benyoñe *toya a binga ba bo ébamba ba ye ke mia ôsu éjôé Zambe.

³² Yôanes a nga zu fo'o be mia e zôsôa *zen été, ve mi nji buni nye, ve benyoñe *toya a binga be ébamba be nga buni nye. Ja'ane mi yeneya nalé, mi nji kôñelane minlem a buni nye.

Bebo bisaé ya afube mindi'i mi woon

³³ Vô'ôla'ane *nkana ôfe: Môt a mbe mie *nda, nde ñhe a bé afube mindi'i mi woon a bômane fe de nka'alé, a fa'a ébé ba miate bibuma été a lôñe nkum, a tooé beba'ale été, a kele ñhe ke dulu.

³⁴ Eyoñe ya nkôane bibuma, nde a lôme bebo bisaé bé e be beba'ale afube mindi'i mi woone na be nyoñe bibuma y'été.

³⁵ Ane beba'ale afube mindik be nga bi bebo bisaé bé: be bôme wua, be wôé nyô mbok a lume mfe *mekok.

³⁶ Nde a beta lôme bebo bisaé befe be too abui a dañe ba ya ôsu, be ve bo be avale da.

³⁷ A nga su'ulane lôme mone wé émien be be a jô'ô na: Ba ye semé mone wom.

³⁸ Eyoñe beba'ale afube mindik be nga yene mon be nga jô e bebien été na: Nyôna a ne miene élik; nkelan, ñwôane nye ndembene bi nyoñ éli'i jé.

³⁹ Eyoñe be biya nye, be nga kee afube mindi'i atan a wôé nye.

⁴⁰ Eyoñe ñhe masa afup a soya, a ye bo beba'ale bete aya'

⁴¹ Be nga yalane nye na: A ye wôé bingôngole beba'ale bete mbia ñwôan, a kee afup e mo beba'ale befe mbe ba ye ve nye bibuma éyoñe ja yian.

⁴² Yésus a nga jô be na: Ye mi nji tame lañ e mintilan été na: Ako'o belôñe *nda be nga wua fé nde é bobaneya ako'o ya jua mboone mame Zambe ñwô ñhe le: Nalé a bu'u mvaé a jé e mise mangan!

⁴³ Ajô te ma jô mia na éjôé ja ye vasebane be mia a ja ye veeban e be ayoñ da ye wume bibuma y'été.

⁴⁴ E môt a ye ku ako'o te yôp a ye bu'i, a nyô ako'o te da ye ku yôp, da ye fite nye.

⁴⁵ Eyoñe bivete betuni a Befarizieñ be wô'ôya minkana mite, be nga yeme na mbe a nga kobô be.

⁴⁶ Be nga jeñe na be bi nye, ve be nga ko jama bôte woñ, amu a nga yene nye ane *nkulu mejô.