METIAS 20 - Kalate Zambe Nnomo a Mfefe Mfefé Nkôñelan

Masa a bebo bisaé ya afube woon

¹ Ejôé ya yôp ja funane fo'o ve ane mie ndaa éziñ, nye a nga kui atan mametyé na a nyoñe bebo bisaé asu afube mindi'i mi woon dé.

² Eyoñ a kuiya *tyiñ a bebo bisaé, a mbe na a ya'ane be denié wua e *môs, a nga lôme be afube mindi'i mi woon dé.

³ Eyoñ a beta kui atan bebé *mewolo ébul, a nga yene befe be tele teke jôm ba bo,

⁴ nde a jô balé bete na: Mia fe kelan afube mindi'i mi woon, ma ye ve mia tañ ja yian.

⁵ Ane be nga ke. Nde a beta kui atan bebé zañe *môs a *mewolo melale ya mamengô'é a bo avale da.

⁶ Akui a kui atan bebé *mewolo metan ya mamengô'é ve koone befe be tele, nye be na: Amu jé mi tele va ngume *môs teke bo jôm'

⁷ Be nga jô nye na: Amu môt éziñ a nji nyoñe bia bisaé. Nye be na: Mia fe kelan afube mindi'i mi woon.

⁸ Eyoñe ngô'é é nga kui, mie afube mindi'i mi woon a nga jô nkalakume wé na: Lo'one bebo bisaé a ve be ma'an, ataté ba be nga su'ulane nyoñeban a kui ba be nga taté nyoñebane bisaé.

⁹ Nde ba ya *mewolo metan ya mamengô'é ba so a nyoñe denié wua môt ase.

¹⁰ Eyoñe ba be nga taté nyoñeban be soya be buni'i na ba ye nyoñ a dañe ba bevok, ve be fe be nga nyoñe denié wua môt ase.

¹¹ Eyoñ be nyoñeya, ve taté na ba so'o mie ndaa

¹² be jô'ô na: Besu'ulane so ba ba te saé ve awolo da, wo ya'ane be ane bia aya, e bia bia te jibi ayôñ a adite ya ngume *môs'

¹³ Mie ndaa ve yalane wua ya be be na: A mvôé jam, me nji bo ékotekot mfa'a wôé; ye bia wo bi nji kui *tyiñ ajô denié wua'

¹⁴ Nyoñe denié wôé ô ke. Ma ve môte nyôna denié wua fe ane wo.

¹⁵ Ye me nji bi nguleya bo biôme biam ane ma kômbô? Nge na ye dise dôé da yen *abé ane me ne mbamba môt'

¹⁶ Nalé ate ñhe ba be tele mvus ba ye tebe ôsu a ba ya ôsu ba ye tebe mvus.

Yésus a beta kate foé ya awu dé

¹⁷ Eyoñe Yésus a nga bete na a ke e Yérusalém, a nga nyoñe beyé'é bé awôm a bebaé a dutu be fefe. Be kele'e *zen, nde a jô be na:

¹⁸ Mi lôô bia ke e Yérusalém, a mona môt a ye keeban e mo bivete betuni a *beyeme bekalate, a ba ye ve nye mekua ma yian awu

¹⁹ a ba ye kee nye e be *meyoñ me ne te yeme Zambe be bo nye ane ba kômbô a bôme nye a tyelé nye *krôa, e môse lale a ye wômô.

Nsili nyia Yakob a Yôanes

²⁰ Ane nyia bone be Zébédé a nga zu ba be bone bé, ve kute meboñe si asu ya sili nye jam éziñ.

²¹ Nde a sili nye na: Wo kômbô jé? Minga a nga jô nye na: Jô'ô na, éjôé jôé, e bone bame bana bebaé, ba ye tabe wua mbo nnôme wôé, nyô mbo'o mbo ngale wôé.

²² Yésus a nga yalan a jô na: Mi nji yem e jôm mia sili. Ye mi ne nyu *élaé ma ma yiane nyu? Be nye na: Bi ne ngu.

²³ A nga jô be na: Mfa'a *élaé jam mia ye nyu, ve mfa'a ya tabe mbo nnôme wom a mbo ngale wom saa ke ma ma ve dili, ve asu ba ésaa wom a nga mane kômesane de.

²⁴ Awô'ô be nga wô'ô nalé nde beyé'é bevo'o awôm be nga wô'ô bobenyañ bete bebaé *abé.

²⁵ Ane Yésus a nga loone be a jô na: Mia yeme na bivete ya *meyoñ bia belan éto bemasa jap e be *meyoñ mete, a beta be bôt ba belane ngule njôane jap e nyôle jap,

²⁶ ve nalé ate a ye bo te boban e be mia, môt a kômbô bo beta môt be mia, a ye bo mbo ésaé wônan,

²⁷ a nyô a kômbô bo nyô a ne ôsu be mia a ye bo *ôlo wônan;

²⁸ avale fe ane mona môt nye ke a nji zu na be saane nye, ve asu ya na nye *a saane bôt a ve ényiñe jé na a tañe bôt abui.

Mindindim mibaé ya Yérikô mia yen

²⁹ Akôlô be nga kôlô Yérikô, beta nsamba bôt a nga tôñe Yésus.

³⁰ Mindindim mibaé mi nga too fefele *zen mi nga wô'ô na Yésus a lôt, nde mia taté na mia yôtan: A ñye'ele, mona David, koo bia éngôngo!

³¹ Nsamba bôt ô nga komekane be na be tabe bivô, ve be nga dañe dañe bete metyiñe ngu: A ñye'ele, e mona David, koo bia éngôngo!

³² Yésus ve tebe, a loone be a sili be na: Mia kômbô na me bo mia jé'

³³ Be na: A ñye'ele bo'o na e mise mangan me yen.

³⁴ Yésus ve ko be éngôngo a nambe mise map; awolo te ebien, bôte bete bebaé be nga bo nguleya yen, a tôñe nye.