METIAS 2 - Kalate Zambe Nnomo a Mfefe Mfefé Nkôñelan

Beyeme mam ba zu yene Yésus

¹ Eyoñe Yésus a bialéya e Bétléhém ya Yudé, melu njô bôte Hérôde, ô lôô beyeme mam ya jôb da tôô be nga kui Yérusalém be sili'i na:

² Njô bôte beyude a nga bialé va a ne vé? Amu bi nga yen ôteté vié e jôbe da tôô a bi zuya kañe nye.

³ Eyoñe Hérôde, njô bôt a wô'ôya nalé, metyi me nga ke nye fé baa ngume tisone Yérusalém ôse;

⁴ ve sulane bivete betuni a *beyeme bekalate bese y'ayoñ asu ya yemelane be be e vôme Krist a yiane bialé.

⁵ Be nye na: E Bétléhém ya Yudé amu avale di nde *nkulu mejô a nga tili na:

⁶ Amu wo a Bétléhém, si ya Yudé ô nji dañe dañe tyôtyoé ézezañe minlô minlame ya Yuda, Amu na Njôô a ye so be wo, A ye ba'ale mbame wom Israél.

⁷ Eyoñe te Hérôde a nga loone beyeme mam ômômo'o, a mane tu'a yemelane be be éyoñ be nga yen ôteté.

⁸ A nga lôme fe be Bétléhém, nye na: Kelan mi ke tu'a yemelan ajô mon ate. Eyoñ mi yeneya nye, katane ma foé, nalé ate ma fe ma ye ke kañe nye.

⁹ Eyoñe be maneya wô'ô nkobô njô bôt, be nga téé dulu: ateme na ôteté be nga yene mfa'a jôbe da tôô ô ntele be ôsu, akekui ô nga tebe yôp e zia mone mon a nga bôô.

¹⁰ Ayene be nga yen ôteté be nga vak angôndô ya beta mva'an.

¹¹ Eyoñe be keya kui e *nda, be nga yene mone mon baa Marie nyia wé; be ku si a kañe nye; be mane kuli akume dap a ve nye memvaka: or, ôtu a mir.

¹² Amu be nga veban ayemé e biyeyeme na be bo te beta bulan e be Hérôde, nde be nga nyoñe zene fe a bulan e si jap.

Kôlô'ô si, ô ke mbil Ejipte

¹³ Eyoñe be bulaneya, e teme na éngele Nti a nga yené be Yôsep e biyeyem a jô nye na: Kôlô'ô si ô nyoñe mon baa nyia a tup e mfa'a y? Ejipte a tabe wé akekui ma ye kate wo: Amu Hérôd a jeñe mone na a wôé nye.

¹⁴ Eyoñe Yôsep a kôlôya si, a nga nyoñe mone mon baa nyia wé a alu a ke Ejipte

¹⁵ a nga tabe wé akekui Hérôde a nga wu, nalé ate Njôan ô nga jôban mfa'a Nti anyu *nkulu mejô na: Me nga loone mone wom a so'o Ejipte.

¹⁶ Eyoñe Hérôde a yeneya na beyeme mam be du'uya nye, a nga dañe wô? ôlun. Ane a nga lôme na be ke wôé bone bese: ba ya Bétléhém a afôla si ese ya valé, ataté mimbaé a ke si bebé aval éyoñ a nga bi ayemé e be beyeme mam;

¹⁷ nalé ate njôane Nkulu Mejô Yérémi ô nga tôébane na:

¹⁸ Be nga wô'ô *tyiñ e Rama, ñyôn a abui du, Rachél a yônôk bone bé te kômbô volôbane *nlem, amu bone bete be nji beta bo.

Enyiñe ya Nazarét

¹⁹ Eyoñe Hérôde a wuya, e teme na Yôsep a nga yen éngele Nti e biyeyem Ejipte,

²⁰ a jô'ô na: Kôlô'ô si, nyoñe mon baa nyia ô ke si Israél amu e ne fo'o na ba be nga jeñ ényiñe mone mon be wuya.

²¹ Eyoñe Yôsep a kôlôya si, a nga nyoñe mone mon baa nyia a ke e sii Israél.

²² Awô'ô a nga wô'ô na Arkélaôs a ntoo njôô bôte ya Yudé éjiane Hérôde ésaa wé, ane a nga ko woñe ya ke wé. Eyoñe be zuya lebe nye biyeyem, a nga ke bifase ya Galilé.

²³ A nga ke tabe e tison ba loone na Nazarét, a jalé njôane y'anyu bekulu mejô ñwô ô ne na: Ba ye yôlé nye na mone Nazarét.