METIAS 19 - Kalate Zambe Nnomo a Mfefe Mfefé Nkôñelan

Nye'elane Yésus ajô nsuane minga

¹ Nde da zu bo na, éyoñe Yésus a maneya kobô mejô mete, a nga kôlô Galilé a ke mefôla me si ya Yudé, e Yordane yat.

² Ane ézu'u minsamba mi bôt é nga tôñe nye a a nga saé je wé.

³ Befarizieñ be nga zu be nye na be ve'ele nye be jô'ô na: Ye é ne nkañesane na môt a suu minga wé amu aval étom ése'

⁴ Nye be na: Ye mi nji yeme na Nté biôm, atata'a, a nga té be fam a minga'

⁵ A a nga jô na: Amu nalé, fam ja ye li'i ésaa a nyia a a ye lat a minga wé a ba ye bo bebaane nsône wua.

⁶ Avale ya na be bo te beta bo bebaé ve nsône wua. Ajô te jôme Zambe a lateya, môt a nji yiane kandé je.

⁷ Nde ba jô nye na: Amu jé ñhe Môze a nga bendé mveane kalate ntyaman aluk a nsuane minga'

⁸ Nye ke be na: Môze a nga ve mia nguleya suu binga benan amu ayete ya minleme mienan, ve atata'a mam, nalé a nji tame boban.

⁹ Ma jô mia na: Nyô a suu minga wé, vengevenge ve a lateya a fame fe, a lu'u fe minga mfe, a ntoo fame *mejian.

¹⁰ Ane beyé'é bé be nga jô nye na: Nge nalé nye a né e zañe fam a minga wôna mfi ô nji bo na môt a luk.

¹¹ Nye be na: Saa ñhe bôte bese mbe be ne wô'ô ajô di, ve ba e ne be mveban.

¹² Yaa! Miaé miziñ mi nga bialé nalé e mebume benyia bap; mivo'o ke a mboone bôt; ve mife mi nga bo mibiene nalé amu éjôé ya yôp.

Jôka'an ayôme bongô e zu be ma

¹³ Ane be nga zuu ayôme bongô na a beté de mo a ye'elan. Nde beyé'é be nga viane bamé be.

¹⁴ Ve Yésus a nga jô na: Jôka'an ayôme bongô, a te kamane de na e zu be ma, amu éjôé ya yôp é ne jôme mevale me bôte ma.

¹⁵ Eyoñ a maneya beté be mo, a nga kôlô valé.

Nkukume ndômane môt

¹⁶ Nde môt éziñ a nga zu be nye a sili nye na: Za mbamba jam ma yiane bo na me yen ényiñe ya nnôm éto'

¹⁷ Yésus a nga jô nye na: Amu jé wo sili ma nsili ajô mbamba jam? Môte wua a ne mbamba; nge wo kômbô ñhe nyin ényiñ, ba'ale'e mebendé.

¹⁸ Nye Yésus na: Mebendé mevé? Yésus nye na: Te wôé môt, te bo *mejian, te wup, te bôte môt ajô,

¹⁹ semé'é ésoo baa nyua a wo ye nye'e môt a ne wo bebé ane womien.

²⁰ Ane ésoé ndôman éte é nga jô nye na: Me ba'aleya mam mete mese; jé éfe ja beta jembane ma'

²¹ Yésus a nga jô nye na: Nge wo kômbô bo te ayeñ, kelek a kuan akume dôé a ve minzôzoé, a wo ye bi akum e yôp a za'a va a tôñe ma.

²² Eyoñ ésoé ndôman é nga wô'ô ajô te, nde a nga ke a wô'ô ôlun; amu é mbe fo'o na a nga bili biôm abui.

Nju'u na nkukum ô nyiin éjôé Zambe

²³ Yésus a nga jô beyé'é bé na: Ma jô mia bebela na nkukum ô ne ayaé ya nyiin éjôé ya yôp.

²⁴ Ma beta jô mia na: E ne tyi'ibi be kamel na a tulan *abé ôndôndo a dañe na nkukum ô nyiin éjôé Zambe.

²⁵ Eyoñe beyé'é be wô'ôya nalé, be nga kame beta nkaman be jô'ô na: Za ñhe a ne nyiiban'

²⁶ Eyoñ a fombôya be, Yésus a nga jô be na: Jame te é se nguleya boban e mfa'a bôt, ve mfa'a Zambe, mam mese me ne boban.

²⁷ Ane Pierre a nga yalan a jô nye na: Tame yen, bi maneya li'i mam mese a tôñe wo, za jame ñhe da yange bia'

²⁸ Yésus a nga jô be na: Ma jô mia bebela na: Mia mi maneya tôñe ma, éyoñe mam ma ye bobane mimfefé, éyoñe mona môt a ye tabe éto njôane jé, mia fe mia ye tabe bito bi njôan awôm a bibaé a tyi'i *meyoñ ya Israél awôm a mebaé mejô.

²⁹ A nyô ase a nga li'i menda, nge bobenyañ nge bekal nge ésaa nge nyia, nge *bon, nge mefup amu jôé dam, a ye nyoñ a lôte ntete biôm a bi fe ényiñe ya nnôm éto.

³⁰ Abui bôt é tele ôsu éyoñe ji ba ye tebe mvus a ba be tele mvus ba ye tebe ôsu.