METIAS 14 - Kalate Zambe Nnomo a Mfefe Mfefé Nkôñelan

Awu Yôanes Babtist

¹ Melu mete njô bôte Hérôde a nga wô'ôtane duma Yésus,

² nde a jô bebo bisaé bé na: Nyôna a ne Yôanes Babtist, a wômôya miñwuan, ajô te a bo de bitua bi mam.

³ Bebela a ne na, éyoñe Hérôde a biya Yôanes Babtist, a nga kaa nye ngata'a a futi nye mimbôk. A nga bo nye nalé amu Hérôdiade, minga Filip monyañe Hérôde.

⁴ Yôanes a nga jô Hérôde na: E nji yiane na a bo nyô ngal.

⁵ A nga jeñe zene ya wôé nye, ve da a ko bôte woñ amu be nga yene Yôanes na a ne *nkulu mejô.

⁶ Eyoñe *môs abialé Hérôde ô nga kui, ngone Hérôdiade ve zu jem e bôt été a Hérôde a nga yene jame te mvaé,

⁷ ve kane nye ngana na: a ye ve nye jôm a ye sili.

⁸ A amu ntindane nyia wé nde a nga jô na: Va'a ma nlô Yôanes Babtist e be'e été va.

⁹ Ôlune *nlem, amu ngana a nga mane kan a amu bôte a nga mane bañete be ngenan, nde njô bôt a bendé na be ve nye wô;

¹⁰ a nga lôme bôt be ke wôé Yôanes e *nda mimbôk;

¹¹ be nga soo nlô e be'e été a kee wô ngone minga, nye ki ve ke kee wô nyia wé.

¹² Nde beyé'é be Yôanes be nga zu be'e mbime wé a ke jame wô soñ. Be nga ke kate Yésus foé.

Yésus a ve bôte toyini étan bidi

¹³ Eyoñe Yésus a wô'ôya foé éte, a nga kôlô valé éfunga éte a ke e vôm a ne tee bôt a too étam. Eyoñe jama bôt a wô'ôya nalé, be nga tôñe nye a mebo be so'o bitison.

¹⁴ Eyoñ a kuiya nseñ, a nga yene bizu'u bi bôt, a nga ko bie éngôngo, a nga saé minkôkone miap.

¹⁵ Eyoñe ngô'é é nga kui, beyé'é bé be nga zu vôm a nga too a jô na: Vôme nyô bôt be nji tabe été, awolo ki e lôteya abui, su'u bôt be ke mfa'a minlam mi né na be kuse bebiene bidi.

¹⁶ Yésus a nga jô be na: Be nji kôlô va: miabebien va'ane be bidi.

¹⁷ Be nye na: Bi bili va ve belet étan a kos ébaé.

¹⁸ Nye be na: Za'ane ma bie vana!

¹⁹ A a nga bendé bôte na be tabe bilok; éyoñ a nyoñeya belet étan a kos ébaé a a maneya bete mis mfa'a ya yôp, a nga botane bie; wôna éyoñ a maneya be'e belet, a nga kalane je beyé'é be ve je bôt.

²⁰ Bese be nga di a jaé. Be nga vaa afufus e nga buk minkoé awôm a mibaé njalan.

²¹ Ba be nga di be mbe befam bebé toyini étan, te lañe binga a bongô.

Yésus a wulu e mendime yôp

²² Eté été, a nga tindi beyé'é béé na be dañ éfunga a ke nye ôsu e kindi'i fok akekui a maneya suu jama bôt.

²³ Eyoñ a maneya suu jama bôt, a nga bet mfa'a ya nkô vôm étame na a ye'elan.

²⁴ Efunga é nga too nya ôyabe a si, mintyôa mi ndeñele'e je amu évuñulu é mbe é jimbi'i je.

²⁵ Eyoñ alu e ntoo abui, a nga zu be be a wulu'u e mañe yôp.

²⁶ Eyoñe beyé'é be nga yen ane a wulu e mañe yôp, be nga ko woñ be jô'ô na: A ne kôn. Nde be nga yôn a woñ ôse.

²⁷ Eté été, Yésus a nga kobô be na: Taba'ane ndi, ma le, te koone woñ.

²⁸ Pierre a nga yalane nye na: A Nti, nge wo le, jô'ô ma me zu vôm ô né me wulu'u mendime yôp.

²⁹ Nye na: Za'ak. Eyoñ a kôlôya éfunga été, Pierre a nga wulu mendime yôp a ke e vôme Yésus a nga too.

³⁰ Eyoñ a yeneya évuñulu, a nga ko woñ a taté na a nyoñ e mendim, nde a nga yôn a jô'ô na: A Nti nyi'i ma!

³¹ Eté été, Yésus a nga same wo a bi nye a jô nye na: A te dañe buni, amu jé ô nga bo bisô'

³² Eyoñ be dañeya éfunga été, ane évuñulu é nga je'ebe.

³³ Efunga été wé nye be nga kute nye meboñe si a jô na: Bebela ô ne fo'o mona Zambe!

Yésus a saé bôt e Genézarét

³⁴ Eyoñ be dañeya yat, be nga kui si ya Genézarét.

³⁵ Eyoñ be yemeya nye, bôte ya afôla te be nga mialane foé jé éfuse si te ése a be nga soo nye minkôkon mise.

³⁶ Be nga ye'elane nye na a jô'é be be nnambe nye ve ñwôndé ngômesan; ba bese be nga nnambe wô be nga bo *mvo'é.