METIAS 13 - Kalate Zambe Nnomo a Mfefe Mfefé Nkôñelan

Minkana ya éjôé

¹ Môs ôte, Yésus a nga kôlô *nda a ke tabe e nsa'a mañ.

² Ane bizu'u bi bôt bi nga sulane nye bebé, nde a nga jibi dañ e bial a tabe été; jama bôt a nga tele e kindik.

Nkana mmiase mvoñ

³ A nga kobô be abui mam a minkana nye na: Mmiase mvoñ a nga kui, asu ya miase mvoñ,

⁴ ésaé zañe, va, nde mefese me mvoñ mevok ma ku e fefele zen; anone ya yôp ve so a mane di me mese.

⁵ Mevok me nga ku e vôme *mekok me né, e vôme metek me nji bo abui; me nga ji'a faa amu metek me nji bo édok;

⁶ éyoñe jôp é nga tôô, me nga dik a amu me mbe teke minkañ, nde me nga mane viele.

⁷ Mefese mevok me nga ku e biyo été, nde biyo bi nga yaé a mane wôé me.

⁸ Mevok me nga ku e mbamba si, a wume bibuma, fo'o éziñ ntet nyô fok mewôm mesaman a nyô fok mewôm mela!

⁹ Môt a bili melo ya wôk a wô'ôk!

¹⁰ Ane beyé'é be nga zu bebé a sili nye na: Amu jé wo kobô be a minkana'

¹¹ A nga yalane na: Amu é ne mia mvebane na mi yem minsolane mi mam y'éjôé ya yôp, ve mfa'a balé bete, e nji bo be mveban.

¹² Amu nyô a bili nye ba ye beta ve a a ye nyiñ abui afok été; ve nyô a nji bi, ba ye vaa ja'ane jôm a bili.

¹³ Ajô te nde ma kobô be a minkana; amu ba fombô ve teke yen, ba kee melo ve teke wôk.

¹⁴ A mejô *nkulu mejô Ezayi a nga kobô ma tôéban mfa'a wobe na: Mia ye ju'u baé melo ve teke wôk, mia ye ju'u fombô ve teke yen

¹⁵ Amu minlem mi bôte bana mi maneya bo afip be maneya bo ayet mfa'a ya melo map, be maneya buti mise map na be bo te vô'ôlô a melo map na be bo te wôk a minleme miap. A na be bo te kôñelane minlem. A me nga ye bo be *mvo'é.

¹⁶ Ve mia, mise menan me ne mevak amu ma yen, melo menane fe avale da amu ma wôk.

¹⁷ Ma jô mia bebela na: Abui bekulu mejô, abui bezôsôô be bôt be nga kômbô yene mam mia yen, ve be nji yene me, be nga kômbô wô'ô mam mia wôk, ve be nji wô'ô me.

Atinane * nkana mmiase mvoñ

¹⁸ Mia, vô'ôla'ane ñhe *nkana mmiase mvoñ:

¹⁹ Nyô ase a wô'ô mejô y'éjôé ya yôp teke me nyoñ, nalé a ne na ndu'u bôt a so a nyoñe jôm é nga béban e nleme wé été; avale te nde mvoñ é nga béban fefele *zen é né.

²⁰ Mvoñ é nga béban e mevôm me ne *mekok é ne môt a ne na, nné ane a wô'ô mejô me Zambe, ve ji'a nyoñe me a mevak;

²¹ ve a nji bi minkañ e be émien, a ne môte ya mone nté, nné ane ôlun a étibela'a bia so amu mejô me Zambe nye ve ku.

²² Mvoñ é nga béban e biyo été, é ne môt a wô'ô mejô me Zambe ve nye'ane mam ya *si nyô a akum y'été bia mane tibi me yôp, môt ase a li'i teke bibuma.

²³ Mvoñ é nga béban e mbamba si é ne môt a wô'ô mejô me Zambe a nyoñe me: éyoñe te a be'e bibuma a wum fese jia ntet, nyô fok mewôm mesaman, a nyô fok mewôm mela.

Mbia élok

²⁴ A nga beta liti be *nkana ôfe na: Ejôé ya yôp ja funane môt a nga bé mbamba mvoñ afube dé été.

²⁵ Nté bôt be mbe ôyo, nde nsiñe wé a nga zu a miase mbia élok ézezañe blé a bulan.

²⁶ Eyoñe mvoñ é nga faa a wume bibuma, éyoñe te mbia élo'o fe a nga yené.

²⁷ Ane bebo bisaé be mie ndaa be nga zu be nye, a sili nye na: Ye sa mbamba mvoñ nye ô nga bé afube dôé été? Amu jé mbia élok a yené été.

²⁸ Nye ki a nga yalane be na: Ke môt a vini ma nye a nga bo ésaé te. Bebo bisaé be nga sili na: Ye bi ke mane té mbia élo'o si'

²⁹ Nye be na: Momo a za bo na éyoñe mia té mbia élok, mi nga viane té ba be blé nsamba wua;

³⁰ jôka'ane bebaane be yaé éyoñe jia akekui éyoñe ya nkôane bidi. A éyoñe mvaane bidi mefup wo ye kui, ma ye jô bekôane bidi na: Tata'a vaane mbia élok a ka'a nye mimbom asu ya di'i mie, ve kô'ane blé angune dam.

Fes ôndôndôô

³¹ A nga ku be *nkana ôfe a jô na: Ejôé ya yôp ja funane fes ôndôndôô nje môt a nga nyoñ a ke mias afube dé.

³² Fes éte é ne fo'o tyôtyoé a lôte memvoñ mese ve éyoñ é yaéya, ja bo anen a dañe bijebejeba bivok a ja bo élé a kui na anone ya yôp da zu bebe été a lôñe mumba'a e mintyaé mié.

Jôm ja vusu avut

³³ A nga ku fe be *nkana ôfe a jô na: Ejôé ya yôp ja funane jôm ja vusu avut nje éte, éyoñe minga a nyoñeya je a nga solé je e mve'an avut biyoñ bilal été a kui avut ése da mane vus.

Yésus a ku minkana amu jé'

³⁴ Yésus a nga kobô jama bôt mam mete mese e minkana; a nji kobô be jam éziñ te minkana:

³⁵ nalé jame *nkulu mejô a nga jô da ye tôéban na: Ma ye kui anyu dam a minkana, ma ye kobô mam me nga soléban ataté éyoñe *si nyô é nga téban.

Mesuu me * nkana mbia élok

³⁶ Nde éyoñ a maneya suu jama bôt, ane a nga ke e *nda jé. Beyé'é bé be nga zu vôm a nga too a jô nye na: Kate bia mesuu me *nkana mbia élok ya afup.

³⁷ Nde a yalane be na: Mmiase mbamba mvoñ a ne Mona môt.

³⁸ Afup e ne si nyô; bone y'éjôé mbe be ne mbamba mvoñ; bone be *satan mbe be ne mbia élok.

³⁹ Nsiñ a nga miase mbia mvoñ a ne satan; éyoñe nkôane bidi ô ne asu'ulan; bekôane bidi be ne beéngele.

⁴⁰ Tuka'a yemane na avale ba nyoñe mbia élok a di'i nye nduan, nalé ate a ye boban asu'ulan.

⁴¹ Mona môt a ye lôme beéngele bé, ba ye nyoñe mam mese ma kolé bôt ôbak a ba bese ba bo *abé,

⁴² a kee be atane ya éjôé jé, ba ye wua be mbe'e nduan été, e wé a ye bo ve du a nlatane mesôñ.

⁴³ Wôna bezôsôô be bôt ba ye faé ane jôp e Ejôé ésaa wop. Nyô a bili melo, a wô'ôk.

Akume é solô

⁴⁴ Ejôé ya yôp ja funan akum be nga solé afup nde môta binam, éyoñ a someya de, a nga solé; amu mevak a nga bili, nde a ke a kuane biôme bise a bili a kus afube te.

Atabe e ne édima

⁴⁵ Ejôé ya yôp ja beta fe funane mbo makit éziñ a mbe a jeñe metabe me ne abeñ.

⁴⁶ Eyoñ a yeneya atabe e ne édima, a nga ke a kuane biôme bise a nga bili a kuse de.

Nkana avot asu kos

⁴⁷ Ejôé ya yôp ja beta fe funan avot é ne ñwuan e mañ a nde da bi mevale me kos mese.

⁴⁸ Eyoñ é jaéya a be dutuya de e kindik, bôt ve tabe si a futi mbamba kos e minkoé été a wua nyô é ne ébo atan.

⁴⁹ Nalé ate nye a ye boban asu'ulan: beéngele ba ye zu a kandé mbia be bôt ézezañe ya ba be ne zôsôô

⁵⁰ a wua be e mbe'e nduan; e wé a ye bo du a nlatane mesôñ.

⁵¹ Ye mi maneya wô'ô mam mete mese? Beyé'é na: Yaa!

⁵² Nye be na: Amu ajô te nde mfase bekalate ase a ntoo ñye'é ya éjôé ya yôp a funane mmie ndaa a kuli akume dé atan mimfefé mi biôm a minnôm mi biôm.

Ba biasé Yésus e Nazarét

⁵³ A nga bo na, éyoñe Yésus a maneya ku minkana a nga kôlô valé.

⁵⁴ Eyoñ a kuiya vôm a nga bialé (Nazarét), a nga ye'ele bôt e meba me Zambe map a kui na be vembe be sili'i na: Fek a bitua bi mam bia so nyôna vé'

⁵⁵ Ye sa mona kabinda nyô? Ye nyia wé a nji bo jôé na Marie? Bobenyañe ke na: Yakob a Yôsep, Simon a Yudas'

⁵⁶ Ye bekale bé bese be nji bo be bia va? E mam mese ma ma so nye vé'

⁵⁷ A nga bo be na be kolôban ôbak. Yésus nye be na: Nkulu mejô a biasébane fo'o ve si jé a *nda jé.

⁵⁸ Amu be mbe te mbunan (mfa'a wé) nde a nga bo te bo abui bitua bi mam.