METIAS 10 - Kalate Zambe Nnomo a Mfefe Mfefé Nkôñelan

Beyé'é awôm a bebaé ba ke nlôman

¹ Eyoñ a looneya beyé'é bé awôm a bebaé, Yésus a nga ve be ngu e be mimbia minsisim na be vaa mie, na be saé aval ôkon ese a aval éyem ése.

² Biyôlé minlôman awôm a mibaé mbie bi: wu ôsu, Simon, nye ba loone na Pierre, a André, monyañe wé; Yakob, e mone Zébédé a Yôanes, monyañ;

³ Filip a Bartélémi; Tômas a Metias, nyoñe betoya; Yakob e mone Alfé a Tadé;

⁴ Simon nkaman ayoñ a Yudas Iskariôt nyô émien a nga koñe nye.

⁵ Eyoñe Yésus a nga lôme minlôman awôm a mibaé mite, a nga jô be na: Te nyôñane zene betebuni a te nyian e tisone bôte ya Samari;

⁶ ve nne kelan mfa'a mintômba y'ayoñ Israél mi ne njañan mi né.

⁷ E *zen, yôta'ane na: Ejôé ya yôp é ntoo bia bebé.

⁸ Saane minkôkon, wômela'ane mimbim, bo'one minzezame *mfuban, tita'ane mimbia minsisim. Mi nga nyoñ te kus, va'ane fe te kuan.

⁹ Te nyoñane or nge argent, nge moné ya futi e mimfe'e mienan,

¹⁰ nge mfek ya wulu wô, nge melô'ô mebaé, nge besilefas, nge *ntum, amu mbo ésaé a yiane nyoñe bidi bié.

¹¹ Tison nge nlam ôse mia kui, tata'a yemelan za a yiane nyoñe mia a taba'ane valé akekui éyoñe ya nkôlane wônan.

¹² Eyoñ mia nyiin e *nda, bata'ane je;

¹³ nge *nda éte ja yian, *mvo'é jenan é za'a été; ve nge é nji ke yian, *mvo'é jenan é bula'an e be mia.

¹⁴ Nge ba bo te nyoñe mia a nge ba bo te vô'ôlô mejô menan, éyoñe mia kôlô *nda éte nge tison éte, sasane mbulu'u ya mebo menan.

¹⁵ Ma jô mia bebela na, e môse ntyi'ane mejô, tison éte ja ye dañe tôban ayaa a dañe Sodom a Gômor.

Bôt ba ye feme mia

¹⁶ Mi lô na ma lôme mia ane mintômba ézezañe beze; bo'one ñhe fek ane benyo a évôvoé ane bezum.

¹⁷ Taba'ane bôte ntyee: ba ye kee mia e meba mejô a bôme mia e meba me Zambe map.

¹⁸ Ba ye somane mia e be bengovina a bejô bôt amu ma; nalé a ye bo ngaa a bo'olô mfa'a wop a betebuni.

¹⁹ Eyoñ ba ye koñe mia, te tyelane minleme yôp ya yem ane mia ye kobô nge ane mia ye jô: Jam mia ye jô da ye vebane be mia awolo te,

²⁰ amu sake mia mia ye kobô, ve Nsisim Esoo wônan ñwô wo ye kobô be mia.

²¹ Monyañ a ye kee monyañ awu, a ésaa e mone wé; *bon ba ye wosane bebiaé a ve be mekua ya awu.

²² Bôte bese ba ye vini mia amu jôé dam. Ve nyô a ye yeme ngu a kui asu'ulan nye a ye nyiiban.

²³ Eyoñe ba ye tôñesane mia e tison éziñ tuban a ke e tisone fok. Ma jô mia bebela na mia ye bo te mane tôbane bitison ya Israél te na mona môt a so.

²⁴ Nyé'é te dañe nye'ele wé, nge mbo ésaé e dañe masa wé.

²⁵ Mfa'a ñye'é da sili na a bo ane nye'ele wé a mfa'a mbo ésaé a bo ane masa wé. Mbôle be nga loone mie ndaa na Bélzébul, kô fé ba ye jô de mfa'a bôte ya *nda jé!

Te mia ko woñ éziñ

²⁶ Te koone ñhe be woñ! Te ke jôm é butu ja ye bo te yanebe, teke jam éziñ é ne asoé bôt ba ye bo te yem.

²⁷ Jame ma jô mia e dibi été, katane de bizôña môs; jame mia wô'ô ôfôfoé, yôta'ane de bikôndô'ô yôp.

²⁸ Te koone ba ba wôé nyôle woñ ve be too te ngule ya wôé nsisim; ve viana'ane, koone woñ nyô a ne wôé *nsisim a nyô a wua bie ébé nduan.

²⁹ Ye be nji kuane bemvokuma bebaé frank jia? Ve da, teke wua ya be be a ne ku si, ésoo wônan teke yem.

³⁰ Mfa'a wônan, to'o ésile jenan ése, é ne nlañan.

³¹ Ajô te ñhe te koone woñ: mia mi ne beta tañ a dañe ézu'u bemvokuma.

³² Nyô ase a ye meme na a ne éñwom asu bôt, ma fe ma ye meme na me ne éñwé asu ésaa wom a ne yôp.

³³ Ve nyô a kate ma bôt été, ma fe ma ye kate nye asu ésaa wom a ne yôp.

Sake * mvo'é ve nkpwaté mekôn

³⁴ Te bunane na me nga zu soo *mvo'é e si nyô; me nji zu soo *mvo'é, ve nkpwaté mekôn.

³⁵ Yaa! Me nga zu kandé fam baa ésaa, ngon baa nyia, mbom baa ntyi:

³⁶ besiñ be môt ba ye bo bôte ya *nda jé.

Bene womien ô tôñe Yésus

³⁷ Nyô *a nye'e ésaa nge nyia a dañe ma a nji yiane ma; nyô *a nye'e monafame wé nge monaminga wé a dañe ma a nji yiane ma.

³⁸ Nyô a bo te be'e *krôa jé a bo te tôñe ma, a nji yiane ma.

³⁹ Nyô a kaman ényiñe jé a ye jañele je a nyô a ye jañele ényiñe jé amu ma a ye je beta yen.

Nyô a nyoñe mia a nyoñe mamien

⁴⁰ Nyô a nyoñe mia a nyoñe mamien, a nyô a nyoñe ma a nyoñe nyô a nga lôme ma.

⁴¹ Nyô a nyoñe *nkulu mejô amu na a ne *nkulu mejô a ye nyoñe ma'ane me *nkulu mejô, a nyô a nyoñe zôsôa môt amu na a ne zôsôa môt a ye nyoñe ma'ane me zôsôa môt.

⁴² Nyô a ye ve wua ya oyôme bôte di a too ñye'é, ja'ane ve *élaé mendime na a nyu, ma kate mia bebela na, a ye bo te dimili ma'ane mé.