METIAS 1 - Kalate Zambe Nnomo a Mfefe Mfefé Nkôñelan

Endane Yésus Krist

¹ Kalate éndane Yésus Krist, e mona David, e mon Abraham.

² Abraham a nga biaé Izak, Izak a nga biaé Yakob, Yakob a nga biaé Yuda baa be bobenyañ.

³ Yuda a nga biaé Farés a Zara alu'u baa Tamar. Farés a nga biaé Esrôm, Esrôm a nga biaé Aram.

⁴ Aram a nga biaé Aminadab, Aminadab ke a biaé Naasôn. Naasôn ke a biaé Salmôn.

⁵ Salmôn a nga biaé Bôaz alu'u baa Rahab. Bôaz ke a biaé Yôbéd alu'u baa Rut. Yôbéd a nga biaé Izayi.

⁶ Izayi ke a biaé David, njôô bôt. David a nga biaé Solômon alu'u baa minga Urie,

⁷ Solômon a nga biaé Rôbôam, Rôbôam a nga biaé Abia, Abia ke a nga biaé Asaf.

⁸ Asaf a nga biaé Yôzafat, Yôzafat ke a nga biaé Yôram, Yôram ke a biaé Ozias.

⁹ Ozias a nga biaé Yôatam, Yôatam a nga biaé Akaz, Akaz ke a biaé Ezékias;

¹⁰ Ezékias a nga biaé Manasé, Manasé a nga biaé Amôs, Amôs ke a nga biaé Yôzias;

¹¹ Yôzias ke a biaé Yékônias a bobenyañ, valé be too minkôm e Babilôn.

¹² E mvus éto minkôme ya Babilôn, Yékônias a nga biaé Salatiél, Salatiél ke a biaé Zôrôbabél.

¹³ Zôrôbabél a nga biaé Abiud, Abiud a nga biaé Eliakim. Eliakim ke a biaé Azôr;

¹⁴ Azôr a nga biaé Sadok Sadok ke a biaé Akim. Akim a nga biaé Eliud;

¹⁵ Eliud a nga biaé Eléazar, Eléazar a nga biaé Matañ, Matañ ke a biaé Yakob.

¹⁶ Yakob ke a nga biaé Yôsep nnôme Marie nyô a nga biaé Yésus ya ba loone na Krist.

¹⁷ Nde ñhe miaé mi bôte mise, ataté Abraham a kui David mi ne awôm a minyin; ataté ke David a kui éto minkôme ya Babilôn miaé mi bôt awôm a minyin; ataté éto minkôme ya Babilôn a kui Krist miaé mi bôte fe awôm a minyin.

A Yôsep, te ko Marie woñ!

¹⁸ E nne abialé Yésus Krist e nga boban avale di: Nyia wé, Marie, a nga bili *atiñ aluk a Yôsep; valé be ngenan te fulan, ateme na a mbe'e abume mon a ngule Mfufube Nsisim.

¹⁹ Ve mbôle Yôsep, e nnôme wé, a mbe zôsôa môt, teke kômbô kulane nye, nde a nga tyi'i na a suu nye asoé.

²⁰ A ngenan a kele a bindi mam mete e nleme nalé, nde éngele Nti a zu kui nye nlô biyeyem a jô nye na: A Yôsep, mone David, te ve'ele ko woñe ya nyoñe Marie, e minga wôé. Amu na, e mon a ye bialé be nye a ne ésaé Mfufube Nsisim.

²¹ Ajô te a ye biaé Monafam, ô yôlé nye jôé na Yésus; amu a ye kôté ayoñe bôt éto minseme jap.

²² Jame te ese e nga boban ane Nti a nga kobô anyu Nkulu Mejô na:

²³ Tame yen éndune ngone minga ja ye nyoñ abum a biaé monafam a ba ye yôlé nye jôé na: Emmanuel, nalé a tinane na: Zambe a ne a bia.

²⁴ Avee Yôsep a nga vee ôyo, nde a nga bo fo'o v'ane éngele Nti a nga bendé nye, ve nyoñe minga wé;

²⁵ a a nji yeme nye akekui a nga biaé monafam nyô a nga yôlé Yésus.