MARKUS 9 - Kalate Zambe Nnomo a Mfefe Mfefé Nkôñelan

¹ E nde a nga kate fe be na: Ma bele fo'o ane ma jô mia na, e bôt be tele vana ba, bevo'o y'été ba ye bo teke wu, akekui be tameya yen ane Ejôé Zambe ja so a ngu.

Yésus a veñesan a faé ane éfufup

² E mvuse melu mesaman, e nde Yésus a nyoñe Pierre baa Yakob a Yôanes, a kee ve be étam avie, e beta nkôle yôp. Ane a nga mane tyendé nyôl e mise mab été.

³ Mengômesane mé me nga ngemban a bo angôndô éfumulu, avale woseman éziñ ya *si nyô a se ngul ya bo na éndelé é fum nalé.

⁴ Ane Elie baa Môze be nga yené be mis, baa be Yésus be la'ane minlañ.

⁵ E nde Pierre a nga nyoñ nkobô a jô Yésus na: A Rabbi, e ne mvaé na bi tabe vana. Nlôñane bibem bilaa, wô jia, Môze jia, Elie ke jia.

⁶ A nji ke fo'o yem e jôm a jô, amu be mbe be fô'ôba'an a woñ.

⁷ E nde *nkut ô nga zu buti be yôp. Ane *tyiñ é nga so e *nkut été na: Nyuna a ne mone wom ma dañe nye'e, vô'ôla'an nye.

⁸ Atemetem na, éyoñ be nga ke ba fombô mbôma'ane, be teke fe beta yene môt éziñ mfe, ve Yésus étam baa be nye.

⁹ Eyoñ be nga siliki be susuk e nkôle si, e nde a nga ve be abendé na, be bo te kañete môt éziñ e mam ba te yen, ve akekui éyoñ Mone Môt a wômôya, a so'o miñwuan.

¹⁰ E nde be nga ba'ale abendé te, ve ba ke ba silan e zañe jab bebien-bebien jôm é ne na, e wômô a so miñwuan.

Nsili beyé'é ajô Elie

¹¹ Ane beyé'é be nga sili Yésus nsili a jô na: Amu jé Beyeme-bekalate ba jô na Elie a yiane taté so'

¹² E nde a nga yalane be a jô na: Elie a yiane fo'o taté so a kôme mam mese. Ve amu jé e ne ntilan ajô Mone Môt na, a ye bi mintaé abui a tôban ébiasé'

¹³ Ajô te ma kate mia na Elie a soya, ane be nga bo nye aval ese be nga kômbô, aval ane e ne ntilan ajô dé.

Yésus a vaa mongô mbia nsisim

¹⁴ Eyoñe be zuya koone beyé'é bevok, e nde be nga yen étua abui bizu'u bi bôt, be too be mbôma'ane, a Beyeme-bekalate, baa be be be sañeta'an.

¹⁵ Eyoñe nkunda bôt ôse wu ô yemelaneya nye avôl-avô, ane angônda woñ a nga taté bi be, be bumu ñhe mimbi a ke wubane nye.

¹⁶ E nde a nga sili be na: Jé mia be be mia sañetan'

¹⁷ Ane môte wua ya ékoone bôt jina a nga nyoñe nkobô, nye na: A Ñye'ele, ma te zuu mona fame wome nyuna be wo, a bili nsisime mvuk.

¹⁸ E vôm ase nsisime ôte wo bi nye, wo dum nye e si, avul e nga kui nye anyu, a nga wôté mesôñ, a mane yemele. Me jôya beyé'é bôé na be titane nsisime ôte, ve be teke'e ngu.

¹⁹ Ane Yésus a nga yalane be a jô na: A mvoñe bôt é ne teke mbunane nyuna, ntaa vé ma ye tabe a mia, ntaa vé ma ye jibi mia? za'ane me nye bebé vana!

²⁰ E nde be nga zuu nye mongô. Ayene *nsisim ô nga yene Yésus, été été, ane ô nga bo mongô na a kpwemetan. Ane a nga ku e si a nga ke a bi'iti, avul ve kui nye anyu.

²¹ E nde Yésus a zu sili ésaa na: Eyoñ évé jame te e nga taté nye? Ane a nga yalane na: Aso mongô.

²² Biyoñ abui, *nsisim wo wua nye, nge sa e nduan, wôna e mendim, na ô wôé nye. Ajô te, nge ô ne fo'o ngule ya bo jam éziñ, volô'ô bia, ko bia éngôngo.

²³ Ane Yésus a nga jô nye na: Nge ô ne ngule ya bo a! ke mame mese me ne ngule ya boban e be môt a bili mbunan.

²⁴ Eté été, ane ésaa mongô a nga yôtan a jô na: Ma buni, volô'ô ma e vôm: Me ngenan te buni.

²⁵ Ayene Yésus a nga yene na jama bôt a nga mane tôkan vôm ate, e nde a nga bame mbia *nsisim a jô'ô na: A nsisime mvuk a ndok, ma ma jô wo na: Kôlô'ô be nye, ô bo teke beta nyiin e be nye!

²⁶ Ane *nsisim ô nga bôé ñyôn a minkpwemetan, a vam atan. E nde mongô a nga bo ane mbim, bôte bese be nga jô na: Ke a wuya!

²⁷ Ane Yésus a nga bi nye e wo, a bete nye e si, ane a nga tebe tetele.

²⁸ Abulan a nga bulan e *nda jé, ane beyé'é bé be nga sili nye, baa be nye be to étam na: Amu jé, bi bia te kate titane mbia nsisime ate'

²⁹ Ane a nga yalane be na: Mvoñ minsisim éte é se ngul ya kôlô a *zen éziñ fe, fo'o ve a meye'elan.

Yésus a beta kate foé awu dé a ñwômane wé

³⁰ Nkôlan ya valé ane be nga tyii e Galilé, ve da Yésus teke kômbô na môt éziñ *a yem nalé.

³¹ Ane ñhe a nga ke a ye'ele beyé'é bé, a jô'ô be na: Ba ye koñe Mone Môt, na bôt be bi nye. Ba ye wôé nye. Ve da, éyoñ a wuya, e mvuse *môs mila a ye wômô.

³² Mfa'a wop, be nji ke tu'a wôk ajô te, ve da be ko woñe ya sili nye minsili.

Za nye a dañ'

³³ Ane be nga ke e Kapernawum. Eyoñ a nto e *nda été, e nde a sili be na: Jé mia te zu mia sañetan e zenezen'

³⁴ Ane be nga ku bivô, amu be mbe be sañeta'an e zenezen na be yem za nye a dañ'

³⁵ Atabe a nga tabe e si, ane a nga loone Beyé'é awôm a bebaé, a jô be na: Nge môt éziñ a kômbô bo môt ôsu, a bo'o ntebe mvus ya bôte bese, a mbo bisaé asu bôte bese.

³⁶ E nde ñhe a nyoñ mone mongô a tele nye e zañe bôt ane a nga be'e nye e mo yôb a jô na:

³⁷ E môt a ye nyoñe ôyôme mongô wua avale di e jôé dam, mamiene le a nyoñ. E nde fe môt a nyoñe ma, sake ma a nyoñ, a nyoñe Nyô a nga lôme ma.

E môt a nji bo e ngame yat, a ne ngame jangan

³⁸ Yôanes a nga jô nye na: A Ñye'ele, bia te yene môt éziñ a tita'an mimbia minsisim e jôé dôé, e nde bia te jeñe *zen ya kame nye na a bo teke bo de, amu a nji zu a tôñe bia e nsamba wongan.

³⁹ Ane Yésus a nga jô na: Te kamane nye, amu na teke môt éziñ a bo étua jam e jôé dam, a ne ji'a beta kobô ma *abé été été.

⁴⁰ E nde ñhe, e nyô a nji tebe bia e ngame yat, nye a ne ngam jangan.

⁴¹ Ajô te, e môt ase a ye nyuu mia ékpwase mendim amu na mi ne bôt be Krist, ma kate mia bebela na, a se ngul ya jañele ma'ane mé.

Meleb ajô nkolan ôbak a bibu'a biangan

⁴² E môt ase a ye dutu wua ya ayôme bongô da buni ma dina na a ku *abé été, jam da dañ mvaé mfa'a wé e ne na, be fañe nye ako'o nnen ba ko'o de bidi *tyiñ, a wua nye e mañ été.

⁴³ Ajô te, nge wo wôé éziñ wo tindi wo e nsem, tyi'i wô. E ne *mvo'é na ô ke nyiin ényiñ, étune wo, alôte na ô ke nduane kom ô bili mo mebaé,

⁴⁴ e vôme nsoñ wob ô ne te wu, nduan ke te dim.

⁴⁵ Nge abo dôé éziñ e nde da dutu wo na ô ku, seme de; e ne wo mvaé na ô nyiin ényiñ été étun abo, alôte na ba wua wo ébé nduane kom ô bili mebo mebaé,

⁴⁶ e vôme nsoñ wob ô ne te wu, nduane ke te dim.

⁴⁷ A nge dise dôé éziñ e nde da dutu wo na ô kolé a ku *abé été, fôndé'é de. E ne wo mvaé na ô ke nyiin *ayoñe Zambe a dise da, alôte na be ke wua wo ébé nduane kom ô bili mise mebaé,

⁴⁸ e vôme nsoñ wob ô ne te wu, a nduan ke te dim.

⁴⁹ Amu na môt ase a ye wôk ésôbôk nku e nduan été.

⁵⁰ Nku ô ne mbamba jôm. Ve da, nge nku ô mane same *zam, mia ye beta ve wô *zam a za jômô? Biane nku e be miabebien été, taba'ane fe *mvo'é wua a nyô mbok.