MARKUS 7 - Kalate Zambe Nnomo a Mfefe Mfefé Nkôñelan

Ajô Befarizieñ a metume me bôt betô

¹ E nde Befarizieñ be nga sulan vôm a nga too, baa Beyeme bekalate bevok, be so'o Yérusalém.

² Ane be nga yene beyé'é bé bevok be ja'a bidi a mo mvit, nalé a ne na teke sôbe mo.

³ Amu na, Befarizieñ a Beyude bese, be ne teke di nge be ngenan te taté tu'a mane sôbe mo, mbôle ba tôñe metume me bôbetô.

⁴ E nde fe, éyoñe ba so nseñ, nge be te taté mane sôban, be teke di, a mam mefe abui be nga nyoñ e be bôbetô, aval ane nsôbane mekob, a meviek, a bisoo bi mvot.

⁵ Ane Befarizieñ a Beyeme bekalate be nga sili nye na: Amu jé beyé'é bôé be ne te wulu aval ane ñye'elan metume me bô-betôl ô né, ve ba viane di bidi a mvin ése mo'

⁶ Ane a nga jô be na: Ezayi a nga yeme fo'o kobô ajô denan, a mia bôte medu'an, éyoñ a nga tili na: Ayoñe bôte di da wumulu ma ve biyaé, ve minleme miab kik mi tyete ma ôyap.

⁷ Ba kañe ma momo nkañan, ñye'elan ba ye'ele bôte ki ô too mebendé me bôt.

⁸ Mia viane li'i, metiñ me Zambe, mi nga tôñe metume me bôt.

⁹ Yaa, mebendé me Zambe e me mia tindi a mvuse mo, na mi viane ba'ale metume menan mia bebien.

¹⁰ Môze ny'a nga jô na: Ô semé'é éso ba nyua, a na: E môt a kobô ésaa *abé, nge nyia, a ye fo'o wu a si.

¹¹ Mfa'a wônane kik mia jô na: Nge môt éziñ a jô ésaa nge nyia na: E jôm ése ô ne bi mfi e be ma é nto korban, nalé a tinane na mvean asu Zambe,

¹² mia jô'é nye teke beta bo mone jôm éziñ asu ésaa nge nyia.

¹³ Nalé ate ajô Zambe e nde mia wôé ntuk, amu metume menan mia zu mia kalane bôt. Mia bo fe mam mefe abui avale te.

¹⁴ E nde a nga beta loone babôtô a jô be na: Mia bese tameka vô'ôlane ma, a tu'a wôk.

¹⁵ Teke jôm éziñ ja so atan é za'a nyiin abume môt é ne ngule ya ve nye nsem. Ve mame ma so abume môt me za'a kui nseñ, e me ma ve môt mvit e *nsisim.

¹⁶ Nge môt éziñ a be'e melo ya wôk, a wô'ôk!

¹⁷ Eyoñ a kandaneya a bôt a ke *nda, ane beyé'é bé be nga sili nye mesuu ya *nkana ôte.

¹⁸ E nde a jô be na: Nde mia fe mi ne be-te-fe'e avale di! Ye mi nji yeme wô'ô na e jôm ése ja so atan é kele abume môt été é se ngule ya ve nye mvit e *nsisim.

¹⁹ Amu é nji nyiine nye e *nlem été, ja ke ve abum, é ke fe lôt a ke fé? Nalé a nga mane fubu bidi bise.

²⁰ E nde fe a zu jô na: E jôme ja so môt mfa'a ya été é za'a kui atan, e nje éte ja ve môt nsem.

²¹ Amu na, mfa'a y'été, e minlem mi bôt été, mbia b'asimesan ba so, ajô bibon, wup, ñwôane bôt,

²² *mejian, ôzañ akum, mbia *nlem, medu'an, bijabô, ébamba, mbia be mis, nkoban Zambe ébiasé, mebun, mboan ôkukut.

²³ Mame mete mese me ne *abé, ma so mfa'a ya été, me nga ve môt mvit e *nsisim.

Mbunane minga Sirôfénis

²⁴ Akôlô a nga kôlô valé, ane a nga ke mfa'a ya Tir. Eyoñ a nyiineya e *nda été, a nji kômbô na môt éziñ a yeme nalé; ve da teke zene ya sobô.

²⁵ Eté été, minga éziñ a nga wô'ôtane nye, ngone jé ki é bili mbia *nsisim, e nde a nga ke so a zu kute nye meboñe si.

²⁶ Minga ate a mbe ngon Grék, teke a too e ñyebe Beyude, ngon Sirôfénis e mebialé. Ane a nga ye'elane nye na a vaa ngo jé mbia *nsisim.

²⁷ Ane a nga jô nye na: Tame jô'é *bon e mbe be taté di, be jaé, amu e nji bo mvaé na be nyoñe bidi bi *bon, a wua bie bo-bemvu.

²⁸ E nde minga ki a nga yalan a jô nye na: Wo bele fo'o, a Nti; ve da ke bo-bemvu ba bo fe be ja'ak menyuñe bidi bi *bon e tebele si.

²⁹ Ane a nga jô nye na: Amu éfia jôé te, kele ñhe, mbia *nsisim a kôlôya ngo jôé e nyôl.

³⁰ Ake a nga ke *nda jé, ake koé mon a bôô énoñ, mbia *nsisim a suuya nye.

Yésus a bo môt a too ndok a mvuk mvo'é

³¹ Akôlô a nga beta kôlô si ya Tir, e nde a nga ke lôte Sidoñ, éfas ya mañe me Galilé, ézezañe si ya Dékapôl.

³² Ane be nga zuu nye môt a too ndok a mvuk, be nga ye'elane nye na a betéé nja'a nye mo.

³³ Avaa a nga vaa nye e bôt été a kelee nye étam e fefe, e nde a futi nye anyu e melo été, a tui menden, a nambe nye ôyem,

³⁴ a bete mise yôp, a suu mvebe, a jô nye na: Effata, nalé a tinane na: Yombô'ô.

³⁵ E nde melo me nga yombô nye, a été été e nkol ô nga tii nye ôyem ô mane fe tyi'i, a nga kobô ne sañe sañ.

³⁶ Ane a nga ve be atiñe na, be bo te kate de môt éziñ. Abim a nga bo a bendé'é be, abime te e nde be kik be nga dañe dañe ke ba be'ele de.

³⁷ Be mbe be semé'é angôndô ya abui, be jô'ô na: A boya mame mese mvaé, a bo'o mindôndok na mi wôk, a bo'o mimvumvuk na mi kobôô.