MARKUS 6 - Kalate Zambe Nnomo a Mfefe Mfefé Nkôñelan

Yésus a ne e Nazarét

¹ Ane Yésus a nga kôlô valé, a kelé ñhe ja dé, baa beyé'é bé nsamba.

² Eyoñe *môs Sabat ô nga kpwaan, ane a nga tebe na a ye'ele *aba Zambe été. E babôtô a nga bo a vô'ôlô'ô nye, a nga kam, a jô na: E mame ma, ma so nye vé? Za a nga ve nye abime fe'e dina? z'avale bitua bi mam da bobane nye e mo di'

³ Ye sake nye a ne kabinda, mone Marie, monyañe Yakob a Yôses, a Yuda a Simon? Ye sa bekale bé e mbe bia be be bi ne va? A a mbe ékolé ôbak mfa'a wop.

⁴ E nde Yésus a zu jô be na: Nkulu mejô a nji yen ébiasé vôm mfe, fo'o ve be bôte bé, a bivuvumane bié a *nda bôte jé émien.

⁵ E nde a nji ke fe tabe na a beta bo étua jam éziñe valé, nga fo'o ve ayôme minkôkon a nga beté mo, mi ve bo *mvo'é.

⁶ A nga semé fo'o amu be mbe te buni. Ane a nga ke a lôt e male me mbe mbôma'ane valé a kele a ye'ele.

Yésus a lôme Beyé'é awôm a bebaé

⁷ E nde ñhe a nga loone beyé'é bé awôm a bebaé, a taté lôme be beba-bebaé be ke; a ve fe be ngul ya jôô mimbia minsisim.

⁸ Ane a nga ve be *mvendé, be bo teke nyoñe jôm éziñ asu *zen, vengevenge ve *ntum étam: To'o nga'aban nge ékpwaé, nge ke *atiñ moné éziñ angeteñ:

⁹ Be jaé fo'o ve besilefas, a te jaé biwoman bibaé.

¹⁰ Nyee be na, nge mia nyiine *nda afôla éziñ, taba'ané été akekui mia ye kôlô valé.

¹¹ A e vôm ase ba ye bo teke nyoñe mia, nge vô'ôlô ke mia, kôla'an vôm ate, mia ke mia sas ja'ane mbulu'u ô ba'a mia e mebo si, ñwô wo ye bo be mbo'olô.

¹² Eyoñe be keya, ane be nga ke ba kate bôt foé na be kôñelane minlem,

¹³ ba ke fe ba titane mimbia minsisim, be woko'o abui bôte mbon a bo be *mvo'é.

Yésus baa Hérôde

¹⁴ E nde Hérôde, njôô bôt, a nga wô'ôtane Yésus, amu jôé dé e mbe e wumuk, bôte be nga jô na Yôanes Babtist a wômôya, a so'o miñwuan, ajô te a fek a bitua bi mam bié bi wômôya.

¹⁵ Abui avok e nga jô na a ne Elie; ba bevok be jô'ô na a ne *nkulu mejô avale fe ane *nkulu mejô mfe éziñ.

¹⁶ Eyoñe Hérôde a wô'ôya nalé, e nde a nga jô na: Ye sa Yôanes mamien me nga bo na be tyi'i nlô, e nye a wômôya nyô!

Awu Yôanes Babtist

¹⁷ Amu na Hérôde émien e nye a nga lôme na be ke bi Yôanes, be ka'a nye ngata'a a wua nye e *nda mimbôk, amu a nga nyoñ Hérôdias, minga Filip monyañ wé;

¹⁸ a Yôanes a nga bo a jô'ô Hérôde na: E nji yiane na ô lu'u nga monyoñ.

¹⁹ E nde Hérôdias a nga ba'ale nye ziñ e *nlem été, a jeñe fe na a wôé nye, ve da teke *zen.

²⁰ Mbôl Hérôde a mbe a ko Yôanes woñ, a kôme fe yeme na a ne *zôsôô a mfufube môt, a nga ba'ale ñhe nye. Eyoñe a wô'ôya nye ane a kobô, fek é nto nye ne vema, ve da a nyeke'e a wô'ô nye.

²¹ E nde abeñe *môs éziñ da zu bo, Hérôde a nga ka'a dina ya *môs a nga bialé, asu mintômba mi bôte mié, a bejôô bezimbi benen a bingo'o bi bôte ya Galilé.

²² Ane ngon Hérôdias é nga nyiin, é nga jem a ve Hérôde baa bôt ya dina nleme mvaé. E nde njôô bôt a zu jô ngone minga nyô na: Sili'i ma jôme wo kômbô, me ve wo je.

²³ Ane fe a nga kane ngana, nyee nye na: E jôm ése fo'o wo ye sili, ma ye ve wo je, ja'a na ma sal éjôé jame zañ.

²⁴ Ane a nga kui atan a ke jô nyia na: Jé nje me ke sili? E nde nye ke a nga jô na: Nlô Yôanes Babtist.

²⁵ E nde a nga ji'a beta kui atan avôl-avô a ke kui be njôô bôt a jô nye na: Ma yi na, éto ébiene ji, ô ve ma nlô Yôanes Babtist éso été!

²⁶ Ane njôô bôt a nga wô'ô abui mintaé e *nlem. Ve mbôl a nga mane kane ngana, a bôt a nga bañete dina kik be too, e nde a nji ke fe kômbô ben.

²⁷ E nde ñhe njôô bôt a nga lôme mone bezimbi été été a jô na a ke nyoñe nlô té. Ane a nga kui atan a ke tyi'i Yôanes nlô e *nda mimbôk,

²⁸ a nga zu a be'e nlô té éso été a zu ve ngone minga. E nde ngone minga kik é nga ke ve nyia.

²⁹ Awô'ô beyé'é be Yôanes be nga wô'ô nalé, ane be nga ke, be be'e mbim, a ke jame wô e soñ.

Yésus a ve bôt bidi

³⁰ Ane minlôman mi nga ke tôkane vôme Yésus a nga too, be nga kañete nye abime mam ese be nga bo, a ye'ele.

³¹ E nde a zu jô be na: Mia kik, tameka zuan bi ke avie, e vôm a ne teke bôt, mi nyoñe mon awo'on, amu e bôte ba so a ba ba ke be mbe ézuk, be ntoo teke mon éyoñ ya di di.

³² Ane be nga dañ éfunga na ba ke avie.

³³ E nde babôtô kik a nga yene be kelek, be yeme fe be. Be nga téé ñhe e bitison bise, be kele mimbile wé a mebo, e nde fe be nga ke taté kui.

³⁴ Eyoñe Yésus a suseya si, a yene ndulu bôt nyô, ane a nga wô'ô be éngôngo, amu be mbe aval ane mintômba mi ne teke mba'ale. A tebe ñhe na a ye'ele be mam abui.

³⁵ Mbôl ayab éyoñ e nga lôt, e nde beyé'é ba ke be Yésus a jô nye na: Vôme nyô a ne fé, nlam ôyap, môse fe ô lumbuya abui.

³⁶ Su'u bôt, be ke kuse jôme ba di e bone be mal a beta minlam ya mengoto ma bôman.

³⁷ Ane a nga yalan a jô be na: Mia bebien va'ane be bidi. E nde ba jô nye na: Ye bi ke kuse belet tañe minsañ mi moné mintet mibaé bi ve be, be di'

³⁸ Ve a nga jô be na: Mi bili belet tañ aya? Kela fomban. Eyoñ be yemelaneya, e nde ba zu yalane na: Belet étan, a kos ébaé.

³⁹ Ane a nga jô be na be toé bôte bese e si minsamba minsamba, e bilele'e bilo'o été.

⁴⁰ E nde be nga tabe si mengôs mengôs, valé ntet, valé mewôm metan.

⁴¹ Anyoñ a nga nyoñe belet étan nyuna a kos ébaé, ane a nga bete mise yôp, a botane bie, a be'e belet a ve je beyé'é bé na be ke ba telé biseñ a kabe fe be bese e kos ébaé nyô.

⁴² E nde bese be nga di, a jaé.

⁴³ Ane be nga ke ba to'é afufus belet e nga buk a kee de tañ minkoé awôm a mibaé njalan, a fe *mebuka'a me kos.

⁴⁴ E bôte be nga di, be mbe, fame-fam toyini étan.

Yésus a wulu e mendim yôp

⁴⁵ Ane a nga tindi beyé'é bé été été na be dañ éfunga été a ke kindi'i yat, mfa'a ya Bétsayida, nté nye ke a suu bôt.

⁴⁶ Asuu a nga mane suu be, e nde a nga bet e nkôle yôb na a ke ye'elan.

⁴⁷ Valé ngô'é é nga bo, éfunga é ngenan é tele ézezañ mañ, nye k'a too étam e mfa'a ya nya sii.

⁴⁸ Ayen a nga yene be kele ba *duk a mfulan éfunga, évuñulu ki é so'o ôsu, mfa'a ba keke, valé alu e ntoo bebé ya man, ane a nga ke tôbane be, a za'a a wulu e mendime me mañe yôp. E nde a nga kômbô lôte be.

⁴⁹ Eyoñe be nga yene nye a zu a wulu e mañe yôp, be nga buni na a ne kôn, ane be nga bôé miñyôn.

⁵⁰ Mbôle bese be nga yene nye, be nga fô'ôban a woñ. Ane a nga ji'a kobô be, a jô be na: Vola'ane minlem, mamiene le, te koone woñ.

⁵¹ E nde a nga bet e vôme be mbe a dañ éfunga été, ane évuñulu é nga je'ebe. Ane be nga dañe semé beta nseman e minlem miab été;

⁵² amu be nji ke ve'ele wôk étua jam é nga boban ajô belet, amu minleme miab mi maneya kpwem.

Yésus a yete minkôkon e Génézarét

⁵³ Adañe be nga dañ e kindi'i yat, e nde be nga ke mfa'a ya Génézarét a ke selé éfunga.

⁵⁴ Nné ane be nga kôlô éfunga, e nde bôte be nga ji'a yeme Yésus,

⁵⁵ be nga téé mimbil afôla nlame te ese, be kele ba be'e bôte bese be bili akon e binoñ yôp, be kelee be e vôme ase be wô'ôtaneya na a ne.

⁵⁶ A vôm ase a ke kui, to'o e beta be mal, to'o e bitison, to'o kik e mvuse nlam, bôte ba zu ba bôé minkôkone minseñe minseñ, be ye'ela'ane nye na nge ba nambe ja'ane ve ñwôndé ngômesane wé étam étam. A bôt bese be mbe be nambe'e nye be nga bo *mvo'é.