MARKUS 4 - Kalate Zambe Nnomo a Mfefe Mfefé Nkôñelan

Nkana mmiase mvoñ

¹ E nde a nga beta taté na a ye'ele bôt e nsa'a mañ. Ane jama bôt a nga tôkan e vôm a mbe, ane a nga jibi bet éfunga été a ke tabe mendime yôp, ndulu bôt ase nyuna ki a too e kindik a fombô'ô mañ.

² A nga ye'ele ñhe be abui mam a minkana. E ñye'elane wé été, a mbe a jô'ô be na:

³ Vô'ôla'an! mmiase memvoñ a nga ke a miase fes.

⁴ A nga bo na, éyoñ a kele a miase nalé, fese éziñ é nga ku e mfôme *zen, ane anon e nga so a mane di je.

⁵ Ane fese fok é nga ku e si *mekok, e vôm a mbe teke'e metek abui, e nde fes éte é nga ji'a faa; amu teke mfañ afib tyia.

⁶ Eyoñe vian ô nga faé, ane fes éte é nga mane viele, a amu é mbe teke minkañ, e nde é nga mane dik.

⁷ Fese fe é nga ku e minsini'i été, ane minsinik mi nga bet a yandan je yôp, e nde é nga bo teke ve bibuma.

⁸ Fese fo'o kik é nga ku mbamba si, ane é nga faa a yaé a ve bibuma, é nga wum, fese jia bibuma mewôm mela, fese éziñ mewôm mesaman, fo'éziñ ntet.

⁹ E nde ñhe a zu jô na: E môt a be'e melo ya wôk, a wô'ôk!

Amu jé Yésus a ye'ele a minkana

¹⁰ Eyoñe Yésus a li'iya étam, e nde bôt be nga too nye mbôma'ane baa be beyé'é awôm a bebaé ba zu sili nye ajô minkana mite.

¹¹ Ane a nga jô be na: Mia e vebaneya na mi yem ndimba mam ya éjôé Zambe. Ve mfa'a ba ya atan, ba kobô be mam mese ve a minkana,

¹² ajô te ba ye fombô na be yen, ve teke yen ba ye vô'ôlô na be wôk, ve teke wôk, be za kôñelan minlem a nyoñe *njaman.

¹³ Ane a nga jô be na: Mi ne teke wô'ô *nkana wu amu je? E nde mia ye yeme wô'ô minkana mivo'o mise aya'

Nkana mmiase mvoñ wo tinan aya

¹⁴ E môt a miase mvoñ a miase Mejô me Zambe.

¹⁵ E ba ya vôm fes é nga ku e mfôme *zen, e mbe be ne na, éyoñ be wô'ôya Mejô me Zambe, Satan a soé été été, mejô ba te miase be e minlem, a ji'a zu té me si.

¹⁶ Avale te fe e ba ya fese be nga mias e si *mekok, e mbe be ne na, éyoñe be maneya wô'ô Mejô me Zambe, ba nyoñe me avô a mevak;

¹⁷ ve mbôl bebien be nji bi minkañ, amu be ne bôt b'andôn, éyoñ minjuk a ékpwe'ele bi soya amu Mejô me Zambe, ba ku fo'o si été été.

¹⁸ Bana mbe be ne bôte ya fes be nga mias e minsini'i été: Balé bete be ne na, éyoñe be maneya wô'ô Mejô me Zambe,

¹⁹ minju'u ya si ndôn a medu'ane ya akume si a minkômbane ya mame mevo'o mese, bi jaé be *nlem ne lut, a mane yametane mejô mete, me ntoo ñhe teke fe awumi ébuma.

²⁰ Bana kik be ne bôte ya fes be nga mias mbamba si: E ba bese ba wô'ô mejô me Zambe, be nyoñe me, be nga wume ñhe, bibuma fes éziñ mewôm mela, fo'éziñ mewôm mesaman, nyô fok ntet.

Ye lambe a tetebe éwolo si

²¹ Ane a nga jô be na: Ye ba zuu lambe na a tebee tawôlô si, nge ke énoñe si? Ye sa na a tebe ételé belambe yôp'

²² Teke jam éziñ e solô da ye bo te kui atan; a teke jôm éziñ be ne solé, ja ye bo te kui éngengeñ.

²³ Nge môt éziñ a be'e melo ya wôk, a wô'ôk.

²⁴ E nde fe a jô be na: Mi tuka'a fas e jôme mia wôk. Ovek mia ye ve'e wô ñwô fe ba ye ve'e mia, abet da ye fe kô'ôlane mia yôp.

²⁵ Amu na e nyô a bili e nye fe ba ye beta ve; a e nyô a nji bi, ba ye vaa nye ja'ane mon abim a bili.

Mvoñ ja yaé, môte teke yem

²⁶ Ane a nga jô fe be na: Ayoñ Zambe e ne aval ane môt a wua mvoñ e si.

²⁷ To'o ny'a ke ôyo, to'o ke a vee, a alu a *môs, fese ve faa, é nga yaé éyoñe nye a nji yem.

²⁸ Si ébien ja vu bidi, a taté kaé, akui abam, akekui ndu fes ya abam été.

²⁹ Ane ébuma é tôlôbô, be ji'a daa meyo me fa, amu éyoñ ya mekoé é kpwaaneya.

Nkana fes ôndôndôô

³⁰ E nde fe a beta jô na: Jé fo'o bi ne funane jee *ayoñe Zambe? Nge ke na bia ye ve'ane de a za nkanaa'

³¹ E ne aval ane fes ôndôndôô. Eyoñe ba bé je e si, é ne tyôtyoé é lôte mefese mese ya *si nyô.

³² Ve éyoñe be béya je, ja bet a ke e yôp alôte bibébéé bise, é nga biaé fe beta mintyap, abim ane anone ya yôb e ne lôñe mumba'a e éjijine jé.

³³ A *zen ya abui minkana avale te, e nje a mbe a kate be Mejô me Zambe ane be ne tu'a yeme wôk.

³⁴ A nji kobô be teke ku minkana. Ve éyoñ baa beyé'é be li'iya étam, a mbe a timi'ine be mam mese.

Yésus a je'e ôkôs

³⁵ Môs ôte, valé ngô'é é nga bo, e nde a jô be na: E ndañekan e kindi'i yat.

³⁶ Ane be nga li'i ékoone bôt, be ve kee nye éfunga a nga too été, bifunga bife bi mbe fe nsamba té.

³⁷ E nde mbia ngul ôkôs a nga taté na a vuñ, mintyôa mi nga sembe éfunga été, éfunga é nga ye ñhe jaé a mendim.

³⁸ Nye ki a bôô ôyo e mvus éfunga, nlô ô bete ébônga. E nde ñhe ba ke vele nye a jô nye na: A Ñye'ele, ye ô ne teke bisi nge bia mane jañ'

³⁹ Ane a nga vee ôyo, a sa évuñulu *mvam, ne tiñ, a jô mañ na: Tabe'e évô, bo'o ne mieññ! E nde évuñulu é nga tebe, mañ ve bo ne mieññ.

⁴⁰ Ane Yésus a nga jô be na: Mia ko woñ abime di amu jé? Amu jé mi ne teke'e mbunan'

⁴¹ Ane be nga dañe ko woñ, be nga ke fe ba sili na: Nyuna nye ñhe a ne za? amu ja'ane évuñulu, a mañ bi ve wô'ô nye'