MARKUS 2 - Kalate Zambe Nnomo a Mfefe Mfefé Nkôñelan

Yésus baa mbôbôk ya Kapernawum

¹ Eyoñe bone melu be lôteya, e nde a nga beta so e Kapernawum. Foé é kele fe na a nto e *nda.

² Ndulu bôt a zu ñhe ngunubu, teke fe atelé abo, ja'ane *mbé yôp. A nyoñe ñhe nkobô a nga kate be mejô me Zambe.

³ E nde ba zu soo nye mbôbôk, bôte benyin be be'e wô.

⁴ Mbôle be mbe teke *zen ya zu kui vôm a nga too amu ndulu bôt, e nde be nga sô'andile *nda e zia a nga too, a suu ôkala mbôbôk ô nga bôô vôm be nga tub andil.

⁵ Ayene Yésus a nga yene mbunane wop, ane a nga jô mbôbô'ô na: A mon, mam *abé môé me nto *njaman.

⁶ Beyem bekalate b'éziñ be nga to valé, be nga ke ba sili e minlem miab été na:

⁷ Amu jé môte nyuna a kobô avale di? ke a ta Zambe! za éziñ a ne ngule ya vaa minsem, sesale ve Zambe étam'

⁸ Eyoñe Yésus a yemeya été été e *nsisim wé été na ba simesane nalé e minlem miab, ane a nga jô be na: Amu jé mia simesan avale mame te e minlem mienan été'

⁹ Jé fo'o ja dañe tyi'ibi? ye jô mbôbô'ô na: Mam *abé môé me nto *njaman, ye ke na: Tebe'e tetele, nyoñe ôkala wôé, ô téé dulu, ô ke'

¹⁰ E nde amu mi tu'a yeme na Mone Môt a bili ngule ya jamé mam *abé e si ndône mu, ane a nga jô mbôbô'ô na:

¹¹ Wo ma jôô nye, tebe'e tetele, nyoñe ôkala wôé, ô ke e *nda jôé!

¹² Ye a nga tame suu nkobô, a kôlôya ke si, a nyoñe ôkala, a téé dulu e mise me bôte bese. Bôte bese be nga kam angôndô, be nga ve Zambe duma, be jô'ô na: Avale di, bi bi ngenan te tame yene de môse mfe.

Yésus a loone Lévi

¹³ Ane Yésus a nga beta téé a zu kui nsa'a mañ. Ane ndulu bôt ase a nga zu be nye; a nga ye'ele be.

¹⁴ Eyoñ a lôte nalé, ane a nga yene Lévi, mon Alfé, a too si e wofis ya ésaé ba ya'ane betoya. E nde a nga jô nye na: Tôñe ma. Ane a nga kôlô si, a tôñe nye.

¹⁵ E nde da zu bo na Yésus a ja'a bidi e *nda Lévi valé, abui benyoñe *toya a mbia be bôt, be fe be ja'ak, fufulu a Yésus baa beyé'é bé. Be mbe fo'o abui, ba ba zu ba tôñe nye.

¹⁶ Eyoñe Beyeme bekalate a Befarizieñ be yeneya na baa be mbia be bôt a benyoñe *toya ba di vôma wua, ane be nga jô beyé'é bé na: Nalé a boban amu jé na baa benyoñe *toya a mbia be bôt ba di a nyu fufulu'

¹⁷ Eyoñ Yésus a wô'ôya nalé, e nde a nga jô be na: E bôt be ne *mvo'é be nji yi *dokita, ve minkôkon étam. Me nji zu loone bezôsôô be bôt, ve bebo *abé.

Ajô étyi bidi

¹⁸ Mbôl beyé'é be Yôanes a Befarizieñ be mbe be tyi bidi, e nde be nga zu jô Yésus na: Jé ja bo na beyé'é be Yôanes a Befarizieñ be be tyi bidi, ve beyé'é bôé kik be teke tyi'

¹⁹ Ane Yésus a nga sili be na: Ye bôt be ne nloon ya zu e dina abô'aluk be ne ngul ya tyi bidi nté ba be nlu'u minga be ngenan be too? Nté ôse be ngenan be bili nluk e zañe jap, be se ngul ya tyi bidi.

²⁰ Ve melu ma ye fe bo, éyoñ nlu'u minga a kôlôya be be, *môs ôte ñwô ñhe ba ye tyi bidi.

²¹ Môt éziñ a nji beté mfefé abaka e ntu'u ngômesan, nge ba bo nalé, mfefé abaka ô viane mane limiti a nyab ntu'u ngômesan, nyaban ô nga ke wo nenenen.

²² A teke môt éziñ a loé mfefé woon e minnôm mende'e bikôp; nge da bo nalé, woon a ye bo na mende'e mete me tôlé, woon a mendek, bise ve wu ntuk. Ba loé mfefé woon ve mimfefé mende'e bikôp.

Beyé'é ba tyam * atiñ sabbat

²³ A nga bo na, Yésus a lôtôk e zañe mefub bidi, beyé'é bé be nga ke ba wondé mefes e zenezen.

²⁴ Ane Befarizieñ be nga jô nye na: Tame yen ane ba bo jam e nji yian e môse sabbat!

²⁵ E nde Yésus a nga jô be na: Ye mi mi nji lañ, e jam David a nga bo, éyoñ a biya njuk, a nga wô'ô zaé baa be bôte be nga too nye nsamba'

²⁶ A nga ke nyiin e *nda Zambe, éyoñ éte Abiatar nye a too Ntuni Nnen, a nga di fembé mimveane Zambe, e nje é ne étyi môte mfe te di, vengevenge ve betuni, ane a nga ve fe e bôte baa be nye be nga too.

²⁷ Ane Yésus a nga jô be na: Sabat e nye a nga boban asu môt, ve sa ke môt asu sabbat.

²⁸ Nalé ate Mone Môt e nye a jôô ja'ane môse Sabat.