MARKUS 16 - Kalate Zambe Nnomo a Mfefe Mfefé Nkôñelan

Binga ba ke yene soñ

¹ Eyoñ sabbat a nga lôt, e nde Marie ya Magdala baa Marie nyia Yakob, a Salôma be nga mane kuse mimbon mi ôlobinda na ba ke wo'o Yésus.

² Valé tyé é ngenan mendim, e *môs ôsu ya sondô, ane be nga ke e soñ, jôb e tôôya.

³ Be nga ke ba kobô na: Za nye a ye fendé bia ako'o ya *mbé soñ'

⁴ Abete ba bete mis, be nlôô na ako'o e ntoo mfendan; ako'o te kik e mbe étua ya anen.

⁵ Anyiin be nga nyiin e soñ, e nde be nga yene mone ndômane môt a too si e mfa'a ya mbo nnôm, a be'e éfumulu ézingi, ane be nga si'an a woñ.

⁶ E nde ndôman éte é nga jô be na: Te mia fô'ôban a woñ. Mia jeñ Yésus ya Nazarét, e nyô be nga tyelé e *krôa. A wômôya, a nji fe bo va; fomba'ane vôm be nga bôôé nye.

⁷ Kelane ñhe kate beyé'é bé a Pierre na a keya mia ôsu, e Galilé; e ne mia ye yene nye wé, aval ane a nga jô mia.

⁸ Ane be nga kôlô e soñ a kui atan, ba ke ba fô'ôban, fe'e njañan e mebum. Be teke fo'o kate môte jam éziñ, amu woñ ô nga bili be.

Beyé'é ba yene Yésus

⁹ Eyoñe Yésus a wômôya, mametyé, e *môs ôsu ya sondô, ane a nga taté liti Marie Magdaléna nyôl, e minga a nga vaa mimbia minsisim zamgbwa.

¹⁰ Ane nye k'a nga ke kate bôte baa be Yésus be mbe be too foé, amu be nga bili mintaé e *nlem be yônôk.

¹¹ Eyoñe bôte bete be wô'ôya na a vee, a na a nga ke liti nyôl e be minga ate, be nji kañese.

¹² E mvuse valé, ane a nga beta liti nyôl aval afe e be beyé'é bebaé be too e dulu zañ, be kele e nlame mvus.

¹³ Ane balé fe be nga bulan a mvus, be ke kate bôte bevo'o foé. Be teke yebe.

¹⁴ E nde a nga ke su'ulane liti nyôl e be Beyé'é awôm a wua be too si, be ja'ak. A nga komekane be na be ne teke buni, be too fe ayete minlem, amu be nji ke buni e bôte be nga yene nye éyoñ a vômôya.

¹⁵ Ane a nga jô be na: Kelane mefôla me si mese, mi ke mia yôtan ékôkôma'a ése Mbamba Foé.

¹⁶ E môt a ye buni a duban, a ye bi ényiñ, e nyô ki a ye bo teke buni a ye nyoñe mekua.

¹⁷ Mendeme ma ye tôñe bôte ba buni e me ma: E jôé dam, ba ye titane mimbia minsisim, ba ye kobô mimfefé *minkobô.

¹⁸ ba ye bi benyo a mo, a nge ba nyu e jôme ja wôé môt, ja ye bo teke bo be mbia jam, ba ye beté minkôkon mo, mi ve bo *mvo'é.

¹⁹ Eyoñe ñhe Nti Yésus a maneya kobôô be nalé, ane a nga bet e yôb a nyoñ éto e mbo nnôm be Zambe.

²⁰ Beyé'é kik, akôlô ya valé, be nga ke ba kañete Mbamba Foé vôm ase, Nti a kelee be nsamba e ésaé été, a yemete'e nkañetane wob ya ajô Zambe ngu amu bitua bi mam bi mbe bi boba'an.