MARKUS 11 - Kalate Zambe Nnomo a Mfefe Mfefé Nkôñelan

Yésus a nyiin e Yérusalém ane Mesie

¹ Eyoñe be nga subu bebé e Yérusalém, e zia Bétfajé baa Bétani, bebé a nkôle b'ôlivié, e nde Yésus a lôme beyé'é bé bebaé,

² a jô be na: Kelan e jal e ne mia zo'one yate vana di, nné ane mia ye kui, mia ye koone mon éjakas a tii, môte mfe éziñ a ngenan teke tame betebe nye yôp, ti'ane nye, mi zuu nye.

³ Nge môt éziñ a sili mia na: Jé mia bo le? Mi yalane na: Nti nye a yi nye, a ye fe bulane lôme mia nye vana ana'ana.

⁴ E nde be nga ke, be koone mon éjakas a tii atan bebé a *mbé akak, e mfaka yôp; ane be nga tiine nye.

⁵ Ane bôte b'éziñ ya ba be nga tele valé be nga jô be na: Mia tiine mon éjakas ate amu jé'

⁶ E nde be nga yalane be aval ane Yésus a nga jô. Ane be nga jô'é be.

⁷ E nde ñhe be nga kee mon éjakas ate e be Yésus, be nga ta mengômesan mab e mvus jé, ane Yésus a nga ke tabe nye e yôp.

⁸ Abui bôt e nga ke da ta mengômesane mab e njoñe njoñ, ba bevo'o ki mebui bilé be nga ke ba tyi'i e fé fé.

⁹ E bôte ya ôsu, a bôte ya mvus, be nga zu ba yôtane na: Hôzana! Ébotan a môt a zu e jôé Nti!

¹⁰ Ebotan a éjôé ja zu, e ji ésaa wongan David! Hôzana e susu'a nkôñ ya yôb été!

¹¹ E nde a nga ke kui e Yérusalém, a nyiin e Nda Zambe été. Aman a nga mane fombô biôm bise mbôma'ane, éyoñ éte ngô'é é nga bo fo'o abui, ane a nga kui atan a ke e Bétani baa Beyé'é awôm a bebaé.

Yésus a yo'é élé fiig

¹² Tyé-kpwa, valé be kôlô'ô e Bétani, e nde Yésus a nga wô'ô zaé.

¹³ Eyoñ a yeneya élé fiig é tele ôyab analé, é be'e mekaé, ane a nga ke jom nge a ye yene jôm éziñ été. Ve éyoñ a nga ke kui je bebé, a viane koone ve mekaé-mekaé, amu éyoñ éte é nji bo éyoñ befiig.

¹⁴ Ane a nga kobô a jô élé na: Akekui melu mese ma zu, môt éziñ a bo'o te beta di ébuma ya be wo ne tya! Beyé'é bé be nga vô'ôlô a wô'ô nkobô ôte.

Yésus a titane bôt ba bo makit e Nda Zambe

¹⁵ Ane be nga ke kui e Yérusalém. Anyiin a nga nyiin e Nda Zambe, a tebe ñhe na a titane bôt ba kuan, a bôt ba kuse biôm e Nda Zambe été, a sô'ôlô betebele betyendé moné a bito bekuane bezum e si.

¹⁶ Teke fe jô'é na môt éziñ a tulane Nda Zambe a be'e jôm éziñ.

¹⁷ A nga ye'ele bôt a jô na: Ye e nji bo ntilane na: Ba ye loone *nda jam na, *nda meye'elan asu meyoñe mese' Ve mia mi vianeya kôñelane je mfule befanga.

¹⁸ Eyoñe Betuni Benen a Beyeme-bekalate be wô'ôtaneya ajô te, be nga jeñe ñhe aval avé be ne jiane nye. Ve be mbe be mate'e nye amu nkunda bôt ôse ô mbe ô seme'ene ñye'elane wé.

¹⁹ Eyoñe ngô'é é nga bo, ane be nga kôlô tison éte.

Nkôt élé fiig; meye'elan ya mbunan

²⁰ Eyoñe be nga zu lôte bia-tyé, ane be nga yen élé fiig é maneya kôt, ataté mindi.

²¹ E nde Pierre a zu beta simesan, a jô nye na: A Rabbi, tame yen ane élé fiig ô nga yo'é é maneya kôt!

²² Ane Yésus a nga nyoñe nkobô a jô be na: Buna'ane Zambe!

²³ Ma kate mia bebela na, nge môt éziñ a jô nkôle wuna na: Kôlô'ô si va ô ke ku e mañ, teke bone bisô biziñ e *nlem été, a buni'i fo'o ve na e jam a jô da ye boban, da ye fo'o boban v'ane a jô.

²⁴ E nde ma jô mia na, e jam ese mi ne ja'é a meye'elan, buna'ane fo'o na mi mbili de, da ye fo'o veban ane mia sili.

²⁵ A éyoñ mi ntele na, mia ye'elan, nge mi bili môt jam éziñ e *nlem été, mi jamé'é, ndemben Esaa wônan ya yôb nye fe a ye jamé mia bikobe bienan.

²⁶ Ve nge mia bo te yeme jamé, Esoo wônan a ne yôb nye fe a ye bo te jamé mia bivuse bienan.

Ngule fé wo boo je mam ma'

²⁷ Eyoñe be beteya zu kui e Yérusalém, Yésus a nga ke a lôtan e Nda Zambe été. Ane Betuni Benen, Beyeme-bekalate a Bemvendé, be nga zu yene nye.

²⁸ E nde be nga jô nye na: Ngule fé, e nje wo boo je mame ma? Nge na: Za a nga ve wo ngule ya bo mam mete'

²⁹ Ane Yésus a nga jô be na: Ma fe ma zu sili mia ve nsili wua, mi yala'ane ñhe ma, nde ma fe me kate mia, ngule fé ma boo je mame ma.

³⁰ E nduan Yôanes a nga du bôt, ô nga so vé, ye yôb, ye be bôt? Yala'ane ma!

³¹ Be nga ke ba fas beebe be jô'ô na: Nge bia jô na: Ô nga so yôp, ke a ye sili na: V'amu jé mi nji buni nye'

³² Nge bia jô ke na: Ô nga so be bôt be nga viane ko ékoone bôte woñ, amu bôte bese be nga buni na Yôanes a ne fo'o totii *nkulu mejô.

³³ E nde be nga yalane Yésus na: Bi nji ke yem. Ane Yésus a nga jô be na: Ma fe maa ye kate mia, ngule fé nje ma boo je mame ma.