MARKUS 10 - Kalate Zambe Nnomo a Mfefe Mfefé Nkôñelan

Za a ne tyam aluk

¹ Eyoñ a kôlôya vôm ate, ane a nga ke e si ya Yudé, e kindi'i Yordane ya yat. Ane jama bôt a nga beta zu mane tôkane nye bebé. A nga beta ye'ele be, aval ane a mbe a bo'ok.

² E nde Befarizieñ be nga zu na be lame nye a sili nye na: Ye fam é ne fo'o ngule ya suu minga wé'

³ Ane a nga yalane be na: Môze a nga ve mia *atiñ aya'

⁴ E nde be nga jô na: Môze a nga ve ngule na be tili kalate ya suu minga, éyoñ éte nje ba suu nye.

⁵ Ane Yésus a nga yalane be na: K'amu ayete minlem denan, e nde a nga tili mia atiñe te.

⁶ Ve atata'a ya ntéane ba biômô, Zambe a nga kômône be nnôm baa nga.

⁷ Ajô te nde ñhe fam ja ye li'i ésaa baa nyia, a ke lat a ngale wé,

⁸ a ba ye bo nsône wua bebaane. Be nji fe bo bôte bebaé, be ntoo nsône wua.

⁹ Ajô te, e jôme Zambe a maneya lat, môt a bo'o teke kandé je.

¹⁰ Eyoñe be nga ke kui e *nda, e nde beyé'é be nga beta sili nye minsili, mi tina'an a ajô te.

¹¹ Ane a nga jô be na: Nge môt a suu nga a lu'u minga mfe, a bo *mejian a minga ate.

¹² Nge minga ki a kôlô e be nnôm a ke lu'u fame fe, nye fe a bo *mejian.

Yésus baa b'ayôme bongô

¹³ Ane be nga zuu nye ayôme bongô na, a nambe de. E nde beyé'é be nga viane bame be.

¹⁴ Ayene Yésus a nga yene nalé, ane a nga yaa be a jô be na: Jôka'an ayômô bongô e zu be ma, te kamane de, amu éjôé Zambe é ne jôm avale bôte dap.

¹⁵ Ma bele fo'o ane ma jô mia na, e môt ase a bo teke nyoñ *ayoñe Zambe ane mone mongô, a ye bo teke nyiin été.

¹⁶ Ane a nga nyoñe be a be'e be e mo yôp, a botane be, a beté be mo.

Yésus baa nkukum môt

¹⁷ Valé Yésus a ndôme fo'o téé dulu, e nde môt éziñ a zu ke so mbil ôsu, a kute meboñe si, a sili nye na: A Mba Ñye'ele, ma yiane bo jé ane me ne nyoñ ényiñ ya melu mese'

¹⁸ Ane Yésus a nga jô nye na: Wo loone me mbamba môt amu jé? Teke môt éziñ a ne mbamba môt, sesale ve Zambe étam.

¹⁹ Ke wo yeme metiñe mese: Te wo wôé, te wo bo *mejian, te wo wup, te wo bo ngaa minsos; te wo wôs éza biôm; ô semé'é ésoo baa nyua.

²⁰ E nde nye k'a nga yalane na: A Ñye'ele bôt, e mam mese ma, ma ba'ale me aso mongô.

²¹ Yésus a nga fombô nye ne tooñ, *a nye'e nye; e nde a jô nye na: Jam daada e li'iya e jemba'ane wo: kelek, e biôme bise ô bili, ku'ane bie, a ve bie minzôzoé, nalé wo ye bi akum e yôp, éyoñe te ô zu wo tôñe ma.

²² E nde ôtat ô nga bo nye asu a nkobô ôte, ane a nga ke ôlun ôlun, amu a nga bili akum abui.

²³ Ane Yésus a nga lôbô mbôma'ane, a jô beyé'é bé na: Etua ayaé fo'o na e bôte be bili akum abui be nyiin *ayoñe Zambe!

²⁴ E nde beyé'é be nga si'an a vembe bifia bié bite. Ane Yésus a nga beta jô be na: A *bon, e ne fo'o étua ayaé ya nyiin *ayoñe Zambe!

²⁵ Da dañe tyi'ibi na kamel a tulan *abé ndôndo alôte na nkukume môt wo nyiin *ayoñe Zambe.

²⁶ Ane be nga beta dañe dañe semé, ba ke ba jô e zañe jab na: Eyoñe éte za fo'o e nye a ye bi ényiñ'

²⁷ E nde Yésus a nga fombô be ne toñ, a jô na: E be bôt, jame te e se ngul ya boban, ve sa ke be Zambe; amu e be Zambe, mam mese me ne ngul ya boban.

²⁸ Ane Pierre a nga nyoñe ñhe nkobô a jô nye na: Tame yen, bi maneya li'i biôme bise a zu tôñe wo!

²⁹ Yésus a nga yalane nye na: Ma kate fo'o mia bebela na, e môt éziñ a ye li'i *nda, nge bobenyañ, nge beka, nge nyia, nge ésaa, nge *bon, nge ke mefub amu ajô dam a ajô Mbamba Foé,

³⁰ a se ngule ya bo te nyoñe biôm bite ntet biôm tañe jôme jia éyoñ ébien ji, a taté menda a kui bobenyañ, a beka, a benyia, a *bon, a mefup, a fulane bikpwe'ele, a ényiñ ya nnôm éto mfa'a ya biyoñ bia zu.

³¹ Abui ya ba be ne ôsu, da ye tebe e mvus, e ba ya mvuse ki ba ye tebe ôsu.

Eyoñe lale Yésus a kate na a ye wu a beta wômô

³² Be ntoo zene zañe valé, be betek a ke Yérusalém, Yésus a tele be ôsu, minleme mi ntyele be yôp, e bôte ki be mbe be za'a ba tôñe be, be ko woñ. Ane a nga beta nyoñe Beyé'é awôm a bebaé, a nga kate be mame ma yiane tôbane nye.

³³ Nye na: Bia ñhe bia bet a ke Yérusalém ba, a Mone Môt, a ye vebane e mo Betuni Benen a Beyeme-bekalate, ba ye tyi'i na a wu a ve nye bikuu,

³⁴ ba ye kpwe'ele nye a tui nye menden, ba ye bibi nye minkasa a wôé nye, ve e mvuse melu mebaé, e môse lale a ye wômô.

Yésus baa bone be Zébédé

³⁵ Ane Yakob baa Yôanes, bone be Zébédé, be nga zu tôbane Yésus a jô nye na: A Ñye'ele bia yi na, e jam bia ye sili wo, ô bo bia de.

³⁶ E nde a nga jô be na: Jé nje mia yi na me bo mia'

³⁷ Ane be nga yalane nye na: Va'a bia ngule ya zu tabe étôto'o jôé été, môte wua e mbo nnôm, nyô mbo'o kik e mbo nga.

³⁸ E nde Yésus a nga jô be na: Mi nji tu'a yem e jôm mia sili! ye mi bili ngule ya nyu *élaé mamien ma ye nyu? Nge dubane kik e nduan mamiene ma ye duban'

³⁹ Ane be nga jô na: Bi bili ngu. Yésus nyee be na: E *élaé mamiene ma ye nyu, mia ye nyu je, a nduan mamiene ma ye duban, mia ye dubane wô,

⁴⁰ ve mfa'a ya bito ya mbo nnôm nge mbo ngale wom, sake ma ma ve bie, bi ne nkôman asu bôt be nee bie.

⁴¹ Eyoñ awôm beyé'é avok e wô'ôya nalé, ane be nga yaa Yakob baa Yôanes.

⁴² Ane Yésus a nga loone be a jô be na: Mia yeme na e bôte mia yene be bili éjôé ya *meyoñ, be titi *meyoñ mete yôb a ngul, e nde fe beta be bôt, ba tibili *meyoñ.

⁴³ Ve avale te e nji bo e be mia. Ve nge môt éziñ a kômbô bo beta môt e zañe jenan, a ye bo mbo ésaé wônan;

⁴⁴ a nge môt éziñ a kômbô bo môt ôsu ya be mia, a ye bo mon *ôlo asu bôte bese.

⁴⁵ Ajô te ñhe Mone Môt nye a nji ke so amu na bôt be saane nye, ve na *a saane bôt, a ve ényiñ jé ntañ bôt abui.

Yésus a saé ndindim Bartimé

⁴⁶ Ane be nga kui Yérikô. Eyoñ a kôlô'ô e Yérikô valé, baa beyé'é bé a ébe'ebe'e nsamba bôt, nde Bartimé, mone Timé, a mbe ndindim, nye k'a too si e fefele *zen, a jaké'é bôte biôm.

⁴⁷ Awô'ô a nga wô'ô na a ne Yésus ya Nazarét, a taté ñhe na a yôtan e yôb été a jô'ô na: A Yésus, mone David, ko m'éngôngo!

⁴⁸ Bôte bevo'o abui be nga bamé nye na a ku évô. Nye k'a nga dañedañe bete *tyiñ e yôb été na: A mone David, ko m'éngôngo!

⁴⁹ Ane Yésus a nga tebe, nye na: Lo'one nye! ane be nga loone ndindim wu, a jô wô na: Volô'ô *nlem, kôlô'ô si, a loone wo!

⁵⁰ E nde fo'o a nga sô'ô kôte jé, a ji'a nyokan tetele, a ke e be Yésus.

⁵¹ E nde Yésus a nga nyoñ nkobô a jô nye na: Wo kômbô na me bo wo jé? Ane ndindim ô nga yalane na: A Rabbuni, ma yi ve na me yen.

⁵² E nde Yésus a jô nye na: Kelek, mbunane wôé ô nyiiya wo. Ane fe a nga yen été été, a nga ke a tôñe nye e zenezen.