MARKUS 1 - Kalate Zambe Nnomo a Mfefe Mfefé Nkôñelan

Yôanes Babtist

¹ Atata'a Mbamba Foé Yésus Krist, Mone Zambe, e nde di,

² aval ane e ne ntilan e kalate *nkulu mejô Ezayi na: O lôô, ma lôme nlômane wom ôsu wôé na ô ke kôme wo *zen.

³ Tyiñe môt éziñ ja ke ja yôtan fé été é jô'ô na: Kômane zene Nti. Sô'ane mezene mé, me bo *zôsôô ne tiiññ.

⁴ Nalé Yôanes a mbe e fé été a du bôt, a kañete'e fe ajô nduan ya nkôñelane minlem asu njamane mam *abé.

⁵ E nde ñhe mfa'a si ôse ya Yudé ô mbe ô za'a be Yôanes a bôte bese ya Yérusalém be kele duban e mendim me Yordan, be meme mam *abé map.

⁶ Yôanes a nga be'e ngômesan é to ntiñan a mimvote mi tite kamel, kandé ékôb é tii nye angeteñ, a ja'a ke ve bitandak a wôé ya mefan.

⁷ E nde ñhe a nga bo a kate bôt Foé a jô'ô na: E môt a zu me mvus a dañe me ngu, me nji bi nkôñ, ja'ane ve abim ya lumbu e si a tiine nye nkole besilefas.

⁸ Mfa'a wom, me me nga du mia a mendim, ve nye ki a ye du mia a Mfufub Nsisim.

Yésus a duban

⁹ E nga bo melu mete na, Yésus a nga so e Nazarét ya Galilé, ane Yôanes a nga du nye ôsôé Yordan été.

¹⁰ E nde e nga bo na, Yésus a kôlô'ô fo'o e mendim été, a nlôô ane yôb da salé, Nsisim a suse be nye aval ane zum.

¹¹ Ane *tyiñ é nga so e yôb été na: Wo ô ne mone wom ma nye'e, me ne ngunguan a wo.

Yésus a tôbane meve'ele

¹² Eté été, Nsisim a nga tindi nye na a ke e fé été.

¹³ E fé été wé, tañe melu mewôm menyiin, Satan a ve'ele'e nye. A nga too baa betit ya mefan, da beéngele be za'a toñe nye.

Yésus a taté ésaé e Galilé

¹⁴ Eyoñ be biya Yôanes, e nde Yésus a nga ke e Galilé, a kele a kañete Mbamba Foé Zambe, a jô'ô na:

¹⁵ Eyoñ é kpwaaneya; Ejôé Zambe é nto bebé: kôñela'ane ñhe minlem, mi buni Mbamba Foé.

Yésus a loone beyé'é b'ôsu

¹⁶ Eyoñ Yésus a mbe a womôlô'ô kindi'i mañe ya Galilé, ane a nga yene Simon baa André, monyañe Simon, ba ke ba wua mvunda ôsôé ôsôé, amu be mbe beyobe kos.

¹⁷ E nde a zu jô be na: Tôñane ma, ma ye bo mia bedutu bôt.

¹⁸ Eté été, ane be nga wua mevot e si, a tôñe nye.

¹⁹ Eyoñ a beteya subu ôsu mone nté, ane a nga yene Yakob baa monyañe wé Yôanes, bone be Zébédé, be kôme mvunda jab éfunga été,

²⁰ e nde fe a nga loone be été été. Ane be nga lik ésaa wob Zébédé baa bebo bisaé éfunga été, ve kôlô a ke tôñe nye.

Yésus a liti ngule jé e Kapernawum

²¹ E nde be nga ke kui e tison ya Kapernawum. A e Sabat ôsu a nga tôñ valé, ane Yésus a nga nyiin *aba Zambe, a nga ye'ele.

²² Ane bôte be nga semé ñye'elane wé angôndô, amu a nga ye'ele be aval ane nyô a bili ngum avale ngul éziñ, teke bo ane beye'ele metiñ bap.

²³ Môt éziñ a nga bili mbia *nsisim a nga too *aba Zambe été valé, e nde a nga yôtane *tyiñ yôp,

²⁴ nye na: Bia be wo bi nee za ajôô, a Yésus ya Nazarét? Ye ô zuya jiane bia! Ma yeme za nye ô né, ô ne Mfufub ya Zambe.

²⁵ Ane Yésus a nga bôé mbia nsinsim *mvam a jô wô na: Dib anyu, kui atan, ô kôlô e be môt ate.

²⁶ Eyoñe mbia *nsisim ô se'eseya nye a ngu, môt a nga kpwemetan, e nde fe ô nga tat étua ngule ntat, ane mbia *nsisim ô nga kôlô be môte ate.

²⁷ Ane angôndô a nga bi be bese, be ve bo fe'e ne vema, môt ase a sili'i nyô mbo'o na: Avale jame dina e ne aya? mfefé ñye'elan, v'ane môt a bili *ntum éjôé. Ja'ane mimbia minsisim a jôô mie, mi ve wô'ô nye.

²⁸ E nde ñhe jôé dé e nga wum a mialane vôm ase été été a yian afôla sese'e ya Galilé.

Yésus a saé ntyi minga Simon Pierre

²⁹ Mvus éte, nné ane be nga kôlô *aba Zambe, e nde baa be Yakob a Yôanes be nga ke nsamba wua e *nda be Simon baa André.

³⁰ Ve da, ntyi minga Simon kik a bôô si, a kone tit, nyôl ayôñ ane nduan. E nde be nga ji'a de ke kate Yésus.

³¹ Ane Yésus a nga ke, a bi nye wo, a bete nye si, ane ayôñ e nga mane nye nyô, a nga belane be.

Minkôkon ya mvuse Sabat

³² E nde mame ngô'é, éyoñ jôb e dimeya, be nga zuu minkôkon mise e be nye, a ba be bili mimbia minsisim.

³³ Ngumba tison ôse ô zu ñhe fo'o ngunubu e *mbé yôp.

³⁴ A nga saé akon mevale meva, a vaa mimbia minsisim abui, teke kañese na a ve mimbia minsisim fete ya kobô, amu mibien mi mbe mi yeme nye.

Yésus a kôlô e Kapernawum

³⁵ A ndib-ndib tyé, éyoñ éte dibi e ngenan, ane Yésus a nga kune kôlô si a dañ atan, a ke vôm bôt be mbe momo, a nga ye'elane valé.

³⁶ E nde Simon a bôte baa be nye be mbe nsamba be nga ke ba jeñe nye.

³⁷ Eyoñ be keya yene nye, ane be nga jô nye na: Ke bôte bese ba jeñe wo!

³⁸ Ane a nga jô be na: Nkelane vôm mfe, e beta be mal be ne bebé va, me ke ma kañete foé wé, amu jam ma te kui de atan e nde te le.

³⁹ Ajô te a nga ke a kate Foé Zambe e meba me Zambe map, a afôla ese ya Galilé, a tita'ane fe mimbia minsisim.

Yésus a saé nzezam

⁴⁰ Ane nzezam ô nga zu be Yésus, ô nga ye'elane nye, meboñ me kutu si a jô na: Nge wo kômbô, ô ne ngul ya bo me *mfuban.

⁴¹ E nde Yésus a nga ko nye éngôngo, a same wo wé, a nambe nye, a jô nye na: Ma kômbô fo'o, bo'o *mfuban!

⁴² Ane *zam é nga mane nye nyôl été été, nye ve mane bo *mvo'é.

⁴³ E nde a nga kobô nye a ayok a ji'a suu nye,

⁴⁴ a jô nye na: O tabe'e ntye, te kate môt jam éziñ, kele fo'o ve be Ntuni, ô liti nye nyôle jôé, ô ve fe biôm Môze a nga tiñeti, mfa'a ntunan ya nyôle jôé, e bo ngaa be bôte bese na ô nto *mvo'é.

⁴⁵ Ake nye ke a nga ke, ve zu ñhe viane kañete de abui abui, a mialane de vôm ase; nalé ate Yésus a nji fe beta bo ngul ya nyiine tison éziñ été e éngengeñ, ane a nga viane ke a tabe atan mefôla me ne teke minlam; bôte bese be nga ke be nye be so'o mimfa'a mise.