MALAKI 3 - Kalate Zambe Nnomo a Mfefe Mfefé Nkôñelan

¹ Mi lôô ma ye lôme nlômane wom. A ye kôme *zen ôsu viam. Nti mia jeñ, *nlôman y'élat mia kômbô nye le a zu, a ye nyine *nda Zambe jé atemetem, nalé Nti ya *minsamba mewosan a jô.

² Za a ye jibi môse ya nsoone wé? Za a ye tebe tetele e *môs a ye yené? Amu a funane nduane nyemé biôm, a funane sobô bewoseman.

³ A ye tabe na a nyemé a fubu argent. A ye tune betuni, bone be Lévi. A ye fubu be ane ba fubu or a argent. Eyoñ éte Nti a ye yene be mvaé amu ba ve aval mvean da yian.

⁴ Mveane Yuda a wu Yérusalém, Nti a ye yene mie mvaé aval ane melu mvus, aval ane mimbu ya mvus.

⁵ Ma ye subu mia bebé asu ntyi'ane mejô. Ma ye bo nyô a ji'a bo'olô bebo majik, a bekañe bengunemelan, bekane ngana medu'an, ba ba se'é bebo bisaé tañe jap, ba ba tibili nkus, monenyui a *ntabe a teke ko ma woñ, nalé Nti ya *minsamba mewosan a jô.

⁶ Amu ma me ne Nti, a me ngenan te tyendé, a mia mi ngenane fe ve bone be Yakob.

Ngab awômô

⁷ Ataté melu b'ésoo mi nga kôlô minjôane miam été, mi nji ke ba'ale mie. Bula'ane be ma a ma ye bulane be mia, nalé Nti ya *minsamba mewosan a jô. Ve mia jô na: Bi beta bulan aya'

⁸ Ye môta binam a ne du'u Zambe? Ve mia du'u ma! A mia jô na: Bi du'uya wo vé? Ajô *ngab awômô a mimvean mivo'o mise.

⁹ Mi ntoo mbiban a biyo'é, a ma mia *duk, mia ngum ayoñe wuna ôse'

¹⁰ Za'ane ñhe *ngab awômô ése e *nda ba naan akum, nalé *nda jam ja ye bi bidi bi ne nnaan; tama ve'elane ma a avale mboone te, nalé Nti ya *minsamba mewosan a jô, éyoñe te mia ye yen nge ma ye bo te dii mia mezene mendime ya yôp, a nge ma ye bo te sôé mia bibotan abui mi to te fe vôm ya futi bie.

¹¹ Ma ye bame ndi biôm asu denan, nalé a ye bo te ndaman bibuma bienane ya si. Ndi'i woone fe wo ye bo te telé ñwumane bibuma e mefane menan été, nalé Nti ya *minsamba mewosan a jô.

¹² Meyoñ mese ma ye jô na mi ne mevak, amu mia ye bo si ya mefok, nalé Nti ya *minsamba mewosan a jô.

Bôte ba saane Nti be bili ébotan

¹³ Mi nga kobô ma nkobô njet, nalé Nti a jô. Ve mi nga jô na: Za njete nkobô bi nga kobô wo'

¹⁴ Mi nga jô na: Bia saane Zambe e fufuli. Ma'ane mangan me ne jé éyoñe bia ba'ale mebendé mé a éyoñe bia wulu mbot asu amu Nti ya *minsamba mewosan'

¹⁵ Eyoñe ji bi lôô na bôt be ne mbia anyu mbe be bili mvaé. Bi lôô fe na e bôt be ne *nkpwala mbe mame mab ma ke ôsu. Nge ba ve'ele Zambe, be fame fe!

¹⁶ Nalé ate bôt ba ko Nti woñ be nga kobô wua a nyô mbok; Nti a too ne séé a vô'ôlô'ô, nde be nga tili môé me bôt be ne ngame ba ba ko Nti woñ a semé jôé dé e kalate ba tili mame ya simesan.

¹⁷ Ba ye bo émbam, nalé Nti ya *minsamba mewosan a jô. E môse ma kômesan, ba ye bo jôme jame mamien. Ma ye kamane be ane môt a kamane mona fame wé a saane nye.

¹⁸ Eyoñe te mia ye beta yen nkandan e zañe zôsôa môt a mbo *abé, e zañe môt a saane Zambe a nyô a nji saane nye.

Môse Nti

¹⁹ Amu ô lôô môse Nti wo zu, ayôñ ane mbe'e nduan. Ba bese be ne bimañ a ba be ne nkpwala ba ye bo ane mimbop; e môse wo zu ôte wo ye di'i be, nalé Nti ya *minsamba mewosan a jô, teke nkañ nge ntyaé wo ye li'i be be.

²⁰ Ve mia mia ko jôé dame woñ, jôbe *zôsôô da ye tôô, a ñyetane bôt wo ye bo e mefabe mé si; mia ye kui atan a tyelé ane bone benyak ba kui nka'alé.

²¹ Mia ye tibi bebo *abé e mebo si; amu ba ye bo ane asup e mebo menane si e môse ma kômesan, nalé Nti ya *minsamba mewosan a jô,

²² Mi simesa'an atiñe mbo ésaé wom Môze nyô me nga ve minjôan a mebendé e nkôl Oréb asu Israél ase.

²³ Mi lôô mamien ma ye lôme lôme mia *nkulu mejô Elie môse Nti ô ngenane te so, e *môs ô n'anen a angôndô.

²⁴ A ye bulane minleme b'ésaa e be *bon, a mi *bon e be b'ésaa, me zaa zu mane jiane ngume si.