MALAKI 2 - Kalate Zambe Nnomo a Mfefe Mfefé Nkôñelan

Né 13:4-10, 28-29; 1S 2:12-17, 27

¹ Eyoñe ji, mia betuni mi nee abendé di.

² Nge mia bo te wôk, a bo te nyoñe jame di nya nyoñane na mi ve jôé dame duma, nalé Nti ya *minsamba mewosan a jô, ma ye lôme mia biyo'é, a ma ye yo'é bibotane bienan. Yaa, ma yo'é ébotane jenan, amu mi nji semé je.

³ Ma nyô, ma yaa na me mane jiane mvoñe bôte jenan, a ma ye lôô mia mebi e mesu, mebi *bityi'a ya mebô'ô menan, a ba ye kee mia a mebi mete nsamba wua.

⁴ Eyoñe te mia ye yeme na me lômeya mia abendé te, nalé élate jam bia Lévi ja ye tabe, nalé Nti ya *minsamba mewosan a jô.

⁵ Elate jam é nga too be nye, é too ényiñ a *mvo'é me nga ve nye na a ko me woñ, nde a nga ko me woñ, a fô'ôban amu jôé dam.

⁶ Atiñ e ne bebela e mbe nye anyu, a mvô é nji bebe nye biyaé *môs éziñ; bia nye bi nga wulu e *mvo'é été a e *zôsôô été; a nga bo bôt abui na be kôlô *abé été.

⁷ Amu biyaé bi *ntuni bia ba'ale ñyeman, a ñye'elane metiñe ya bôt ba jeñ ô ne anyu dé amu a ne nlômane Nti ya *minsamba mewosan.

⁸ Ve mia mi maneya kôlô nya zene, mi maneya fe bo na bôt abui be nga too metiñ été be ku, a mi maneya tyam élate Lévi, nalé Nti ya *minsamba mewosan a jô.

⁹ Ajô te ma fe ma ve mia mi bo jôm ébiasé a jôm ôsame e mise m'ayoñ ese, amu mi nji ba'ale mezene mam, a amu mia nyiñili fulu ôbangam e metiñ me Zambe été.

Malaki a wosane nlu'an bengon bikuu

¹⁰ Ye bia bese bi nji bi ésaa wua? Ye sa Zambe wua nye a nga té bia? Amu jé bia kuane biabebien a ndaman étyi y'élate b'ésaa bangan'

¹¹ Yuda a kuaneya émien, a e jam e n'angôndô e maneya boban Israél a e Yérusalém été; amu Yuda a ndamaneya jôm é ne ntelan étyi asu Nti, e jôme Nti *a nye'e. Be lu'uya fe binga ba kañe bezambe bikuu.

¹² E môt ase a bo avale jame te, ja'an a ne z'avale môtô, a ja'an a ne nyô a ve Nti ya *minsamba mewosan mimvean, Nti a ye vaa nye *nda bôt Yakob été.

¹³ Jam afe mia bo nde di: Mia jalé ata'a metuna'a Nti a milik, miñyôn a mintat, amu a nji beta fombô mimvean nge nyoñe mie *mvo'é e mo menan.

¹⁴ Mia jô na: Amu jé nalé? Amu Nti a nga too ngaa e zañe mia minga ô nga luk ô too ésoé nyô ô maneya joñôlô. Ve wo vuane na a ne nyô mia nye mi nga wulu nsamba, nyô womien ô nga top!

¹⁵ Ye Nti a nji té môte wua, a too minsôn, ve *nsisim ényiñ ô bo'o nye na a fô'ôsan? Môt ate wua a jeñe jé? Ye sa mvoñe bôte Zambe a ve nye? Ajô te sema'an ényiñ jenan, môt a bo'o te bo minga a nga luk a too ésoé njoñ.

¹⁶ Nsuane minga amu évini, nalé Nti, e Zambe Israél a jô, nalé a ne na wo bo mam ane njenjete môt, Nti ya *minsamba mewosan a jô nalé. Ajô te sema'an ényiñe jenan, a te boone bôt be njoñ.

Nsoone Zambe asu ntyi'ane mejô

¹⁷ Mia ndeñele Nti a *minkobô mienan. Mia jô na: Bia ndeñele nye aya? Eyoñe mia jô na: Môt a bo *abé a ne mbamba môt e mise me Nti, bôte bete e mbe a yene mvaé; nge na: E Zambe a tyi'i mejô *zôsôô a ne vé'