MALAKI 1 - Kalate Zambe Nnomo a Mfefe Mfefé Nkôñelan

Bôte ya Israél be ne bikalak

¹ Nkulane mejô Nti a nga Kobô Israél e be Malaki.

² Ma nye'e mia, nalé Nti a jô. Ve mia jô na: Jé ja liti na wo nye'e bia? Ye Esô a nji bo monyañe Yakob? Nalé Nti a jô; ve me nga nye'e Yakob,

³ a ben Esô; me nga bo minkôle mié ne sangaññ, a ve e ngabe si jé betit ya fé.

⁴ Nge *bon b'Edom ba ye jô na: Be maneya bôé bia; ve bia ye beta lôñe mevôm me ne ntyaman. Nti ya *minsamba mewosan a jô na: Be tame lôñ, ve me ma ye tyam, a ba ye loone be na: Si ya mbia be mam, e bôte Nti a yaa be nnôm éto.

⁵ Mise menan ma ye yene de, a mia ye jô na: Anene Nti da lôte minné y'Israél!

Nti a ve betuni mekua

⁶ Mona fam a wumu ésaa, a mbo ésaé a wumu masa wé. Nge me ne ésaa, duma dam e ne vé? Nge me ne masa, ésemé jam é ne vé? Nalé Nti ya *minsamba mewosan a jô mia betuni mia biasé jôé dam. Ve mia jô na: Jé ja liti na bia biasé jôé dôé'

⁷ Mia zuu bidi bi ne te *mfuban ata'a metuna'a dame yôp, ve mia jô na: Bi veya wo mvine nyôl a jé? Eyoñe mia jô na: Tawôlô Nti a ne jôme ya biasé!

⁸ Eyoñe mia soo éyem é ne ntuane dis, ye nalé a nji bo *abé? Eyoñe mia soo éyem ja feñke nge ji ja kon, ye nalé a nji bo *abé? Tame ñhe ve je njôô bôte wôé, ye a ye yene nalé mvaé a nyoñe wo a mevak? Nalé Nti ya *minsamba mewosan a jô.

⁹ Eyoñe ji, ye'ela'ane ñhe Zambe na a mvamane mia! Jame te da so be mia, ye mia buni na ma ye yene mia mvaé? Nalé Nti ya *minsamba mewosan a jô.

¹⁰ Ngo'é nge môt éziñ ya be mia a ye dibe *mbé nda Zambe, nalé mia ye bo te bo'é nduane ya ata'a metuna'a dam e zesé! Me nji yene mia mvaé, nalé Nti ya *minsamba mewosan a jô, a me nji kômbô nyoñe mvean éziñ e mo menan!

¹¹ Amu na ataté e jôbe da tôô a kui e jôbe da dim, e jôé dam e n'anene *meyoñ me bôt été. Ba di'i ôtu vôm ase amu duma ya jôé dam. Nalé Nti ya *minsamba mewosan a jô. Nalé fe na ba zu ve mvean ô ne *mfuban, amu jôé dam e n'anene *meyoñ été, nalé Nti ya *minsamba mewosan a jô.

¹² Ve mia mia ndaman vôm wé a ne étyi éyoñ mia jô na: Tawôlô Nti a ne mvin, a jôm ése ba nyoñ été é ne ji ya biasé.

¹³ Mia jô na: Za nju'u wu! Mi kele mia bete bitu, nalé Nti ya *minsamba mewosan a jô. Ve mia viane zuu jôme wup, ji ja feñke nge ji é n'éyem: Mvean mia zuu ma wô ñwô le! Ye ma ye nyoñe wô e mo menan, nalé Nti a jô.

¹⁴ Biyo'é e be mvômvôle môt wo bo na a bili nnôm éyem a ne *mvo'é e mbame wé, a tiñeti *atiñ, v'éyoñe te a viane ve Nti e tit é nji bo *mvo'é! Amu me ne beta njô bôt, nalé Nti ya *minsamba mewosan a jô, a ba yiane ko jôé dame woñ e *meyoñ me bôt été.