LUKAS 9 - Kalate Zambe Nnomo a Mfefe Mfefé Nkôñelan

Yésus a lôme beyé'é awôm a bebaé

¹ A nga loone beyé'é awôm a bebaé a ve be ngul a éjôé e be mimbia minsisim mise, nalé fe ngule ya yete akon.

² A nga lôme be be yôtan éjôé Zambe a saé minkôkon.

³ A nga jô be na: te mia nyoñe jôm asu dulu, nge *ntum, nge mfek, nge belet, nge moné, a te biane melô'ô mebaé.

⁴ E *nda éziñ mi ne nyiin, taba'an été a e nne mia ye kôlô valé a ke.

⁵ E vôm ase bôt be nji nyoñe mia, éyoñe mia kôlô tison éte, sasane mbulu'u mebo menan aval ane ngaa a wosane be.

⁶ Be nga kôlô a ke e minlam minlam; be mbe be kañete'e mbamba foé a saé bôt e mevôm mese.

Hérôde a tele fe'e ne vema

⁷ Hérôde wua bejôô benyine ya nlam, a nga wô'ô foé ya mam mese me mbe me boba'an, a a mbe fe'e ne vema. Amu bevok be mbe be jô'ô na Yôanes a wômôya miñwuan;

⁸ ba bevo'o na Elie a beteya so a ba bevo'o na wua ya minnôme bekulu mejô a wômôya.

⁹ Ve Hérôde a mbe a jô'ô na: me nga bo na be tyi'i Yôanes nlô; e nde ñhe nyôna a ne za ma wô'ô be kobô'ô avale mame di ajô dé? A a mbe a jeñe na a yene nye.

Yésus a bulu bidi

¹⁰ E mebulane map, minlôman mi nga kañete Yésus e mam mese be nga bo. A nga nyoñe be a kee be e vôm be ne ve be be éfase tison ba loone Bétsayida.

¹¹ Minsamba mi bôt mi nga yene be a tôñe be. Yésus a nga nyoñe be, a a mbe a kobô'ô be ajô éjôé Zambe; a nga saé fe ba bese be nga bili nkômbane ya saéban.

¹² Môs ô nga taté na wo ndeñ beyé'é awôm a bebaé ve zu nye bebé a jô nye na: su'u ndulu bôt na a ke minlam a mefup ya mefôla ma na a yen étaba'a, a jeñe bidi, amu bi ne vana *nkôte si.

¹³ Yésus nye be na: Miabebien va'ane be bidi. Ve be nga yalane na: bi bili ve belet étan a kos ébaé, vengevenge ve biabebien bia ke kuse bidi asu bôte bana bese.

¹⁴ Beyôm befame ki be mbe bebé toyini étan. Yésus a nga jô beyé'é bé na: bo'one be na be tabe si minnoñ minnoñ, nnoñ ôse bôte mewôm metan.

¹⁵ Be nga bo nalé; be nga bo na bese be tabe si.

¹⁶ Yésus a nga nyoñe belet étan a kos ébaé, ve bete mise yôp a botane bie. Wôna a nga be'e bie a ve bie beyé'é bé be kabe bie bôt.

¹⁷ Bese be nga di a jaé a be nga kee minkoé awôm a mibaé ya afufus e nga buk njalan.

Pierre a Meme Yésus; Yésus a kate foé ya mintaé mié

¹⁸ Môs éziñ Yésus a ye'ela'an vôm étam baa beyé'é bé be too, e nde a sili be nsili wu na: bôt ba jô na me ne za'

¹⁹ Be nga yalane na: Yôanes Babtist; bevo'o na: Elie; ba bevo'o na wua ya minnôme bekulu mejô a wômôya.

²⁰ Nye be na: ve mia mia jô na me ne za? Pierre a nga yalane na: Krist a so be Zambe.

²¹ Yésus a nga bendé be a ayo'o ese na be bo te kate de môt éziñ.

²² A nga beté bifia bife na Mona Môt a nga yiane tôbane nju'u abui, bemvendé be nga yiane bene nye, nalé fe minlô betuni a *beyeme bekalate, a nga yiane wôéban a wômô e môse lale.

²³ Wôna a nga jô bese na: nge môt éziñ a kômbô tôñe ma, a vu'an émien, a beke'e Krôa jé *môs ôse a a tôñe ma.

²⁴ Yaa môt ase a ye kômbô nyii ényiñe jé a ye dimili je, ve nyô ase a ye dimili ényiñe jé amu ma a ye nyii je.

²⁵ A da volô môte jé na a bi émo ése nge a dimili émien nge na a ndaman émien'

²⁶ Yaa, e nyô ase a ye wô'ô ma ôson a mejô mam, Mona môt a ye wô'ô nye ôson éyoñ a ye zu étôto'o jé été a e ji Esaa a mimfufube beéngele.

²⁷ Ma jô mia de bebela na: bevo'o ya ba be tele va ba ye bo te tye'e awu te na be taté yen éjôé Zambe.

Yésus a tyendé asu dé

²⁸ Melu me lôteya bebé muam, valé a ndôme mane kobô be mejô mete, Yésus a nga nyoñe Pierre, Yôanes a Yakob e nsamba wé, a a nga bete nkôle yôp asu ya ye'elan.

²⁹ Ezezañe meye'elan, éyeka'a y'asu dé é nga tyendé, a e ngômesane jé é nga bo éfumulu ja faé abui.

³⁰ A teme na baa befame bebaé be nga laan: be mbe Môze a Elie,

³¹ mbe bete, éyoñ be yenéya étôto'o te, be mbe be kobô'ô ajô nkeane wé e ñwô ô nga yiane tôéban e Yérusalém.

³² Oyo ô nga bili Pierre a bôt baa be nye be mbe nsamba; ve be nga tabe évevé a be nga yen étôto'o Yésus a e bôte bebaé baa be nye be mbe.

³³ Eyoñe bôte bete be nga kandane Yésus, Pierre a nga jô nye na: a Nye'ele, e ne mvaé na bi tabe va; e nlôñane menda bindelé melaa: jia asu dôé, jia asu Môze a jia asu Elie. A mbe teke yem e jam a mbe a jô'ôk.

³⁴ A ngenan a kobô'ô nalé, e nde *nkut ô nga zu yandane be a beyé'é be nga ko woñ, éyoñe be mbe be nyi'in e *nkut été.

³⁵ A *tyiñ é nga so e *nkut été na: nyôna a ne e ntobane Mone wom: vô'ôla'ane nye.

³⁶ Eyoñe tyiñe é nga wô'ôban, Yésus a ntoo étam. Beyé'é be nga tabe bivô teke kañete môt éziñ jame ya mam be nga yene melu mete.

Môt a be'e mbia * nsisim a saéban

³⁷ Tyé kpwaa, valé be soya e nkôle yôp, beta nsamba bôt a nga zu tôbane Yésus.

³⁸ A teme na ézezañe ndula bôt, nnôme fam éziñ a nga yône na: a Nye'ele, ma ye'elane wo, fombô'ô monafame wom, amu a ne atyi'i mone dam.

³⁹ Nsisim éziñ wo bi nye, a awolo te ebien a nga yôn, a nsisime te wo bo nye na a nkpwemetan, avul é kui nye anyu, nju'u na ô kôlô be nye éyoñ ô tatéya mane tya'a nye nyôl.

⁴⁰ Ma te ye'elane beyé'é bôé na be vaa wô, ve be nji bo ngul.

⁴¹ Yésus a nga yalane na: A mvoñe betebuni a tyabetyabe, ma ye tabe bia be mia a kui éyoñ évé a jibi mia? Za'a nyô mone va.

⁴² A za'a nye bebé, e nde mbia *nsisim wo dume nye si a bo nye na a nkpwemetan. Ve Yésus a nga bamé mvimvine *nsisim, a saé mongô a kee nye be ésaa.

⁴³ A bese be nga biban a anene Zambe. Bôte bese be ngenane be kamek e mam mese Yésus a mbe a bo'ok, nye beyé'é bé na:

Yésus a kate foé awu dé a ñwômane wé

⁴⁴ e mfa'a wônan, tuka'a keane melo e mejô ma: e Mona môt a ye keeban e mo me bôt.

⁴⁵ Ve beyé'é be nji ke wôk nkobô te; ô mbe nsolan asu dap, nalé ate ba ye bo te yem atinane y'été; a be nga ko woñe ya sili nye minsili été.

Za a dañ? E môt a vaa mimbia minsisim

⁴⁶ Bisô bi nga boban e zañe beyé'é ajô ya yeme za ya be be a dañ.

⁴⁷ Amu Yésus a mbe a yemek asimesane ya minleme miap, a nga nyoñ ôyôme mongô, ve telé wô fefele jé

⁴⁸ a jô be na: nyô ase a nyoñ ôyôme mongô wu a jôé dam, mamiene le a nyoñ; a nyô ase a nyoñe ma, a nyoñe fe e nyô a nga lôme ma. Amu nyô a dañe tyôtyoé e mia bese été e nye ñhe a dañ.

⁴⁹ Yôanes a nga nyoñe nkobô a jô na: a Nye'ele, bi nga yene môt a va'a mimbia minsisim a jôé dôé; bi nga kamane nye na a bo te bo nalé amu a nji ke tôñe wo bia be be.

⁵⁰ Yésus a nga jô nye na: Te kamane nye, amu na nyô a nji wosane mia a ne mia e ngam.

Ataté Besamariteñ

⁵¹ Eyoñe mimôse ya a nga yiane kôlô *si nyô mi nga subu bebé, a nga tyi'i ngume ntyi'ane na a ke Yérusalém

⁵² ve lôme bebe'e mbañete ôsu wé. Be nga téé dulu a nyiin e nlame Besamariteñ éziñ asu ya kômesane mam asu dé.

⁵³ Ve be nga bo teke nyoñe nye, amu a mbe a kelek e mfa'a ya Yérusalém.

⁵⁴ Eyoñe be nga yene nalé, beyé'é, Yakob a Yôanes, be nga jô na: a Nti, ye wo kômbô na bi jô nduan é so yôp a di'i be'

⁵⁵ Ane a nga kôñelan e mfa'a be mbe a komekane be a ayo'o ese a jô be na: mi nji yem e *nsisim wo fô'ô mia.

⁵⁶ Amu Mona môt a nga zu saa amu na a dimili binyiñ bi bôt, ve na a nyii bie. Eyoñe te be nga ke e nlam ôfe.

Aya e nye bôt ba yiane tôñe Yésus'

⁵⁷ Be ngenane *zen, e nde môt éziñ a jô nye na: ma ye tôñe wo e vôm ase wo ye ke.

⁵⁸ Yésus a nga yalane nye na: bemvak be bili mefumba a anone ya yôp e bili mumba'a; ve Mona môt a nji bi vôme ya bôôé e nlô wé.

⁵⁹ A nga jô e mfe na: tôñe ma. A nga yalane na: kañese'e me na me taté ke jame ésaa wom.

⁶⁰ Ve Yésus a nga jô nye na: li'ik mimbim mi jame mimbime miap; a wo, kele kate foé éjôé Zambe.

⁶¹ E mfe a nga jô na: ma ye tôñe wo a Nti, ve taté'é ve ma nkañesane ya ke ya'ane bôte ya *nda jam.

⁶² Yésus a nga yalane nye na: E môt ase a beté wo ékalik a a fombô e mvus, a nji yian éjôé Zambe.