LUKAS 7 - Kalate Zambe Nnomo a Mfefe Mfefé Nkôñelan

Mbo Esaé Evete Ntete Bezimbi

¹ Eyoñ a maneya kobô, bôte bese be mbe be wô'ô nye *minkobô mite mise, ane Yésus a nga nyiin e Kapernawum.

² Evete bezimbi ntete wua é nga bili mbo ésaé a konôk bebé ya wu ve a too nye étua édima.

³ A nga wô'ô be kobô'ô ajô Yésus, nde a lôme bemvendé b'éziñ ya Beyude asu ya sili nye na a zu nyii e mbo ésaé wé.

⁴ Ane be nga kui be Yésus a ye'elane nye be yemete'e nye na: Da yiane na ô bo nye jame te,

⁵ amu *a nye'e ayoñe dangan, e nye fe a nga lôñe *aba Zambe dangan.

⁶ Yésus a kelek baa be be, teke ôyab a *nda évete bezimbi, e nde évete bezimbi ntete wua ja lôme bemvôé b'éziñ be kate Yésus na: A Nti, te wo nyoñ abime nju'u te, amu me nji bo e nyô a yiane na ô nyiin andile dame si.

⁷ Amu ajô te fe me nga bo teke buni na me ne nyô a yiane zu be wo. Ve jô'ôk ajô, a mbo ésaé wom a ye bo *mvo'é.

⁸ Amu e ma me ne éjôé bemasa bam, me bili bezimbi éjôé jame si; a ma jô wua na: Kelek! Nye ve ke; nyô mbo'o na: Za'ak! Nye ve zu; a e mbo ésaé wome na: Bo'o e jame dili! Nye ve bo de.

⁹ Eyoñe Yésus a nga wô'ô mejô mete, a nga kam évete bezimbi ntete wua, ve kôñelan e mfa'a ékôane bôt é mbe é tôñe nye a jô na: Ma jô mia de na: To'o Israél été, me nji koon avale ngule mbunan di.

¹⁰ Eyoñ ba bulan e *nda, bekee *nlôman be nga koon e môt a mbe nkôkon a ntoo *mvo'é.

E mone nkuse minga ya Nayin a wômô

¹¹ E *môs ô nga tôñe valé a nga ke e tisone ba loone Nayin; beyé'é bé a nsamba ézu'u bôt be mbe ba be nye nsamba.

¹² Eyoñ a nga kui bebé a *mbé ya tison a nga yene be kele jame môt a too atyi'i mon, nyia wé a mbe nkus: Ane nsamba bôt ya tison ô nga fulane nsamba wua a nye.

¹³ E Nti a nga yene nye, a ko nye éngôngo a jô nye na: Te yôn!

¹⁴ E nde a subu bebé a nnambe éwolo mbim. Ba be nga be'e je be nga tebe. Yésus na: A Ndômane môt, ma jô wo de na: Kôlô'ô si!

¹⁵ Ane mbim ô nga tabe tôtoo a taté na wo kobô. Yésus a nga kee nye nyia wé.

¹⁶ Woñ ô nga bi bese; be nga kañe Zambe be jô'ô na: Beta *nkulu mejô a tebeya ézezañe jangan, a Zambe a zuya jom ayoñe bôte dé.

¹⁷ Nkobô te ô nga mialan ajô dé e Yudé ase a mefôla mese ma bôéban.

Nsili Yôanes Babtist a sili Yésus

¹⁸ Beyé'é be Yôanes be nga kate nye mam mete mese.

¹⁹ Yôanes a nga loone bebaé ya beyé'é bé a lôme be e be Nti be jô nye na: Ye wo ô ne nyô a yiane zu, ye bi yange môte mfe'

²⁰ Eyoñe be kuiya be nye, bôte bete be nga jô na: Yôanes Babtist a te lôme bia be wo bi jô na: Ye wo ô ne nyô a yiane zu, ye bi yange mfe'

²¹ Awolo te ebien, Yésus a nga yete akon e be abui bôt, miñyeyem a mimbia minsisim a nga saé abui mindindim.

²² E nde a nga yalane be na: Kela katane Yôanes mam mia te yen a wôk: mindindim mia yen, miñyeyem mia wulu, *minzezam mia fuban, mindôndok mia wôk, miñwuan mia wômô, mbamba foé a kateban e be minzôzoé.

²³ Ebotan e be nyô ma ye bo te bo ékolé ôbak!

²⁴ Eyoñe minlôman mi Yôanes mi keya, Yésus a nga taté na a kobô minsamba mi bôt ajô Yôanes na: Jé mi nga ke nye'e mia yen e *nkôte si? Ye nden évuñulu ja fô'ô'

²⁵ Ve jé mi nga ke yen? Ye môt a be'e bibubute mengômesan? Yenan, e ba be be'e abeñe mengômesan be nyiñe fe étôto'o été, be ne e menda bejô bôt été.

²⁶ Jé ñhe mi nga ke yen? Ye *nkulu mejô? Yaa, ma jô mia na: A dañe *nkulu mejô.

²⁷ E nye ajô dé e ne ntilane na: ô lôô, ma lôme nkee minlômane ôsu viôé, asu ya kômesane zene jôé ôsu viôé

²⁸ ma jô mia de na: e ba be nga bialé e be binga été, nyô a ne anen été a dañe Yôanes a nji bo. Ve da, éjôé Zambe, nyô a dañe tyôtyoé a dañe nye.

²⁹ E bôte bese be nga vô'ôlô nye a benyoñe *toya be nga kale nye éyoñe be nga bo na be nyoñe nduane Yôanes;

³⁰ ve Befarizieñ a beye'ele metiñ, mbenan be nga bene na a duu be, be nga wua ôsimesane Zambe e mfa'a wobe bebien.

³¹ Ma ye ve'ane bôte ya miaé wu a za? A ba funane za'

³² Ba funane bongô be too e vôme bôte bese ba tabe e mbe ba loone be be jô'ô na: Bi maneya loñe mia mfañ, a mia mi nji jem; bi maneya yia bia bi du, ve mi nji ke yôn.

³³ Amu Yôanes a nga zu, a nji di bidi, a nji nyu woon, mi na: A bili mbia *nsisim.

³⁴ Mona môt a soya, a ja'ak, a nya'ak, mi na: a ne e môt a di abui a e nyuu woon, mvôé benyoñe *toya a bebo *abé.

³⁵ Ve ba bese ba kañese fe'e Zambe ba yeme na é ne *zôsôô.

Mbo * abé a ne minga a jamban

³⁶ Wua ya Befarizieñ a nga ye'elane Yésus na ba nye be di. Ane Yésus a nga nyiin e ndaa mone Farizieñ a tabe tawôlô.

³⁷ Nde mbo *abé minga éziñ ke a mbe valé e tison, a nga yeme na Yésus a nga too tawôlô e ndaa Farizieñ; ane a nga soo nde'e Albata njalan ôlobinda.

³⁸ Ve tebe mvuse mebo mé. A mbe a yônôk a taté na a ve mebo me Yésus émumun a mili'i mé, wôna a nga fimi me a ésile jé, a wuba'ane me a sôé fe me ôlobinda.

³⁹ A yene a nga yene nalé, e nde Farizieñ a nga bañete nye a nga jô émien été na: Nge môte nyô a mbe *nkulu mejô, a nga ye yeme za e nye minga a nnambe nye a né, a na a ne mbo *abé minga.

⁴⁰ Yésus a nga nyoñe nkobô a jô nye na: A Simon, me bili jam éziñ ya jô wo: Nye Yésus na: Kobô'ô a Nye'ele:

⁴¹ Nsé memvôla a nga bili bôte be bili nye memvôla bebaé: Wua bedenié mintete mitan, nyô mbo'o bedenié mewôm metan.

⁴² Mbôlô be nji bi jôme ya ya'an, a nga jamé mvôla e be be bebaane. E *mbé a ye dañe nye'e nye'

⁴³ Simon a nga yalane na: Ma ve'e fe'e na e nyô a nga jamé beta tañ; Yésus a nga jô nye na: Ô yemeya tyik.

⁴⁴ Wôna a nga kôñelan e mfa'a minga a mbe a jô Simon na: Ye ô lôô e minga nyô? Ma te nyiin e *nda jôé, ô nji ve ma mendim asu mebo mam, ve nye a te ve mebo mam émumun a mili'i mé, a fimi me a ésile jé.

⁴⁵ O nji latane ma anyu, ve nye, nté ma te nyiin, a nji jô'é latane mebo mam a anyu dé.

⁴⁶ O nji sôôé me mbone nlô; ve nye a maneya sôôé ôlobinda e mebo mam.

⁴⁷ Ajô te ma jô wo de na: ézu'u mam *abé jéé é ntoo *njaman, amu e nye a dañeya nye'e. Ve nyô ba jamé tyôtyoé *a nye'e fe tyôtyoé.

⁴⁸ Nye minga na: Mam *abé môé, me ntoo *njaman.

⁴⁹ E ba baa be be be nga too tawôlô be nga taté na ba jô e be bebien été na: Nyôna a ne za *a jamé to'o mam *abé.

⁵⁰ Ve a nga jô minga na: e mbunane wôé ô nyiiya wo, kele *mvo'é.