LUKAS 6 - Kalate Zambe Nnomo a Mfefe Mfefé Nkôñelan

Sabat: bezôzô be fôn; E môt a mbe wo nkôt

¹ E nga kui môse Sabat éziñe na Yésus a lôt e mefup. Beyé'é béé be nga bu'u fôn a di je éyoñe be maneya sile je mo été.

² Befarizieñ b'éziñ be nga jô be na: Amu jé mia bo e jam e nji bo nkañesane ya boban e môse *sabat'

³ Yésus a nga yalane be na: Ye mi nji lañe jame David a nga bo, éyoñ a nga wô'ô zaé, émien a e bôte béé;

⁴ aval avé a nga nyiin e *nda Zambe a nyoñe fembé é ne étyi, ve di je a ve je bôte bé, akôsa bo na betuni étam be mbe be bili nkañesane ya di je'

⁵ A nga jô be na: Mona môt a ne masa *sabat.

⁶ E nga beta bobane môse *sabat ôfe na: Yésus ve nyiin *aba Zambe, a nga ye'ele. Môt éziñ a mbe valé, wo ya mbo nnôm ô too nye nkôt.

⁷ Beyeme bekalate a Befarizieñ be mbe valé be fombô'ô Yésus, be yange'e yen nge a saé môt e môse *sabat: e mbe amu be mbe be jeñek ajô ya ve nye mekua.

⁸ Ve a mbe a yemek asimesane dap, e nde a nga jô môt a mbe wo nkôte na: Kôlô'ô si a tebe'e valé ézezañ. Ane a nga kôlô si a tebe tetele.

⁹ A Yésus a nga jô be na: Ma sili mia de: Ye e ne nkañesan e môse *sabat na bi bo mvaé, nge na bi bo *abé, na bi nyii môt, nge na bi dimili nye.

¹⁰ Eyoñ a maneya wua mis e be be bese, a nga jô môt ate na: Same wo wôé. A nga bo nalé a wo wé ô nga bo *mvo'é.

¹¹ Njalan a ayaa, be nga sañetan e zañe jap ajô jam be ne bo Yésus.

Ntobane beyé'é awôm a bebaé

¹² Eyoñe te, Yésus a nga ke e nkôle yôbe na a ye'elan; a nga lôt ngum alu na a ye'elane Zambe.

¹³ Eyoñe tyé é nga lendé, a nga loone beyé'é béé a top awôm a bebaé y'été, e mbe a nga yôlé na minlôman:

¹⁴ Simon, a nga loone na Pierre, André monyañe wé, Yakob, Yôanes, Filip, Bartélémi,

¹⁵ Metias, Tômas, Yakob e mone Alfé, Simon nyô be mbe be lo'one Zélôte,

¹⁶ Yude e mone Yakob a Yudas Iskariôt, nyô a nga su'ulane bo nkoñe bôt.

Sermoñ ya nkôle yôp: Bibotan

¹⁷ Baa be be be nga siliki a a nga tebe nje'ese, e vôme beta nsamba ya beyé'é bé a nga too, nalé fe bizu'u bi bôt ya Yudé, Yérusalém a nsa'a mañ ya Tir, a Sidoñ. Be nga zu vô'ôlô nye a asu ya saéban akone dap.

¹⁸ E ba mimvimvine minsisim mi nga ndeñele be nga saéban.

¹⁹ A nsamba ôse ô nga jeñe na ô nnambe nye, amu ngul éziñ é mbe é so'o be nye a saé bese.

²⁰ Ane a nga fombô beyé'é bé a jô na: Ebotan a mia minzôzoé, amu éjôé ya yôp é ne énjenan!

²¹ Ebotan a mia mia wô'ô zaé éyoñe ji, amu mia ye jaé! Ebotan a mia mia yôn éyoñe ji, amu mia ye vak!

²² Mia ye bo ébotan, éyoñe bôt ba ye siñe mia, éyoñe ba ye titane mia, ba ye taa mia a wua jôé denan ane di ôsame, amu mona môt.

²³ Va'ane *môs ôte a fônan a mevak, amu ma'ane menan ma ye bo anen e yôp; amu nalé ate beésa bap be nga bo bekulu mejô.

²⁴ Ve bidim a mia minkukum, amu mi mbili mvolane nleme wônan.

²⁵ Bidim a mia mebum me ne minlem éyoñe ji, amu mia ye wô'ô zaé! Bidim a mia mia woé éyoñe ji, amu mia ye ku ôlun a e milik été!

²⁶ Bidim a mia, éyoñe bôte bese ba ye kobô mbamba nkobô ajô denan, amu nalé ate beésa bap be nga bo bivôle vôla bekulu mejô.

Nye'ane ya nye'e besiñ

²⁷ Ve ma jô e mia mia vô'ôlô ma na: Nyeka'ane besiñe benan, bo'one ba ba vini mia mvaé,

²⁸ bota'ane ba ba yo'é mia, ye'ela'an ajô ba ba kpwe'ele mia.

²⁹ Nge môt éziñ a bibi wo amañe da, ke'e fe di avok. Nge môt a nyoñe wo alô'ô dôé, te kamane nye na a nyoñe fe wo kôt.

³⁰ Môt a sili wo jôm, va'a nye je a te sé môt a nyoñe wo biôme mvôla.

³¹ E jam mia kômbô na bôt be bo asu denan, bo'one de avale da asu dap.

³² Nge mia nye'e e bôt ba nye'e mia, za akéva ba ye ve mia? Bebo *abé fe ba nye'e e bôt ba nye'e be.

³³ Nge mia bo mvaé e be bôt ba bo mia mvaé za akéva ba ye ve mia? Bebo *abé fe ba bo avale te.

³⁴ Nge mia ve bikôla e be bôt mia buni na mia ye nyoñe be be, za akéva ba ye ve mia? Bebo *abé fe ba ve bebo *abé bikôla, nalé ba ye nyoñe mvol.

³⁵ Ve nyeka'ane besiñe benan, bo'one mvaé a va'ane bikôla tee ndinlem ya bulane nyoñ. Ma'ane menan ma ye bo anen a mia ye bo bone be Nyô A Dañ Oyabe yôp, amu a ne mbaa *nlem e be ba be ne bikalak a ba be ne kpwala.

³⁶ Koone bôt éngôngo ane ésoo wônan a koo bôt éngôngo.

Ntyi'ane mejô

³⁷ Te tyi'ane bôte mejô, nalé mia ye bo te tyi'ibane mejô, te veane bôte mekua a mia ye bo te vebane mekua, jama'an a mia ye jamban.

³⁸ Va'an a ba ye ve mia; ba ye sôé jôm é ne mbamba mve'an abume denan été é too njinan, nse'esan a kui na é fuluku; amu ba ye ve'e mia a ôvek mia ve'e wô.

³⁹ A nga ku fe be *nkana na: Ye ndindim ô ne liti ndindime *zen? Ye bebaane ba ye bo te ku ébé'

⁴⁰ Nyé'é a nji dañe nye'ele; ve ñye'é ase a ne njalan ayé'é dé été a ye bo ane nye'ele wé.

⁴¹ Amu jé wo yene évua é ne e dise monyoñ, ve teke yene mbôñ ô ne e dise dôé womien'

⁴² Nge na ô ne nguleya jô monyoñ aya na: A mojañ, jôké'é me vaa wo évua é ne wo dis, e wo ô ne teke yen mbôñ ô ne wo dis? A *môte bebadu'u taté'é vaa e mbôñ ô ne dise dôé, mvus éte wo ye yen a vaa évua é ne e dise monyoñ.

⁴³ Teke mbamba élé a wume mbia ébuma, nge mbia élé ki a wume mbamba ébuma.

⁴⁴ Amu élé ése ba yeme je a ébuma é ne énjéé. Be nji kolé befig e biyo, a be nji koé bibuma bi ndi'i woon e minsinik.

⁴⁵ Mbamba môt a nyoñe mvaé a soo je e mbamba akume ya e nleme wé, a mbia môt a nyoñ *abé da so nye e mbia akume wé, amu anyu môt da kobô e jam e ne nye njalan e *nlem.

Mboone mejô me Zambe

⁴⁶ Amu jé mia loone me na: Nti, Nti! Ve teke bo jam ma jô'

⁴⁷ Môt ase a zu be ma, a wô'ô mejô mam a bo me, ma ye liti mia e môt a funane nye:

⁴⁸ a funane môt a nga lôñe *nda. A nga fa'a si édok a bôôé mbôka'a akôme yôp. Ndôn é nga kui, ôsôé ô nga jimbi *nda éte, ve teke kui na é kpwé *nda éte si, amu é mbe mbamba nlôñan.

⁴⁹ Ve nyô a wôk teke bo a funane môt a nga lôñe *nda e si teke mbôka'a. Ôsôé ô nga jimbi je; été été é nga ku, a *nda éte é nga tyamé beta njamban.