LUKAS 4 - Kalate Zambe Nnomo a Mfefe Mfefé Nkôñelan

Satan a ve'ele Yésus

¹ Yésus a soya Yordan, njalan a Mfufube Nsisim, e nde Nsisim a nga kee nye e *nkôte si,

² e mfa'a a nga tabe tañe môse mewôm menyin, Satan a bôbôlô'ô nye. E mimôs mite, a nji di jôm, éyoñe mi maneya a nga wô'ô zaé.

³ E nde ñhe Satan a jô nye na: Nge ô ne mone Zambe, jô'ô ako'o dina é veñesane belet.

⁴ Yésus ke ve yalane nye na: e ne ntilane na: Môt aa ye ke nyiñ ve a bidi étam.

⁵ Satan a nga kee nye ôyabe yôp wo dañ, a liti nye bijôé bise y'émo ji ane nkabeke dis,

⁶ a jô nye na: Ma ye ve wo ngul ése nyô a duma ya bijôé bi; amu e nga vebane be ma a ma ve je e nyô ase ma kômbô.

⁷ Nge wo kute ñhe meboñe si ôsu viam, duma te ese da ye bo éndôé.

⁸ Yésus a nga yalane nye na: e ne ntilane na: Wo ye kañe Nti, e Zambe wôé, a asu dé étam e nde wo ye bo bisulan.

⁹ A nga ke'e nye e Yérusalém a telé nye e nkume yôbe ya *nda Zambe a jô nye na: Nge ô ne e mone Zambe ko'o a ku si womien,

¹⁰ amu e ne ntilane na: a ye bendé beéngele béé ajô dôé na be ba'ale wo

¹¹ a na ba ye be'e wo, abo dôé e bo te kômôtô akok.

¹² Yésus a nga yalane nye na: e nga jôbane na: Wo ye bo te bôbôlô Nti, e Zambe wôé.

¹³ Eyoñ avale *meve'ele ese e maneya, nde Satan a nga kôlô a ke akekui éyoñ éfe.

Nkobane mejô me Zambe e Nazarét

¹⁴ Ane Yésus a nga beta zu e Galilé a ngule mfufube Nsisim, e nde duma e nga yian afôla si te ese ajô dé;

¹⁵ a a mbe a ye'ele'e e meba me Zambe map, bese be va'a nye duma.

¹⁶ Mvus éte, a nga zu e Nazarét, e vôm a nga yaé; e nde a nga nyiin *aba Zambe môse Sabat avale fulu jé é mbe, ve kôlô si na a lañe Kalate Zambe.

¹⁷ Be nga kee nye kalate *nkulu mejô Ezayi, éyoñ a kuliya mvulekane kalate, e nde a yene vôm a mbe ntilane na:

¹⁸ Nsisime Nti ô ne be ma amu a nga wo'o ma mbone na me kate minzôzoé Mbamba Foé; a nga lôme me na me yôtan éto fili e be minkôm mindindime na mi beta yen, e bôt ba nyiñ étibela'a été na be bulan bi éto fili jap,

¹⁹ a yôtane mbamba mbu Nti.

²⁰ Eyoñ a maneya vuluku kalate a bulane nye e be mba'ale, a nga tabe si. Mise mese, *aba Zambe été, me mbeme ñhe nye nyô.

²¹ Ve taté ñhe na a jô be avale di na: Den, e ntilan mi ndôme mane wô'ô nlañan e melo menan ô tôébaneya.

²² A bese be nga bo nye ngaa a be nga semé mejô me *mvam me nga kui anyu dé, e nde be nga jô jô na: Ye nyôna a nji bo e mone Yôsep nga'

²³ Nye ke ve yalane be na: Ye mia ye kane ma e *nkana wu na: a *dokita, saé ñhe womien, mam mese bi nga wô'ô na ô nga bo Kapernawum, bo'o ñhe fe me avale da vana e si jôé.

²⁴ Nye na: Ma jô mia bebela na: Teke *nkulu mejô éziñ ba nyoñ abeñ e si jé.

²⁵ Ma jô mia bebela na: Abui minkuse mi binga e mbe Israél melu me *nkulu mejô Elie, éyoñe yôp e nga diban mimbu milaa a ngon ésaman, éyoñe beta mfumbale zaé a nga kui e si ése,

²⁶ Elie a nji lômban e be wua y'été, ve be nkuse minga ya Sarépta e Sidoñ.

²⁷ Abui *minzezam e mbe Israél éyoñ Elizé *nkulu mejô teke wua y'été ô nga saéban, ve Naman môte ya Siri.

²⁸ Ane bese be nga jaé a ayaa *aba Zambe été éyoñ be nga wô'ô mam mete,

²⁹ be ve tebe a titane nye e tison atan, ve kee nye a kui ayo nkôle ya tison é mbe nlôñan asu ya sô'ôlô nye e nkôle si.

³⁰ V'éyoñ a tulaneya be zañ, a nga ke.

Yésus a saé abui akon

³¹ A nga siliki e Kapernawum, tisone ya Galilé; a nga ye'ele e môse Sabat.

³² Be nga semé e nye'elane wé, amu a mbe a kobô'ô a ngule njôan.

³³ Môt éziñ a mbe *aba Zambe été valé a bili mbia *nsisim, a nga yôtane tyiñe ngule na:

³⁴ éé! Wo kômbô bo bia aya, a Yésus ya Nazarét? Ô nga zu jañele bia. Ma yene na ô ne Nyôa Zambe a ne étyi.

³⁵ Yésus ve bamé nye na: Tabe'e a kôlô'ô be môt ate. Ane mbia Nsisim a nga sô'ôlô e môte nyôna ézezañ ékôane bôt a kôlô be nye teke nye bo jam éziñ é ne *abé.

³⁶ Woñ ô nga bi bese, bana be jô'ô ba bevo'o na: Nkobô ôvé wu? A jôô mimvimvine minsisim a éjôé a ngul, mie ve kui atan.

³⁷ Duma dé e nga yian afôla si te ese.

³⁸ Nkôlan ya *aba Zambe, a nga ke e *nda Simon. Ntyia minga Simon a mbe a kpwemeta'ane tit abui, e nde ba ye'elane Yésus na a saé nye.

³⁹ A nga vitibi nye yôp a bamé tit a tit éte é nga kôlô be nye. Awolo te a nga kôlô si a belane be.

⁴⁰ Mvuse nlumbane jôp, e ba bese be nga bili minkôkon mi nga bili akon mevale meva be nga zuu mie be nye. A nga beté môt ase ya be be mo a saé be.

⁴¹ Mimbia minsisime fe mi nga kôlô e be abui bôt mi yôta'an a jô na: Ô ne e mone Zambe. Ve a mbe a bamé'é mie teke ve ngule na mi kobô, amu mi mbe mi yeme na a ne Krist.

⁴² E melendé me tyé, a nga kui atan a ke e vôme bôt be nji bo. Bizu'u bi bôt bi taté ñhe na bia jeñe nye a kui be nye; be nga kômbô bi nye na a bo te kandane be.

⁴³ Ve a nga jô be na: Ma yiane fe kate bitisone bife mbamba foé y'éjôé Zambe; amu jame te e nde me nga lômbane de.

⁴⁴ A a nga kobô mejô me Zambe e meba me Zambe ya Galilé.