LUKAS 24 - Kalate Zambe Nnomo a Mfefe Mfefé Nkôñelan

Ñwômane soñ Yésus Krist

¹ E *môs ôsu ya sondô, be nga ke soñ ésala tyé, be bili mimbon mi ne mbamba menyum be nga mane kômesan.

² Be nga koone na akok e ntoo mvasan asu soñ;

³ be nga nyiin, ve be nji koone mbime Nti Yésus.

⁴ Mbôlô be mbe fe'e ne vema ajô di, ateme na bôte bebaé be nga yené be be be be'e mengômesan ma faé.

⁵ Be nga luu mesu si a woñ ôse; ve be nga jô be na: Amu jé mia jeñe nyô a vee e miñwuan été'

⁶ A nji bo va, ve a wômôya. Simesa'an aval avé a nga kobô mia éyoñ a mbe Galilé,

⁷ a jô'ô na: Mona môt a yiane keeban e mo bebo mbia be mam, a yiane tyelébane Krôa, ve a yiane wômô e môse lale.

⁸ A be nga simesane nkobô Yésus.

⁹ Nkôlaneya soñ, be nga bulan asu ya kate beyé'é awôm a wua a bôte bevo'o mam mete mese.

¹⁰ Be mbe na: Marie Madeléne, Yôana, Marie nyia Yakob; a ba bevok mfula'an a be e mbe be nga kate de minlôman;

¹¹ ve nkobô te ô nga yené be be ane fianga, ajô te be nji ke buni binga bete.

¹² Ve Pierre a nga kôlô si a ke mbile soñ. Eyoñ a kumbu, a nga yene ve biyé bi bôô si; wôna a nga bulane *nda jé a kamek e jam e nga kui.

Beyé'é y'Emmaus

¹³ Môse te ôbien bebaé ya be be be mbe be kelek e nlam jôé na Emaus, bebé kiliméta awôm a jia a kui Yérusalém,

¹⁴ be mbe be la'ane minlañ ajô mam mese me nga boban.

¹⁵ E nté be mbe be la'an a sañetan e zañe jap, Yésus a nga kui be bebé a nyiine nsamba wop.

¹⁶ Ve mise map me mbe te nguleya yeme nye.

¹⁷ A nga jô be na: Za minlañ mia laane zañe jenan éyoñ mia wulu? Ane be nga tebe, be wô'ô ôlun.

¹⁸ Wua ya be be, jôé na Kléôpas, a nga yalane nye na: Ye ô ne étam ô too Yérusalém teke yeme mam ma boban été melu ma'

¹⁹ Jia? E Yésus a sili be. Be nga yalane nye na: E jam e nga kui ajô Yésus ya Nazarét, e nye a mbe *nkulu mejô a ne éwôlô e mimboon a e nkobô asu Zambe a asu bôt,

²⁰ a aval avé minlô betuni miangan a bivete biangan be nga ve nye na a nyoñe mekua ya awu a tyelé nye *krôa yôp.

²¹ Bi nga too ndi minleme na e nye a ye kôté Israél, ve mbunda'an a mam mete mese e môse lale e ñwô bi ntoo wu ane mam mete me mane boban.

²² E ne bebela na binga b'éziñe ya be bia ba te bo bia na bi kame beta nkaman; ba te kune ke soñ a,

²³ éyoñ be boya teke koone mbim, ba te zu jô na beéngele ba te yené be be a kate na a ne vevee.

²⁴ Bevo'o b'éziñe ya ba bia be be bi mbe ba te ke soñ a koone mam avale binga ba te jô; ve Nye, be nji ke nye yen.

²⁵ E nde Yésus a nga jô be na: A bôt be ne fe'e momo, a *nlem ôte'ete'e ya buni mam mese bekulu mejô be nga jô!

²⁶ Ye Krist a nji yiane tôbane mintaé avale te a nyiin étôto'o jé'

²⁷ Ane a nga liti be, e Mintilane mise, e mam ma fombô nye, Ataté Môze a kalane bekulu mejô bese.

²⁸ Eyoñe be nga kui bebé a e nlam be mbe be kelek, a nga yené ane môt a kômbô ke ôyab abui.

²⁹ Ve be nga yemete nye na: Tabe'e bia be mia, amu ngô'é é ntoo bebé, *môs ô nga lumbu. A nga nyiine na baa be be be tabe.

³⁰ A too tawôlô baa be be, e nde a nyoñe fembé, a tote bifia bibotan; wôna a nga be'e je a ve be je.

³¹ Ane mise map me nga kuiban a be nga yeme nye; ve a nga jañe be mis.

³² A be nga jôan wua a nyô mbo'o na: Ye minlem mi nji bo'o bia e mebum, éyoñ a to'o a kobô'ô bia *zen a kôñela'ane bia Mimfufube Mintilan'

³³ Awolo te ebien be nga kôlô si a bulane Yérusalém a koone beyé'é awôm a wua a bemvôé bap nsula'an

³⁴ e mbe be nga jô be na: E ne fo'o bebela na Nti a wômôya, a a yenéya be Simon.

³⁵ Be nga kañete jam e nga kui be be *zen, a aval avé be nga yeme nye éyoñe mbe'ane fembé.

Yésus a yené e be beyé'é awôm a wua

³⁶ Be ngenane be kobô'ô nalé, Emien ve suan ézezañe jap a jô be na: Mvo'é é bo'o a mia.

³⁷ Njalane woñ be nga buni na be yeneya kôn.

³⁸ Ve a nga jô be na: Amu jé minsisime mienan mi ne ntu'ulan a amu jé aval asimesane te da yené e minleme été'

³⁹ Yenane mo mam a mebo mam, mamiene le; namba'ane ma a yenan: Nsisim ô nji bi minsôn nge bives, avale mi lôô me bili.

⁴⁰ A a jô'ô nalé, a nga liti be mo a mebo.

⁴¹ Mbôlô, ava'a dap été, be mbe be ngenane teke buni, a be mbe be kamek, a nga jô be na: Ye mi bili jôme ya di va'

⁴² Be nga kee nye étune kos é too mbuban.

⁴³ A nga nyoñe je a di je ôsu viap.

⁴⁴ Wôna a nga jô be na: E jame me mbe me jô'ô mia e nde le éyoñe te bia be mia bi ngenan na: Mam mese me ne ntilan ajô dame metiñe me Môze, e be bekulu mejô a besam me nga yiane tôéban.

⁴⁵ Ane a nga yooé be fek asu ya yeme Mimfufube Mintilan.

⁴⁶ A a nga jô be na: E nne e ne ntilane nalé na Krist a nga yiane tôbane mintaé, a a nga yiane wômô miñwuan e môse lale

⁴⁷ a na nkôñelane minlem asu njamane mam *abé ô nga yiane kateban e be meyoñe mese amu jôé dé ataté Yérusalém.

⁴⁸ Mi ne bengaa y'été.

⁴⁹ A mi lôô: Ma ye lôme mia e jôme Esaa wom a nga ka'a mia, ve mia, taba'an e tison été, akekui mia ye jaléban a ngule ya yôp.

Nkeane yôp

⁵⁰ A nga kee be a kui mfa'a ya Bétani, wôna a nga bete mo yôp a botane be.

⁵¹ A ngenan a bota'ane be, e nde a kandane be a betebane yôp.

⁵² Mfa'a wop, éyoñe be maneya kañe nye, be nga bulane Yérusalém, njalan a beta mevak;

⁵³ a be mbe *nda Zambe éyoñ ése be va'a Zambe akéva.