LUKAS 23 - Kalate Zambe Nnomo a Mfefe Mfefé Nkôñelan

Yésus a kobô ajô asu Pilat a asu Hérôde

¹ Be nga kôlô si bese nsamba a kee Yésus asu be Pilat.

² Be nga taté na ba bo'olô nye mejô be jô'ô na: Bi nga koone môte nyô a sô'ôlô'ô bôte y'ayoñe dangane na be bene njôan, a kama'ane na be bo teke ya'ane kéza *toya, a jô'ô fe émiene na a ne Krist, njô bôt.

³ Pilat a nga sili nye minsili avale di na: Ye ô ne njô bôte Beyude nga? Yésus a nga yalane nye na: Wo jô nalé.

⁴ Pilat a nga jô minlô betuni a jama bôte na: Me nji yene jam da yiane mekua e be môte nyô.

⁵ Ve be nga yeme ngu a jô na: A ngômelane bôt a ñye'elan a ke a ye'ele e Yudé ase, ataté Galilé vôm a nga taté a kui va.

⁶ Eyoñe Pilat a nga wô'ô nalé, a nga sili nge môt ate a mbe môte ya Galilé;

⁷ Éyoñ a wô'ôya na a mbe éjôé Hérôde, a nga lôme nye e be Hérôde amu nye fe a mbe Yérusalém melu mete.

⁸ Eyoñe Hérôde a nga yene Yésus, a nga vak abui, amu ôbe nté mvus a nga bi nkômbane ya yene nye amu mam a nga wô'ô be kobô'ô ajô dé, a mbe a buni'i na a ye yene nye a bo'o étua jam éziñ.

⁹ A nga sili nye minsili ôbe ayap, ve Yésus a nji yalane nye jam éziñ.

¹⁰ Minlô betuni a *beyeme bekalate be mbe valé be bo'olô'ô nye mejô ngulengu.

¹¹ Hérôde a bezimbi bé be nga bo nye mam a ébiasé ése; a éyoñ be maneya kpwe'ele nye a jalé nye ngômesan ja faé, be nga bulane nye be Pilat.

¹² Môs ôte ôbien Pilat ba Hérôde be nga bo bemvôé, a too ke na be mbe minziziñ melu mvus.

Yésus a nji yem ajô

¹³ Pilat a nga bañete minlô betuni a bivete y'ayoñ,

¹⁴ a jô be na: Mi nga zuu ma môte nyô ane nyô a sô'ôlô bôte na be bene njôan. Tama yenan, me maneya sili nye minsili ôsu vienan, me nji koone nye mekua me jia ya bikobe mia lañe nye.

¹⁵ Hérôde fe avale da, amu a bulaneya bia nye, a mi lôô na e môte nyô a nji bo jam éziñ da yian awu.

¹⁶ Ajô te ma ye suu nye éyoñ me maneya bo na be bibi nye minkasa.

¹⁷ Abô'ô ese, Pilat a mbe ntindane ya suu be mbôk éziñ.

¹⁸ Be nga yôtane bese nsamba wua na: Bo'o na e môte nyô a wu a su'u bia Barabas.

¹⁹ Barabas a nga keebane mbôk ajô ékukuma é nga boban e tison a ajô mewôé me môt.

²⁰ Pilat a nga beta kobô be, nkômban wé ô too na a suu Yésus.

²¹ Ve be mbe be yôta'ane na: Tyelé'é nye *krôa yôp! Tyelé'é nye *krôa yôp!

²² Pilat a nga beta jô éyoñe lale na: Z'aval *abé a nga bo? Me nji yene jam éziñe be nye da yian awu. Ajô te ma ye suu nye éyoñe me maneya bo na be bibi nye minkasa.

²³ Ve be nga yemete a mbetane metyiñe ngul be sili'i na be tyelé nye *krôa yôp. A metyiñe map me nga dañ.

²⁴ Pilat a nga nyoñe ntyi'an wo yiane nsili wop.

²⁵ A nga suu e nyô a nga wuaban e *nda mimbôk ajô ékukuma a ajô mewôé me môt e nye ate be mbe be sili'i; ve a nga kee Yésus e mo me nkômbane wop.

Yésus a tyelébane krôa

²⁶ Eyoñe be kele nye, be nga nyoñe Simon éziñ ya Sirén a so'o mefup, a be nga kee nye mbe'e *krôa, naa a be'e wô e mvuse Yésus.

²⁷ Beta ndula bôt a binga be nga tôñe nye mvus; binga ba be mbe be kute mekôp a beté mo tôé be yônô'ô nye.

²⁸ Yésus a nga kôñelane be be a jô na: A bengone ya Yérusalém, te yônane ma, ve yônane miabebien a bone benan.

²⁹ Amu mi lôô: Melu ma zu e mme ba ye jô na: Ebotan é bo'o be minkôkôm mi binga, ébotan é bo'o be binga be nji biaé *bon a be nji nyaa *bon!

³⁰ Eyoñe te ba ye jô beta minkôle na: Kpwa'ane bia yôp! A bone minkôle na: Buta'ane bia yôp!

³¹ Amu nge ba bo nyumi élé avale di, aya a ye kui e be nkôt élé'

³² Eyoñe be mbe be kele wôé Yésus, éyoñe jia te fe be nga kee bebo mbia be mam bebaé baa be nye be wu.

³³ Eyoñe be kuiya e vôme ba loon ékôkoé nlô, be nga tyelé nye *krôa valé, nalé fe bebo mbia be mam bebaé: Wua e mbo nnôm, nyô mbok e mbo ngal.

³⁴ Yésus a nga jô na: A Esaa wom, jamé'é be, amu be nji yem e jam ba bo. Be nga kabane mengômesane mé a ndoone me abia.

³⁵ Bôt be nga tele valé be fombô'ô. E mfa'a bivet, be mbe be kpwe'ele'e Yésus be jô'ô na: A nga nyii bôte befe; a tame nyii émien, nge a ne Krist ntobane Zambe!

³⁶ Bezimbi fe be nga subu nye bebé be kpwe'ele'e nye a ve nye woon a ne sañ

³⁷ be jô'ô na: Nge ô ne njô bôte Beyude, nyi'i womien!

³⁸ Ntilan ô mbe nye nlô yôbe na: Nyôna a ne njôô Beyude.

³⁹ Wua ya bebo mbia be mam be mbe be tyele *krôa a nga kobô nye ébiasé na: Ye ô nji bo Krist? Nyi'i womien a nyi'i bia!

⁴⁰ Ve nyô mbok a nga komekane nye a jô na: Ye ô nji ko Zambe woñ, e wo wo tôban avale melebe da'

⁴¹ E mfa'a wongan bia tôbane *zôsôô ntyi'ane mejô, amu bia nyoñe ma'an mimboone miangan mi nga yiane nyoñ; ve môte nyô a nji bo jam éziñ e n'abé.

⁴² Nye na: A Yésus, ô simesa'ane ma, éyoñe wo ye zu éjôé jôé été.

⁴³ Yésus a nga yalane nye na: Ma bele ane ma jô wo de na: den bia wo bia ye tabe Paradis.

⁴⁴ Bebé zañe *môs, dibi e nga bo si ése a kui *mewolo melaa ya mamengô'é.

⁴⁵ Jôp e nga bo ékukut, a éndelé ya *nda Zambe é nga nyaé zañ.

⁴⁶ Yésus a nga yône tyiñe yôbe na: A Esaa wom ma kee nsisime wom e mo môé. A éyoñ a nga tote bifia bite, a nga suu mvebe.

⁴⁷ Evete bezimbi ntete wua, ayene a nga yene jam e nga kui, a nga ve Zambe duma a jô na: Teke vaa nge beté na môte nyô a mbe *zôsôô.

⁴⁸ A minsamba mi bôt mi nga zu tabe jam e nga boban, éyoñe mi maneya yene jam e nga kui, mi nga bulan kôbe mo a nkuk.

⁴⁹ Ba bese be mbe be yemek Yésus a e binga be mbe be kelek e nsamba wé ataté Galilé, be mbe be tele ôyap, be fombô'ô e jam da boban.

Ba jame Yésus e soñ

⁵⁰ Môt éziñe ya ékôane bemvendé, jôé na Yôsep, mbamba môt a *zôsôô,

⁵¹ a nji nyoñe ngap e ntyi'an ajô a mimboon mi bôte bevok, a mbe môte y'Arimaté, tisone Beyude, a mbe a yañge'e éjôé Zambe.

⁵² A nga ke be Pilat a sili mbime Yésus.

⁵³ A nga vaa wô Krôa, a vute wô éfumulu éndelé a bôôé wô e soñ é mbe mfa'an akôm, môt a ngenane te bôéban été.

⁵⁴ Môs ôte ô mbe e môse ba kômesane *sabat, a *sabat a ye'e taté.

⁵⁵ Binga, e ba bebiene baa be Yésus be nga so Galilé be nga ke nsamba Yôsep, be yene soñ a avale ba bôôé e mbime Yésus,

⁵⁶ a be nga bulan asu ya kômesane mimbon a beôlobinda. Wôna e nté *sabat a nga tabe, be nga wo'on ane abendé e né.