LUKAS 21 - Kalate Zambe Nnomo a Mfefe Mfefé Nkôñelan

E mveane nkuse minga

¹ Yésus a nga bete mis a yene minkukum mi mbe mi futi'i mimvean éwolo été.

² A nga yene fe éngôngole nkuse minga, nye a mbe a futi'i bone minsañ bebaé, éwolo te.

³ A a nga jô na: ma jô mia de bebela na: éngôngole nkuse minga é veya a dañe bôte bevo'o bese;

⁴ amu mimveane bana bese ba te ve éwolo été ba te nyoñe mie e biôme biap bia fuuku été, ve nye a te futi jôm ése a be a bili na a nyiñ.

Yérusalém a ye tyamban a e nsoone Mona Môt

⁵ E mbôlô bôte bevo'o be mbe be jô'ô ajô *nda Zambe na é mbe é bili abeñe *mekok a biôme be nga soo bie ane mimvean Yésus a nga jô na:

⁶ Melu ma zu e mme mete e biôme bise mi lôô bi, teke akok da ye li'i e bete di avo'o yôp teke na ba sô'ôlô de si.

⁷ Be nga sili nye na: A nye'ele, éyoñ évé ñhe jame te da ye boban, a ndeme fé ja ye kate foé ya mam mete'

⁸ Yésus a nga yalane na: Taba'ane ntyele ya woneban. Amu abui bôt da ye zu a jôé dam a jô na: ma le, a éyoñ é ntoo bebé. Te tôñane be.

⁹ Eyoñe mia ye wô'ô be kobô'ô ajô bita a nzameta'an, te koone woñ, amu nalé a yiane taté boban ôsusua. Ve nalé aa ye ke jô na asu'ulan é soya éyoñe te ébien.

¹⁰ A nga jô be na: Ayoñ da ye wosan ayoñ, éjôé ja ye wosan éjôé.

¹¹ Beta mimfô'ôsan mi si mia ye boban, a e mevôm mevôm, bim a bemfumbale zaé; angôndô bibubua a ye bo a beta mendem e yôp.

¹² Ve da, te na mam mete mese me boban, ba ye bi mia a ba ye tibili mia; ba ye kee mia e meba me Zambe, ba ye futi mia e menda mimbôk, ba ye kee mia asu betyi'i mejô a asu bengovina amu jôé dam.

¹³ Nalé a ye ve mia afôla ya bo bengaa.

¹⁴ Futa'ane ñhe de e nsisime wônan été na mi bo te fas ane mia ye kamane miabebien.

¹⁵ Amu ma ye ve mia anyu a fek e mbie besiñe benane bese be se nguleya jibi nge té si.

¹⁶ Ja'ane bebiaé benan ba ye kuane mia, nalé fe bobenyoñ, bivuvumane bienan a bemvôé benan, a ba ye bo na be wôé abui ya be mia.

¹⁷ Bese ba ye vini mia amu jôé dam.

¹⁸ Ve teke kongo ésile jia ya nlô wônan ja ye jañ;

¹⁹ mia ye nyii minsisime mienan amu mbane wônan.

Yérusalém a tyi'iban ajô

²⁰ Eyoñe mia ye yene Yérusalém mbôma'ane *minsamba mewosan, yemane na éyoñ a yiane tyamban e kpwaneya.

²¹ Eyoñe te, e ba ba ye tabe Yudé be tubuk e minkô, e ba ba ye tabe Yérusalém be kôlô'ô a e ba ba ye tabe mefup be bo'o te bulane tison.

²² Amu melu mete ma ye bo ma me akuna'a, asu ntôébane ya mam mese me ne ntilan.

²³ Ngo'é binga ba ye bo mebum a e ba ba ye nyaa bone mebé melu mete! Amu beta ôlun a ye bobane si, a ayaa da wosan ayoñ.

²⁴ Ba ye ku a meyo me kpwaté mekôn. Ba ye kee be minkôm e be *meyoñ bikule mese, a meyoñe bikuu ma ye tibi Yérusalém a mebo, akekui biyoñ meyoñe bikuu bi kpwaneya.

Nsoone Mona môt

²⁵ Mendem ma ye boban e jôp, e ngon, ateté. Meyoñe bikuu ma ma ye kumetane minleme *si nyô, teke yeme jam be bo amu éduñe mañ a mendim;

²⁶ bôt ba ye wu a woñ, be yange'e jam da ye kui si, amu mengule ya yôp ma ye su'uban.

²⁷ Eyoñe te ba ye yene Mona môt a za'ak e minkut été a abui ngul a étôtok.

²⁸ Eyoñe nalé a ye taté na a boban, teba'ane tetele, a telé minlô, amu nkôtane wônan ô ntoo bebé.

²⁹ A a nga kane be *nkana na: fomba'an figié a bilé bise.

³⁰ Eyoñe bia kui bisôsoñe mekaé, miabebien mia yem, éyoñ mia fombô, na ésep é ntoo bebé.

³¹ Avale te fe, éyoñe mia ye yene mam mete me boba'an, yemane na éjôé Zambe é ntoo bebé.

³² Ma jô mia de bebela na: Miaé bôte wuna wo ye bo teke lôt te na mam mete mese me boban.

³³ Yôp a si bia ye lôt ve mejô mam ma ye bo te lôt.

³⁴ Taba'ane miabebien ntyel, amu woñe na minleme mienan mi za bo adit amu e nnembane mboone mam a nso'one bilam, a e mam ma tyelé nleme yôp ényiñ, a na *môs ôte ô zaa kuu mia yôp éyoñ mi ne te buni,

³⁵ aval ane avot, amu wo ye zu e be bôt be too *si nyô ése.

³⁶ Momba'ane ñhe a ye'elan éyoñ ése nalé mia ye bi ngule ya fame mam mese ma yiane kui, a litibane tetele asu be Mona môt.

³⁷ A amôs, Yésus a mbe a ye'elane e *nda Zambe, a a mbe a kele bômbô e nkôle beôlivié.

³⁸ A bôte bese, ataté mametyé, be mbe be kele be nye, e *nda Zambe, asu ya vô'ôlô nye.