LUKAS 2 - Kalate Zambe Nnomo a Mfefe Mfefé Nkôñelan

Abialé Yésus a ntyi'iban atyele wé

¹ Ve e nga boban biyoñ bite na: atiñe njô bôt Ogust e ke so na be lañe bôt e si ése.

² Elañe bôt ôsu te é nga boban éyoñe Kirinius a mbe ngovina e Siri.

³ Bese be nga ke lañeban, môt ase e nlame wé;

⁴ Yôsep fe a nga bet a kôlô'ô tisone Nazarét ya Galilé, a kelek e tisone David ba loone Bétléhém e Yudé, amu a mbe e *nda a e mvoñe bôte David,

⁵ asu ya ke lañeban baa minga wé Marie a mbe abum.

⁶ A zuu ñhe bo na, e nté be mbe wé, ane *môs a nga yiane biaé ô nga kui;

⁷ e nde a biaé ntôle monafame wé, a mane vute wô e bindelé été a bôôé wô éwolo biyem bia di été, amu afôla ya tabe e nji bo e *nda beyeñ asu dap.

⁸ Beba'ale mintômba be mbe fe e si éte, be too e mefup, be ba'ale'e mimbame miap a alu.

⁹ Ane éngele Nti a nga tebe be ôsu, étôto'o Nti ke ve futi be éfufub été, nde beta woñ a nga bi be.

¹⁰ Engele nye be na: te koone woñ, amu, mi lôô, ma zu kate mia mbamba foé, e nye a ye soo beta mevak asu ayoñ ese:

¹¹ E tisone David, Nyii bôt a bialéya mia den, e nye a ne Krist Nti;

¹² e ndeme nyô ja vebane be mia na: mia ye koone nkeñelé mon ô too mvutan e biyé été, ô bôô éwolo biyem bi wô'ô di été.

¹³ Ateme na, étitibe nkane bita ya yôp, mbundan a éngele, ô nga yia bia bi Zambe ô jô'ô na;

¹⁴ duma e bo'o Zambe e yôbe ya môp da dañ ôyabe yôp a *mvo'é é bo'ok e si asu bôt a dañe nye'e.

¹⁵ Eyoñe beéngele be li'iya be a ke yôp, beba'ale mintômba be nga jôan ézezañe jabe na: e nkeane ñhe a kui Bétléhém bi yen e jam da te bo, e jame Nti a te bo na bi yem.

¹⁶ Ane be nga ji'a ke a koone Marie, Yôsep a nkeñelé mon ô bôô éwolo biyem bia di été,

¹⁷ mvuse ñyenane mon, e nde be nga kate jam e nga jôban ajô mon ate.

¹⁸ Ba bese be nga wô'ô be be nga kam e jame beba'ale mintômba be nga jô be.

¹⁹ E mfa'a Marie, a nga ba'ale mam mete mese a bindi me e nleme wé été.

²⁰ Wôna beba'ale mintômba be nga bulan, be yi'a duma a bikaña'a bi Zambe amu mam mese be nga wôk a yen, nluka'an a e ma mese be nga kate be.

²¹ Mvus melu muam, éyoñ éyoñe ya tyi'i mon atyel é nga kpwaan, be nga yôlé nye jôé na Yésus, aval éngel a nga yôlé nye a ngenane te nyoñeban abum.

Ba ke liti Yésus e * nda Zambe. E jia Siméoñ

²² Wôna éyoñe *môs be nga yiane tuneban ô nga kpwaan ane atiñe Môze da jô, be nga ke e Yérusalém na be liti nye Nti,

²³ aval e ne ntilan e metiñ me Nti na: Monafam ase a taté bialé a ye veban e be Nti,

²⁴ a asu ya ve adu abaé nge bone be zum bebaé *bityi'a avale da jôban e metiñe me Nti été.

²⁵ Nde môt éziñ a mbe e Yérusalém valé jôé na Siméon. Môt ate a mbe *zôsôô a nye'e mam me Zambe, a mbe a yange'e mvolane *nlem Israél a Mfufube Nsisim a mbe be nye.

²⁶ Mfufube Nsisim a nga liti nye na a ye bo te wu te na a taté yene Krist Nti.

²⁷ E nde Nsisim a nga tindi nye na a zu e *nda Zambe, a éyoñe bebiaé be mon, Yésus, be nga zuu nye asu ya jalé e jam *atiñ e mbe e jô'ôk ajô dé,

²⁸ a nga nyoñe nye e mo mé a ve Zambe akéva a jô'ô na:

²⁹ Eyoñe ji a Nti, ô ntoo ve suu mbo ésaé wôé a ke *mvo'é, aval ô nga jô.

³⁰ Amu mise mam me yeneya e nyiane wôé,

³¹ ñwô ô nga kômesan *meyoñ mese me lôô.

³² Nyian ôte ô too éfufup ja faé e zene *meyoñ me ne te yeme Zambe a duma asu ayoñe bôte dôé Israél.

³³ Esaa a nyia mon be nga semé e mam me nga jôban ajô dé.

³⁴ Siméoñ a nga botane be a jô Marie nyia wé na: A ne valé asu nkuan nge ntebane bôt abui Israél été a asu ya bo ndem bôt ba ye sôan.

³⁵ Fansoñ ja ye jii womien e *nlem. Nalé ate asimesan e solô abui minlem mi bôt da ye kulan.

³⁶ Nkulu mejô minga a mbe fe valé jôé na Anna, ngone Fanuél ya mvô'ô Azér. A mbe a ntoo nnôm abui. Eyoñe baa nnôm be nyiñeya mimbu zamgbwa,

³⁷ e nde a li'i nkus a kui éyoñ a ntoo mimbu mewôme muam a minyin. A mbe te kandane *nda Zambe, a tabe'e bisulan alu a *môs, a tyi bidi a bo meye'elan.

³⁸ Nye'e ve suan éyoñe te a taté na a kañe Zambe a kobô ajô mon e be ba bese be mbe be yange'e *nkôtan Israél.

³⁹ Eyoñ be nga jalé mam mese me ne ntilan e metiñ me Nti, be nga bulan e Galilé, e tisone jap Nazarét.

⁴⁰ Mfa'a mongô, a nga yaé a bo ngul, njalan a fek, a mvame Zambe é mbe be nye.

Yésus a li'i e * nda Zambe

⁴¹ Mbu ôse, bebiaé be mbe be kelek e Yérusalém, asu abô'ô Pak.

⁴² Eyoñ a ntoo mimbu awôm a mibaé, be ke be nga ke Yérusalém avale fulu y'abôk é né,

⁴³ be bula'an amané melu m'abôk, e nde ésoé mongô Yésus ja li'i e Yérusalém, bebiaé bé teke yeme nalé.

⁴⁴ Baa be bemvôé bap nsamba, be wuluya ngume *môs, e nde ba taté na ba jeñe nye e be bivuvuman a beñyemba'an.

⁴⁵ Eyoñ be boya te nye yen, e nde ba zu bulan e Yérusalém be kele ba jeñe nye.

⁴⁶ Mvuse melu melaa e nje ba zu koone nye e *nda Zambe, a too ézezañe beye'ele metiñ, a vô'ôlô'ô, a sili'i fe be minsili.

⁴⁷ Ba bese be mbe be vô'ôlô'ô nye ve zu kam atyeñe ya biyalane bié.

⁴⁸ Eyoñe bebiaé bé be nga yene nye, be nga semé, nyia wé nye nye na: A mone wom amu jé wo te bo bia ana? Tame yen, bia ésoo bia jeñe wo a biyebe bise.

⁴⁹ Nye be na: Amu jé ñhe mi nga jeñe ma? Ye mi nji yeme na ma yiane tabe e ndaa Esaa wom'

⁵⁰ Ve be be nji wô'ô jam a nga jô be.

⁵¹ Mvus éte, baa be be be nga sis a ke e Nazarét; a nga ve be mewôk; a nyia a nga ba'ale mam mete mese e nleme wé été.

⁵² Yésus a nga yaé e fek, e nté, Zambe a bôt be yene nye mvaé.